ខេត្តបាត់ដំបង ៖ អាជ្ញាធរ និងប្រជាពលរដ្ឋក្នុងមូលដ្ឋានបានលើកគ្នាទៅពិនិត្យដល់ទីតាំងបូមខ្សាច់នៅក្នុងអូរមួយកន្លែង កាលពីព្រឹកថ្ងៃទី១០ កក្កដា នៅចំណុចអូរតាស្វាយ ស្ថិតក្នុងភូមិច្រនាង ឃុំគោកឃ្មុំ ស្រុកថ្មគោល ដែលមានក្រុមហ៊ុនគ្រឿងចក្រមួយ បាននិងកំពុងសំងំដំឡើងម៉ាស៊ីន និងឧបករណ៍បូមខ្សាច់នៅទីនោះគ្មានច្បាប់អនុញ្ញាត ហើយត្រូវអាជ្ញាធរនិងប្រជាពលរដ្ឋសម្រេចបណ្ដេញឲ្យក្រុមហ៊ុនអនាធិបតេយ្យមួយនេះរើរតោងរើរហឹងចេញឲ្យអស់ពីទីតាំងនោះដោយមិនអនុញាតឲ្យចូលទៅលួចធ្វើសកម្មភាពជាលើកទីពីរឡើយ ។
សេចក្ដីរាយការណ៍បានឲ្យដឹងថា ការសម្រេចបណ្ដេញក្រុមហ៊ុនគ្រឿងចក្រគ្មានច្បាប់ទម្លាប់ ដែលសំងំលួចបំពាក់សម្ភារបូមខ្សាច់ឲ្យចាកចេញពីទីតាំងខាងលើនេះ បានធ្វើឡើងក្រោយពីមានពលរដ្ឋជាង៥០នាក់ ដែលតំណាងឱ្យពលរដ្ឋជាច្រើនគ្រួសារ និងច្រើនភូមិនៅតំបន់នោះប្ដឹងតវ៉ា ព្រោះអ្នកភូមិរកឃើញថា ក្រុមហ៊ុនគ្មានអត្តសញ្ញាណមួយនេះហាក់បង្ហាញនូវគោលដៅមិនច្បាស់លាស់ក្នុងការពន្យល់ពលរដ្ឋ ។
បើតាមអ្នកភូមិបាននិយាយថា ក្រុមគ្រឿងចក្រនេះបានទៅជួលដីអ្នកភូមិមួយកន្លែងនៅក្បែរទីតាំងបូមខ្សាច់នោះ អស់រយៈជិតមួយខែកន្លងមកហើយ ដើម្បីដាក់គ្រឿងចក្រ និងស្ដុកសម្ភារនានា សម្រាប់សាងសង់ការដ្ឋានបូមខ្សាច់នៅក្នុងអូរ ។ ពេលប្រជាពលរដ្ឋនាំគ្នាចុះទៅសាកសួរអ្នកគ្រប់គ្រងគ្រឿងចក្រនេះ ម្ដងប្រាប់ថា ក្រុមហ៊ុនគាត់ចូលកាយដីស្ដារអូរធ្វើផ្លូវសងខាងអូរនោះប្រវែង៨០០ម៉ែត្រ ម្ដងប្រាប់ថា កាយរុករកខ្សាច់ក្នុងអូរដើម្បីធ្វើតេស្ដ ។ ប៉ុន្តែមេការដែលព្យាយាមផ្ដល់ចម្លើយមិនច្បាស់លាស់រូបនេះ មិនបាននិយាយ ឬបង្ហាញច្បាប់អនុញ្ញាតពីអាជ្ញាធរ ឬពីមន្ទីរជំនាញឲ្យពលរដ្ឋបានឃើញទេ ។
ដោយសារតែការបារម្ភខ្លាំងពីសកម្មភាពក្រុមហ៊ុនបូមខ្សាច់នេះ អាចបង្កផលប៉ះពាល់ដល់ជីវភាព និងការរស់នៅរបស់អ្នកភូមិ ទើបនៅព្រឹកថ្ងៃទី១០ កក្កដា ក្រុមអ្នកភូមិប្រមាណ៥០នាក់ បានលើកគ្នាទៅតវ៉ាដល់សាលាស្រុកថ្មគោល ដើម្បីសុំអន្តរាគមន៍ពីអាជ្ញារស្រុកឲ្យជួយរកដោះស្រាយ ចំពោះក្រុមហ៊ុនបូមខ្សាច់ដែលគេសង្ស័យគ្មានច្បាប់អនុញ្ញាតទៅដំឡើងគ្រឿងចក្រ និងបំពាក់សម្ភារបូមខ្សាច់នៅក្នុងអូរខាងលើនេះ ។
ក្រុមអ្នកតវ៉ាបាននិយាយថា មូលហេតុដែលអ្នកភូមិលើកគ្នាទៅតវ៉ានេះ ព្រោះអ្នកភូមិបារម្ភមិនឈប់ឈរថា បើក្រុមហ៊ុនគ្រឿងចក្រនេះ ពិតជាដំឡើងម៉ាស៊ីនបូមយកខ្សាច់ក្នុងអូរនេះមែន អ្នកភូមិដែលរស់នៅតាមដងអូរប្រាកដជារងផលប៉ះពាល់ធ្ងន់ធ្ងរណាស់ ។ អ្នកភូមិបានលើកឡើងពីក្ដីបារម្ភដូច្នេះថា «សកម្មភាពបូមខ្សាច់យូរៗអាចនឹងបាក់ដីមាត់អូរប៉ះពាល់ដល់លំនៅឋានប៉ះពាល់ផលដំណាំ ស្រែចម្ការ និងបង្កការលំបាកដល់ការប្រើប្រាសទឹកអូរ ដើម្បីស្រោចស្របដំណាំកសិកម្មផ្សេងៗនៅតាមដងអូរនោះ» ។ ដូច្នេះហើយ ទើបពួកគេសូមឲ្យអាជ្ញាធរជួយរកវិធានការទប់ស្កាត់ ឬដោះស្រាយ ។
ក្រោយបញ្ចប់ការសួរនាំ ជាមួយប្រជាពលរដ្ឋប្រមាណ៥០នាក់ ដែលតំណាងឲ្យពលរដ្ឋជាច្រើនគ្រួសារ និងច្រើនភូមិលើកគ្នាតវ៉ាដល់សាលាស្រុកថ្មគោល លោកភួង ស៊ីល្យា អភិបាលរងស្រុកថ្មគោលក៏បានដឹកនាំមន្ត្រីជំនាញរួមដំណើរជាមួយប្រជាពលរដ្ឋជាង៥០នាក់ផង បានចុះទៅពិនិត្យដល់ទីតាំងបូមខ្សាច់នៅចំណុចអូរតាស្វាយនោះភ្លាមៗដែរ នៅព្រឹកថ្ងៃដដែល ដើម្បីសួរនាំអំពីគោលបំណង និងច្បាប់ទម្លាប់របស់ក្រុមហ៊ុនគ្រឿងចក្រនោះ ។
លោកភួង ស៊ីល្យា ត្រូវបានគេស្រង់សំដីដែលលោកបាននិយាយនៅទីតាំងបូមខ្សាច់ថា បើតាមប្រវត្តិអូរមួយនេះជាអូរបុរាណមានអាយុកាលច្រើនឆ្នាំ ដែលសព្វថ្ងៃមានប្រជាពលរដ្ឋរាប់រយគ្រួសារ រស់នៅច្រើនភូមិបានអាស្រ័យផល និងប្រើប្រាស់ទឹកអូរនេះ ។ ដោយឡែក បើនិយាយពីវត្តមានក្រុមហ៊ុនសំងំបំពាក់សម្ភារបូមខ្សាច់ខាងលើនេះវិញ បើតាមលោក ភួង ស៊ីល្យា បាននិយាយថា ពាក់ព័ន្ធនឹងការរុករកខ្សាច់ក្នុងអូរនេះ កន្លងមក បើតាមលោកដឹងក្រុមហ៊ុននេះធ្លាប់បានដាក់ពាក្យស្នើសុំទៅរដ្ឋបាលខេត្ត និងទៅមន្ទីរជំនាញដែរហើយ ដើម្បីសុំការច្បាប់អនុញ្ញាត ហើយខាងតំណាងខេត្ត និងមន្ត្រីជំនាញក៏ធ្លាប់បានចុះពិនិត្យទីតាំងនេះផ្ទាល់ទៀតផង ។ ប៉ុន្តែរហូតមកដល់ពេលនេះ ខាងសាលាខេត្ត និងខាងមន្ទីរជំនាញ មិនទាន់មានការសម្រេចបែបណា ឬចេញច្បាប់អនុញ្ញាតនៅឡើយទេ តែបែរក្រុមហ៊ុននេះដឹកគ្រឿងចក្រចូលបោះទីតាំងយ៉ាងធំដុំសំងំរៀបចំបំពាក់ម៉ាស៊ីនបូមខ្សាច់ពេញទឹកពេញដីទៅហើយ ។
នៅលើទីតាំងការដ្ឋានបូមខ្សាច់នោះ គេឃើញបុរសម្នាក់ដែលគាត់អះអាងថា គាត់ជាឪពុកក្មេកម្ចាស់ក្រុមហ៊ុនគ្រឿងចក្រនេះ។ កូនប្រសារគាត់បានឲ្យគាត់មើលការខុសត្រូវនៅការដ្ឋាននេះ និងគ្រឿងចក្រផង។ បុរសនេះមិនបានប្រាប់ពីឈ្មោះក្រុមហ៊ុន កូនប្រសារគាត់ទេ ហើយក៏មិនបាននិយាយពីច្បាប់ទម្លាប់អនុញ្ញាតអ្វីដែរ ។ ប៉ុន្តែគាត់បានបញ្ជាក់ប្រាប់ថា កូនប្រសារគាត់ ប្រាប់ឲ្យគាត់នៅគ្រប់គ្រង មើលការខុសត្រូវគ្រឿងចក្រ និងរៀបចំតម្លើងម៉ាស៊ីនបូមខ្សាច់ ។
អ្នកគ្រប់គ្រងការដ្ឋានបូមខ្សាច់រូបនេះ បាននិយាយទៅកាន់ក្រុមការងារចុះត្រូតពិនិត្យថា កូនប្រសារគាត់បានដំឡើងម៉ាស៊ីនបូមខ្សាច់ពីក្នុងអូរ ដើម្បីគ្រាន់តែជាការធ្វើតេស្ដលើកដំបូងប៉ុណ្ណោះ ។ ប៉ុន្តែគាត់បានព្រលយនិយាយពីបរិមាណខ្សាច់នៅក្នុងអូរនេះយ៉ាងដូច្នេះថា «តាមពិត ខ្សាច់នៅក្នុងអូរនេះ មិនមាន១០០%ទេ អាចមានចន្លោះពី៦០ទៅ៧០% ប៉ុណ្ណោះ តែអាចរែងធ្វើអាជីវកម្មបាន» ។
យ៉ាងណាក៏ដោយ ជាមួយនឹងការចុះពិនិត្យនិងសួរនាំរកច្បាប់ទម្លាប់ផ្ទាល់ពីសំណាក់លោកអភិបាលរងស្រុកថ្មគោល ដែលមានការចូលរួមពីប្រជាពលរដ្ឋជាង៥០នាក់ផងនេះ អាជ្ញាធរមិនបានអនុញាតឲ្យក្រុមហ៊ុននេះបន្តសកម្មភាពរបស់ខ្លួនទៀតទេ បើទោះជាតំណាងក្រុមហ៊ុនអនាធិបតេយ្យមួយនេះបានព្យាយាមលើកហេតុផលមកពន្យល់អាជ្ញាធរ និងក្រុមអ្នកតវ៉ាយ៉ាងណាក្ដី ។
នៅក្នុងកំណត់ហេតុចុះសួរនាំ និងត្រួតពិនិត្យផ្ទាល់ នៅព្រឹកថ្ងៃទី១០ កក្កដា អាជ្ញាធរស្រុកថ្មគោល បានសម្រេច និងកំណត់ឲ្យតំណាងក្រុមហ៊ុនគ្មានច្បាប់ទម្លាប់មួយនេះ រុះរើដកគ្រឿងចក្រ និងសម្ភារនានា ចេញពីលើទីតាំងនោះឲ្យអស់ចាប់ពីថ្ងៃនេះតទៅ (ថ្ងៃចុះពិនិត្យ) ដោយមិនអនុញ្ញាតឲ្យមានដឹកគ្រឿងចក្រចូលធ្វើសកម្មភាពជាលើកទី២ឡើយ បើគ្មានច្បាប់អនុញ្ញាត ។ ជាមួយនឹងលក្ខខណ្ឌដ៏ប្រថុចញ៉ុចបែបនេះ អ្នកមើលការខុសត្រូវគ្រឿងចក្រដែលអះអាងថា ជាឪពុកក្មេកថៅកែក្រុមហ៊ុនបានយល់ព្រមរើតោករើហឹងចេញពីការដ្ឋានដែលត្រៀមបូមខ្សាច់ តែមេការូបនេះសុំពេល០៣ថ្ងៃ ដើម្បីរុះរើសម្ភារ និង ដឹកគ្រឿងចក្រចេញពីលើទីតាំងនេះឲ្យអស់ ។
ប៉ុន្តែយ៉ាងណា មុននឹងក្រុមការងារចាកចេញ អាជ្ញារធរបានផ្ដែរផ្ដាំជាលើកចុងក្រោយថា «ប្រសិនបើគ្មានច្បាប់អនុញ្ញាតទេ ថ្ងៃក្រោយហាមដាច់ខាតមិនឲ្យក្រុមហ៊ុននេះ ចូលធ្វើសកម្មភាពដាច់ខាតលើដីអូរនេះឡើយ» ។
ចែករំលែកព័តមាននេះ