បា.ត់នាវា៣គ្រឿងដឹកជនអន្តោប្រវេសន៍៣០០នាក់ ក្រោយចេញដំណើរមកកោះកាណារី
ប្រទេសអេស្ប៉ាញ ៖ សមាគមជួយជនអន្តោប្រវេសន៍ CAMIMANDO FRONTERAS/WALKING
ប្រទេសអេស្ប៉ាញ ៖ សមាគមជួយជនអន្តោប្រវេសន៍ CAMIMANDO FRONTERAS/WALKING BORDERS រាយការណ៍នាថ្ងៃទី៩ កក្កដា ថា មនុស្សដល់យ៉ាងតិច៣០០នាក់ ដែលជិះនាវា៣គ្រឿងដឹកពួកគេពីប្រទេសសេនេហ្គាល់ មកកាន់ប្រជុំកោះកាណារីអេស្ប៉ាញ ក្នុងដែនទឹកនៃឆ្នេរសមុទ្រភាគពាយ័ព្យអាហ្វ្រិកបានបាត់ខ្លួនក្នុងសមុទ្រ ។
អ្នកទទួលខុសត្រូវរបស់អង្គការនោះម្នាក់គូសបញ្ជាក់ប្រាប់រ៉យទ័រថា នាវា២គ្រឿងនាវាមួយដឹកមនុស្សប្រមាណ៦៥នាក់និងនាវាមួយទៀតដឹកមនុស្សរវាងពី៥០ទៅ៦០នាក់ បានបាត់ដានចាប់តាំងពី១៥ថ្ងៃមកហើយ គឺចាប់តាំងពីពេលចាកចេញពីសេនេហ្គាល់ ប៉ុនប៉ងមកកាន់អេស្ប៉ាញ ។ នាវាទី៣បានចាកចេញពីសេនេហ្គាល់នាថ្ងៃទី២៧ មិថុនា ជាមួយមនុស្សជិះ២០០នាក់ ។
សាច់ញាតិគ្រួសារពួកគេបានបាត់ដំណឹងពួកគេឈឹងតាំងពីការចេញដំណើរមក ។ នាវាទាំង៣គ្រឿងនោះចាកចេញពីក្រុង KAFOUNTINE ភាគខាងត្បូងសេនេហ្គាល់ចម្ងាយប្រមាណ១៧០០គីឡូម៉ែត្រពីកោះ TENERIFE ជាកោះមួយក្នុងចំណោមប្រជុំកោះកាណារីអេស្ប៉ាញ ។
ប្រជុំកោះកាណារីក្នុងដែនទឹកនៃឆ្នេរសមុទ្រអាហ្វ្រិកខាងលិច បានក្លាយជាគោលដៅសំខាន់របស់ពួកអន្តោប្រវេសន៍ ដែលប៉ុនប៉ងមកកាន់អេស្ប៉ាញ ។ ពួកអន្តោប្រវេសន៍មួយចំនួនក៏ប៉ងផ្សងព្រេងធ្វើដំណើរកាត់សមុទ្រមេឌីទែររ៉ាណេ មកកាន់ដែនគោកអេស្ប៉ាញដែរ ។ តាមទិន្នន័យរបស់អង្គការអន្តរជាតិទទួលបន្ទុកខាងអន្តោប្រវេសន៍របស់ អ.ស.ប ថា មនុស្សយ៉ាងតិច៥៥៩នាក់ ក្នុងនោះមានកុមារ២០នាក់បានត្រូវស្លា.ប់ក្នុងឆ្នាំ២០២២ ខណៈពួកគេប៉ុនប៉ងផ្សងព្រេងកាត់សមុទ្រមកកាន់ប្រជុំកោះកាណារី ៕
ចែករំលែកព័តមាននេះ