ខួប៥០០ថ្ងៃនៃសង្គ្រាមរុស្ស៊ី-អ៊ុយក្រែន ខណៈលោកហ្សេឡេនស្គី មកកាន់កោះពស់
សង្គ្រាមអ៊ុយក្រែន ៖ ថ្ងៃទី៨កក្កដាជាថ្ងៃនិម្មិត្តរូបដែលកំណត់ពីខួបគម្រប់៥០០ថ្ងៃ ដែលអ៊ុយក្រែន
សង្គ្រាមអ៊ុយក្រែន ៖ ថ្ងៃទី៨កក្កដាជាថ្ងៃនិម្មិត្តរូបដែលកំណត់ពីខួបគម្រប់៥០០ថ្ងៃ ដែលអ៊ុយក្រែន ប្រឈមមុខនឹងសង្គ្រាមដែលរុស្ស៊ីបើកធ្វើពីខែកុម្ភៈឆ្នាំ២០២២មក។
សម្រាប់ឱកាសនោះប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គី បានមកបំពេញទស្សនកិច្ចនៅប្រជុំកោះពស់ មានទំហំត្រឹម១៧ហិកតាក្នុងសមុទ្រខ្មៅ កន្លែងដែលក្រុងគៀវដណ្ដើមបានជ័យជម្នះដំបូង យកកោះនោះពីរុស្ស៊ីវិញ។ ក្នុងសារវីដេអូមួយចេញផ្សាយនាថ្ងៃទី៨កក្កដាតាមបណ្ដាញសង្គម ប្រមុខរដ្ឋអ៊ុយក្រែនថ្លែងថា ពេលនេះយើងស្ថិតនៅលើកោះពស់ដែលដាច់ខាតរុស្ស៊ីមិនអាចដណ្ដើមយកបាន ដូចគ្នានឹងកន្លែងដទៃទៀតរបស់អ៊ុយក្រែន ព្រោះយើងជាប្រទេសដែលអង់អាចក្លាហាន។ ពីកន្លែងជោគជ័យនេះទៅ ខ្ញុំសូមសម្ដែងការអរគុណ ដល់ទាហានយើងគ្រប់គ្នា សម្រាប់ខួប៥០០ថ្ងៃនេះនៃសង្គ្រាម។
ក្នុងវីដេអូគេឃើញលោកហ្សេឡេនស្គីមកកាន់កោះពស់តាមនាវា ហើយបានដាក់កម្រងផ្កានៅមុខស្តូបគោរពវិញ្ញាណក្ខន្ធមួយ។ ក្រោយការចាប់ផ្ដើមលុកលុយចូលអ៊ុយក្រែនបន្តិច កងទ័ពរុស្ស៊ីវាយដណ្ដើមយកបានកោះយុទ្ធសាស្ត្រនេះ ស្ថិតនៅចម្ងាយតែប៉ុន្មានសិបគីឡូម៉ែត្រពីឆ្នេរ។ កោះនោះការពារដោយទាហានអ៊ុយក្រែន១កងតូច។ ទាហានត្រឹមតែ១៣នាក់នៅទីនោះអាចវាយទប់ទល់ដ៏ក្លាហាន រុញច្រានកងទាហានរុស្ស៊ី២លើក តែមិនអាចបន្តប្រយុទ្ធព្រោះអស់គ្រាប់រំសេវ។ នាវាចម្បាំងរុស្ស៊ីដែលវាយប្រហារកោះនោះ បានឲ្យពួកគេចុះចូលតែពួកគេបដិសេធ។ ទីបំផុតពួកគេត្រូវស្លា.ប់ទាំងអស់ ដោយសារការបាញ់ផ្លោងរបស់រុស្ស៊ី។
ចំណែកក្រសួងមហាផ្ទៃអ៊ុយក្រែនរាយការណ៍ថា ការវាយប្រហាររបស់រុស្ស៊ីមួយកាលពីថ្ងៃទី៨កក្កដា នៅភាគខាងកើតអ៊ុយក្រែន បណ្ដាលឲ្យមនុស្សស្លាប់យ៉ាងតិច៨នាក់ ចំថ្ងៃទី៥០០នៃសង្គ្រាម។ តាមតេឡេក្រាមក្រសួងនោះគូសបញ្ជាក់ថា នាថ្ងៃនេះយើងទទួលព័ត៌មានពីមនុស្សស្លា.ប់ច្រើននាក់ ក្រោយការវាយប្រហាររបស់សត្រូវនាពេលព្រឹក។ ក្រៅពីអ្នកស្លាប់មនុស្ស១៣នាក់ទៀតរងរបួស ដោយសារការវាយប្រហារនេះលើក្រុងលីម៉ាន។ ទីក្រុងនោះជាកន្លែងប្រសប់សំខាន់នៃផ្លូវដែក នៅភាគខាងកើតអ៊ុយក្រែន ។ ក្រុងនោះត្រូវបានកងទ័ពអ៊ុយក្រែនវាយដណ្ដើមយកបានពីរុស្ស៊ី កាលពីខែតុលាឆ្នាំទៅមិញ។ កាលពីសប្ដាហ៍មុនកងទ័ពរុស្ស៊ីបានធ្វើការវាយលុកលើតំបន់នោះប៉ងដណ្ដើមយកវិញ។
ពេលឈានដល់ថ្ងៃទី៥០០នៃសង្គ្រាម ដោយមើលឃើញកងទ័ពអ៊ុយក្រែនហាក់មិនអាចវាយបកដណ្ដើមដែនដីដែលរុស្ស៊ីកាន់កាប់បានច្រើន ដូចការរំពឹងទុក ហើយថែមទាំងរងការបាត់បង់ធ្ងន់ធ្ងរ ក៏ទោះបីមានការហាមឃាត់ជាអន្តរជាតិ អាមេរិកនាថ្ងៃទី៧កក្កដាអះអាងថា ខ្លួននឹងផ្ដល់គ្រាប់បែកចង្កោមហៅគ្រាប់បែកឃ្លីដល់អ៊ុយក្រែន ក្នុងក្របខណ្ឌនៃជំនួយយោធាថ្មី៨០០លានដុល្លារ។ អាវុធនោះពិតណាស់បង្កគ្រោះថ្នាក់ខ្លាំងនិងយូរទៀតផងដល់ជនស៊ីវិល៕
ចែករំលែកព័តមាននេះ