កីឡាករអ៊ីតាលីអាឡេសានដ្រូ ប៉េតាស៊ីបានសំដែងនូវក្តីរីករាយជាខ្លាំងបន្ទាប់ពីបានយកឈ្នះណាក់ទី២នៃការប្រណាំងកង់កម្មវិធីGiro d’Italiaនៅប្រទេសអ៊ីតាលីកាលពីថ្ងៃអាទិត្យទី៨ខែសភាកន្លងមកនេះ។ ការប្រណាំងដំណាក់ខាងលើនេះបញ្ចប់នៅទីក្រុងប៉ាម៉ា។ ប៉េតាស៊ីដែលជាអ្នកជិះកង់ឲ្យក្រុមLampre-ISDបានយកឈ្នះដំណាក់ដែលមានចម្ងាយផ្លូវ២៤៤គីឡូម៉ែត្រចេញដំណើរពីទីក្រុងអាល់បាឆ្ពោះទៅកាន់ទីក្រុងប៉ាម៉ាប្រទេសអ៊ីតាលីដោយប្រើអស់ថិរវេលា៥ម៉ោង៤៥នាទីនិង៤០វិនាទីយកឈ្នះកីឡាករអង់គ្លេសម៉ាក កាវ៉ឹនឌីសជិះឲ្យក្រុមHTC-Highroadនិងបានយកឈ្នះកីឡាករមិត្តរួមជាតិខ្លួនម៉ានូអែល បេលលេតទីជិះឲ្យក្រុមColnago-CFSដែលបានប្រើថិរវេលាស្មើៗគ្នា។
ថ្លែងបន្ទាប់ពីទទួលបានជ័យជំនះកីឡាករប៉េតាស៊ីបានបញ្ជាក់ថា៖«ខ្ញុំពិតជាសប្បាយចិត្តដែលបានយកឈ្នះដំណាក់នេះ។ នេះពិតជាជ័យជំនះយ៉ាងពិសេសមួយដ្បិតការប្រណាំងនៅដំណាក់នេះប្រជុំទៅដោយកីឡាករជើងខ្លាំងជាច្រើន។ សង្ឃឹមថាជ័យជំនះនៅដំណាក់បន្តទៀតគឺជារបស់ខ្ញុំ។ ខ្ញុំនឹងប្រឹងប្រែងឲ្យអស់ពីលទ្ធភាពដើម្បីយកឈ្នះដំណាក់ក្រោយៗ
ទៀត»។
បើទោះណាកីឡាករអ៊ីតាលីរូបនេះបានយកឈ្នះដំណាក់នេះក៏ពិតមែន ប៉ុន្តែនៅលើតារាងពេលវេលាសរុបគេពុំអាចដណ្តើមបានការនាំមុខនៅឡើយទេ ដ្បិតកីឡាករអង់គ្លេសកាវ៉ឹនឌីសដែលបានបញ្ចប់ដំណាក់នេះក្នុងលំដាប់ទី២នោះសន្សំពេលវេលាបានយ៉ាងល្អបំផុតគ្រងអាវកាក់ពណ៌លឿងរក្សាការនាំមុខគេដដែល ។
ឆ្លងកាត់ការប្រណាំងចំនួន២ដំណាក់មកនេះ កីឡាករអង់គ្លេសប្រើអស់ថិរវេលាតិចជាងគេបំផុតគឺ៦ម៉ោងនិង៦នាទីនិង២៧វិនាទីនាំមុខកីឡាករបេឡារូសកង់ស្តង់ស៊ីន ស៊ីវីសូវជិះឲ្យក្រុមអេចធីស៊ី ហាយរ៉ូដនិងឈ្នះកីឡាករអាមេរិកក្រេក ឡេវីសដែលកីឡាករទាំង២ប្រើពេលច្រើនជាងកីឡាករកាវ៉ឹនឌីស១២វិនាទីស្មើៗគ្នា ។
សូមបញ្ជាក់ថាការប្រណាំងកម្មវិធីGiro d’Italiaឆ្នាំនេះមាន២១ដំណាក់។ ដោយឡែកដំណាក់ទី៣ដែលជាដំណាក់បន្តមានចម្ងាយផ្លូវ១៧៣គីឡូម៉ែត្រចេញដំណើរពីទីក្រុងReggio Emilia ឆ្ពោះទៅកាន់ទីក្រុងRapallo ៕
ចែករំលែកព័តមាននេះ