កងទ័ពរបស់លោកមូអាម៉ា កាដាហ្វី ដែលលាក់រថក្រោះក្នុងអគារទាំងឡាយ ហើយលាក់ខ្លួនក្នុងសង្កាត់មានប្រជាជនរស់នៅនៃទីក្រុងមីស្ត្រាតាធ្វើឱ្យស្មុគ្រស្មាញដល់ភារកិច្ចរបស់អូតង់ដែលប៉ុនប៉ងបញ្ចប់ការហ៊ុមព័ទ្ធរយៈពេល២ខែមកហើយនូវទីក្រុងធំបំផុតមួយនាភាគខាងលិចលីប៊ីនេះស្ថិតក្នុងកណ្តាប់ដៃពួកបះបោរ។ ទោះបីជាមានការទម្លាក់គ្រាប់បែកផ្ទួនៗរបស់អូតង់ ក៏កងទ័ពលីប៊ីនៅរក្សាការគាបសង្កត់លើទីក្រុងនោះដែលជាទីលាននៃការប៉ះទង្គិចគ្នាយ៉ាងស្វិតស្វាញរវាងក្រុមច្បាំងគ្នាទាំង២ដែរ។
ការប្រយុទ្ធគ្នាយ៉ាងខ្លាំងក្លាកើតមានកាលពីថ្ងៃទី៨ ឧសភា រវាងកងទ័ពរៀបរយ និងពួកឧទ្ទាមនៅជិតព្រលានយន្តហោះក្រុងមីស្ត្រាតាហើយអូតង់បានទម្លាក់គ្រាប់បែកលើតំបន់មួយស្ថិតនៅភាគខាងកើតទីក្រុងនេះ។ ទូរទស្សន៍រដ្ឋលីប៊ី អាល់ ហ្សាម៉ា ហីុរីយ៉ា រាយការណ៍ថា ពួកបះបោរជាច្រើនក្រុមនៅក្រុងមីស្ត្រាតាបានចុះចូល។ ក៏បុន្តែអ្នកនាំពាក្យរបស់ពួកបះបោរបញ្ចេញប្រតិកម្មថា នោះជាការភូតកុហក។ ពុំមានមនុស្សណាម្នាក់ធ្វើបែបនេះឡើយ។ យើងនឹងប្រយុទ្ធប្រឆាំងលោកកាដាហ្វីរហូតដល់ទីបញ្ចប់។ អ្នកនាំពាក្យពួកបះបោរទទួលស្គាល់ថា ការទម្លាក់គ្រាប់បែកកាលពីថ្ងៃទី៧ ឧសភា កំទេចអាងស្តុកប្រេង៤នៃទីក្រុងនោះបានចោទជាបញ្ហា។
នៅទីក្រុងមីស្ត្រាតាពួកឧទ្ទាមនិយាយថា កងទ័ពលីប៊ីបានលាក់រថក្រោះក្នុងអគារទាំងឡាយ ហើយលាក់កាំភ្លើងធំនៅតំបន់មានប្រជាជនរស់នៅច្រើន ឬនៅជិតព្រះវិហារនានាញាំុងឱ្យមានការលំបាកដល់កងកម្លាំងអូតង់ក្នុងការទម្លាក់គ្រាប់បែក ព្រោះខ្លាចត្រូវជនសីុវិល ៕
ចែករំលែកព័តមាននេះ