អណ្ដាតភ្លើងបានឆាបឆេះបន្ទប់ស្នាក់នៅរបស់បុគ្គលិកគ្រប់គ្រងរោងចក្រផលិតមី បង្កឱ្យមានការភ្ញាក់ផ្អើលដល់សមត្ថកិច្ចចេញរថយន្តពន្លត់អគ្គិភ័យអន្តរាគមន៍បា.ញ់ទឹកពន្លត់ កាលពីវេលា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា អណ្ដាតភ្លើងបានឆាបឆេះបន្ទប់ស្នាក់នៅរបស់បុគ្គលិកគ្រប់គ្រងរោងចក្រផលិតមី បង្កឱ្យមានការភ្ញាក់ផ្អើលដល់សមត្ថកិច្ចចេញរថយន្តពន្លត់អគ្គិភ័យអន្តរាគមន៍បា.ញ់ទឹកពន្លត់ កាលពីវេលាម៉ោង៣និង៣០នាទីទៀបភ្លឺឈានចូលថ្ងៃទី៧ ខែកក្កដា ឆ្នាំ២០២៣ នៅចំណុចបន្ទប់ស្នាក់នៅរបស់បុគ្គលិក ក្នុងបរិវេណរោងចក្រផលិតមី យីហោ «ប្រេស៊ីដេនហ្វូត» តាមបណ្ដោយផ្លូវ២១៧ ស្ថិតក្នុងភូមិសំបួរ សង្កាត់ដង្កោ ខណ្ឌដង្កោ។
សេចក្តីរាយការណ៍បន្តថា ម្ចាស់បន្ទប់ខាងលើមានឈ្មោះ ភីសើត កាត់សែម ភេទប្រុស ជាជនជាតិថៃ អាយុ៧០ឆ្នាំ មុខរបរអ្នកគ្រប់គ្រងរោងចក្រផលិតមី ស្នាក់នៅកន្លែងកើតហេតុ។ ហើយបន្ទប់ដែលត្រូវភ្លើងឆាបឆេះនោះ មានទំហំ៨ម៉ែត្រគុណ៨ម៉ែត្រ ធ្វើអំពីបេតុងជាន់ទី១។
បើតាមប្រភពពីសន្តិសុខយាមនៅក្នុងរោងចក្រ បានអោយដឹងថា មុនពេលកើតហេតុ ពួកគេកំពុងតែអង្គុយយាមនៅក្នុងរោងចក្រ រហូតដល់ម៉ោងកើតហេតុ ក៏ស្រាប់តែបុរសជាជនជាតិថៃ ហើយក៏ជាអ្នកគ្រប់គ្រងនៅក្នុងរោងចក្រនោះ បានស្រែកហៅ ក្នុងគោលបំណងអោយជួយ។
សន្តិសុខយាមរោងចក្រខាងលើ បន្តថា លុះពេលពួកគាត់រត់ទៅមើល ស្រាប់តែឃើញមានអណ្ដាតភ្លើងឆាបឆេះយ៉ាងសន្ធោសន្ធៅ និងផ្សែងហុយឡើងខ្មួលខ្មាញ់ចេញពីបន្ទប់បាត់ទៅហើយ ដោយមិនដឹងថា តើមូលហេតុអ្វីនោះទេ?។ ភ្លាមៗនោះ ពួកគាត់បានត្រឹមតែជួយត.ទុយោទឹក និងយកបំពង់ពន្លត់អគ្គិភ័យមកបា.ញ់ពន្លត់អស់ចំនួន៣បំពង់ តែមិនអាចគ្រប់គ្រងបានឡើយ ទើបពួកគាត់រាយការណ៍ជូនកម្លាំងសមត្ថកិច្ច ដើម្បីសុំជំនួយរថយន្ដពន្លត់អគ្គិភ័យអោយជួយអន្តរាគមន៍តែប៉ុណ្ណោះ។
ប្រភពដដែលបានបន្តទៀតថា បន្តិចក្រោយមក ក៏មានអាជា្ញធរសមត្ថកិច្ច ក៏ដូចជារថយន្ត ពន្លត់អគ្គិភ័យ រួមមាន ៖ រថយន្តបង្ការពន្លត់អគ្គិភ័យរបស់ការិយាល័យរាជធានីភ្នំពេញ ប្រចាំនៅខណ្ឌដង្កោចំនួន២គ្រឿង, រថយន្តពន្លត់អគ្គិភ័យរបស់ក្រុមហ៊ុនស្រាបៀរកម្ពុជាចំនួន១គ្រឿង និងរថយន្តពន្លត់អគ្គិភ័យរបស់អង្គភាព៧១១ចំនួន២គ្រឿង បានចេញអន្តរាគមន៍ទៅកន្លែងកើតហេតុ និងសហការគ្នាបា.ញ់ទឹកពន្លត់អស់ចំនួន៣រថយន្ដ ទើបធ្វើឱ្យអណ្ដាតភ្លើងរលត់ទៅវិញជាស្ថាពរនៅវេលាម៉ោង៤យប់ថ្ងៃដដែល។
ក្រោយពេលកើតហេតុ សមត្ថកិច្ចក៏បានអោយដឹងដែរថា គ្រោះអគ្គិភ័យខាងលើនេះ មិនបណ្ដាលឱ្យគ្រោះថ្នាក់ដល់មនុស្សនោះទេ គឺគ្រាន់តែឆេះសម្ភារៈក្នុងបន្ទប់អស់ទាំងស្រុងតែប៉ុណ្ណោះ។ ហើយចំពោះមូលហេតុ ដែលបណ្ដាលឲ្យភ្លើងឆាបឆេះនេះ គឺមកពីឆ្លងចរន្តអគ្គិសនីចេញពីកំសៀវដាំទឹក ទើបធ្វើអោយមានការឆាបឆេះបែបនេះតែម្តង៕
ចែករំលែកព័តមាននេះ