ADផ្ទាំងផ្សព្វផ្សាយពាណិជ្ជកម្ម

ដើរតួធ្វើជាកូនធម៌ និងជាទីប្រឹក្សាសម្តេចគំរាមទារប្រាក់គេ៣ម៉ឺនដុល្លារ

14 ឆ្នាំ មុន

០៩ ខែ ឧសភា ឆ្នាំ ២០១១ ម៉ោង ១០:១១

រាជធានីភ្នំពេញ ៖ ស្ត្រីម្នាក់ជាអាជីវករលក់ដូរនៅផ្សារកណ្តាល ដែលបានអួតអាងថា ខ្លួនជាកូនធម៌សម្តេច និងជាទីប្រឹក្សាផងនោះ កាលពីវេលាថ្ងៃត្រង់ថ្ងៃទី៦ ឧសភា បានត្រូវសមត្ថកិច្ចនគរបាលការិយាល័យគ្រប់គ្រង និងអនុវត្តន៍ដីកាក្រសួងមហាផ្ទៃឃាត់ខ្លួន ខណៈពេលចេញពីភោជនីយដ្ឋានរតនគិរី ស្ថិតនៅក្នុងសង្កាត់ផ្សារថ្មីទី៣ ខណ្ឌដូនពេញ

ការឃាត់ខ្លួនស្ត្រីខាងលើ សមត្ថកិច្ចអះអាងថា ជាការធ្វើឡើងតាមដីកាឱ្យនាំខ្លួនរបស់លោកហៀង សុភ័ក្រ្ត ព្រះរាជអាជ្ញារងអមសាលាដំបូងរាជធានីភ្នំពេញ ហើយការចុះដឹកនាំកម្លាំងអនុវត្តន៍ដីកានោះ គឺលោកវរសេនីយ៍ឯក ប៉ុល រតនា អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ និងក្រោមបទបញ្ជាពីលោកឧត្តមសេនីយ៍ទោ អ៊ិន បូរា ប្រធាននាយកដ្ឋាននគរបាលព្រហ្មទណ្ឌ ព្រមទាំងមានការចង្អុលបង្ហាញពីលោកឧត្តមសេនីយ៍ឯក ម៉ត់ ជីតូ ប្រធាននាយកដ្ឋានកណ្តាលនគរបាលយុត្តិធម៌ ។

ទាក់ទិននឹងការឃាត់ខ្លួនស្ត្រីឈ្មោះផាន់ ស្រី ពៅ នេះត្រូវបានសមត្ថកិច្ចឱ្យដឹងថា ដើមចម គឺផ្តើមចេញពីការគំរាមទារប្រាក់ចំនួន៣ម៉ឺនដុល្លារ ពីឈ្មោះម៉ី រដ្ឋា និងប្រពន្ធឈ្មោះឌី លីណា ហើយរឿងនេះបានត្រូវអ្នកស្រីឌី លីណា ដាក់ពាក្យប្តឹងសមត្ថកិច្ច។ សមត្ថកិច្ចបានឱ្យដឹងទៀតថា កាលពីអំឡុងពេលចុងឆ្នាំ២០១០ ស្ត្រីឈ្មោះផាន់ ស្រីពៅ បានដឹងរឿងលោកម៉ី រដ្ឋា និងភរិយាឈ្មោះឌី លីណា មានបញ្ហាប្តឹងប្តល់គ្នាជាមួយអ្នកដទៃ ទៅសាលាដំបូងរាជធានីភ្នំពេញ រឿងលុយកាក់ពាក់ព័ន្ធនឹងដីធ្លី រហូតថា តុលាការមានចេញដីកាឱ្យប្តីប្រពន្ធទាំង២នាក់ចូលខ្លួនទៀតផង ។ ឆ្លៀតក្នុងឱកាសនោះឈ្មោះផាន់ ស្រីពៅ បានអួតអាងថា ខ្លួនជាកូនធម៌ និងជាទីប្រឹក្សាសម្តេច ដូច្នេះកុំឱ្យពាក់ព័ន្ធរឿងនេះ ខ្លួនធានារត់ការទៅសម្តេច និងប្រធានសាលាដំបូងរាជធានី ដើម្បីលុបចោលដីកាឱ្យចាប់ខ្លួន តែខ្លួនត្រូវការប្រាក់ចំនួន២ម៉ឺនដុល្លារ មុន ។

មន្ត្រីសមត្ថកិច្ចឱ្យដឹងទៀតថា ដើមបណ្តឹងទំនងមិនចង់ឱ្យមានរឿងរ៉ាវឡើងតុលាការនោះទេ គេក៏បានពឹងពាក់ឈ្មោះផាន់ ស្រីពៅ ដែលអួតអាងថា ជាកូនធម៌សម្តេច និងជាទីប្រឹក្សាផងដោយប្រគល់ប្រាក់ឱ្យ២ម៉ឺនដុល្លារ នៅចុងខែវិច្ឆិកា ឆ្នាំ២០១០។ ក្រោយពីប្រគល់ប្រាក់ឱ្យហើយដើមបណ្តឹងគឺអ្នកស្រី ឌីលីណា និងស្វាមីនៅតែជាប់មានដីកាឱ្យចូលខ្លួននោះដដែល ។ ពេលអស់ប្រាក់ហើយ រឿងនៅតែមិនទាន់បានបញ្ចប់ ដើមបណ្តឹងបានសួរនាំឈ្មោះផាន់ ស្រីពៅ ពេលនោះស្ត្រីនោះបានទារប្រាក់បន្ថែមទៀត គឺម្តង២.៥០០ដុល្លារ ម្តង៣.៥០០ដុល្លារ និងចុងក្រោយទារ៧.៥០០ដុល្លារសម្រាប់យកទៅឱ្យប៉ូលិស និងប៉េអឹមដើម្បីកុំឱ្យចាប់ខ្លួន។ ប៉ុន្តែប្រាក់ទាំងអស់ដែលឈ្មោះផាន់ ស្រីពៅ ទាមទារប៉ុន្មានលើកនេះ ដើមបណ្តឹងមិនបានប្រគល់ឱ្យទេ គឺឱ្យតែគ្រឿងអលង្ការបន្តិចបន្តួចប៉ុណ្ណោះ ។ ឆ្លងផុតឆ្នាំ២០១០ ចូលដល់ជិតពាក់កណ្តាលឆ្នាំ២០១១ ស្រាប់តែឈ្មោះផាន់ ស្រីពៅ បានទាក់ទងទារប្រាក់ពីដើមបណ្តឹងចំនួន៣ម៉ឺនដុល្លារ ដោយគេសន្យាថា បើប្រគល់ប្រាក់ឱ្យគេដូចការទាមទារនោះ គឺការងារទាំងអស់ពិតជាបានសម្រេចដោយជោគជ័យ ពោលគឺបញ្ចប់រឿងនៅតុលាការ ។

សមត្ថកិច្ចបានឱ្យដឹងថា ដោយសារការទាមទារប្រាក់ញឹកញាប់ និងផលប្រយោជន៍មិនឃើញមានជាផ្លែផ្កា ទោះបីជាអ្នកនោះជាកូនធម៌សម្តេចក្តី ត្រូវតែប្តឹងសមត្ថកិច្ចឱ្យចាប់ខ្លួន ។ នៅវេលាម៉ោងប្រមាណ១២ថ្ងៃត្រង់ ថ្ងៃទី៦ ឧសភា ដើមបណ្តឹងបានយកមូលប្បទានប័ត្រ (សែក) ដែលមានសាច់ប្រាក់ចំនួន២.៩០០ដុល្លារ និងប្រាក់សុទ្ធ១.០០០ដុល្លារ ទៅប្រគល់ឱ្យឈ្មោះផាន់ ស្រីពៅ នៅភោជនីយដ្ឋានរតនគិរី ក្បែរផ្សារទំនើបសូរិយា រួចក៏បានចេញទៅវិញ ហើយមិនបានប៉ុន្មាននាទីផង សមត្ថកិច្ចបានចាប់ខ្លួនស្ត្រីឈ្មោះផាន់ ស្រីពៅ នាំទៅកាន់ក្រសួងមហាផ្ទៃ ។

នៅក្រសួងមហាផ្ទៃស្ត្រីឈ្មោះផាន់ ស្រីពៅ នៅតែឆ្លើយប្រាប់សមត្ថកិច្ចថា ខ្លួនជាកូនធម៌សម្តេច និងជាទីប្រឹក្សា ចំណែកប្រាក់ចំនួន២ម៉ឺនដុល្លារ ដែលខ្លួនបានយកពីឈ្មោះឌី លីណា កន្លងមក ពិតជាបានយកមែន រីឯសែកដែលមានទឹកប្រាក់២.៩០០ដុល្លារ និងប្រាក់សុទ្ធ ១.០០០ដុល្លារ នេះ ត្រូវសមត្ថកិច្ចដកហូតយកទៅវិញអស់ហើយ ។ ប្រភពព័ត៌មានបានឱ្យដឹងថា ការអួតអាងពីសំណាក់ស្ត្រីឈ្មោះផាន់ ស្រីពៅ ថា ជាកូនធម៌សម្តេចត្រូវបានសួរទៅខុទ្ទកាល័យសម្តេច ហើយឈ្មោះនេះពិតជាគ្មានដូចការអួតអាងនោះទេ ខុទ្ទកាល័យសុំបដិសេធ ។ ដោយការទទួលស្គាល់កំហុស សមត្ថកិច្ចបានតម្រូវឱ្យស្ត្រីឈ្មោះផាន់ ស្រីពៅ យកប្រាក់២ម៉ឺនដុល្លារសងដើមបណ្តឹងវិញ ដែលពេលនោះមានលោកអ៊ុន សុផល ជាមេធាវីដើមបណ្តឹងដឹងឮ ។ ប៉ុន្តែទោះបីជាស្ត្រីឈ្មោះផាន់ ស្រីពៅ យកប្រាក់មកសងដើមបណ្តឹងវិញ ហើយដើមបណ្តឹងបានដកពាក្យបណ្តឹងយា៉ងណាក៏ដោយ ក៏ស្ត្រីឈ្មោះផាន់ ស្រីពៅ នៅជាប់បណ្តឹងអាជ្ញាមួយទៀត ដូច្នេះនគរបាលក្រសួងមហាផ្ទៃបានកសាងសំណុំរឿងបញ្ជូនខ្លួនស្ត្រីជាប់សង្ស័យរូបនេះទៅកាន់សាលាដំបូងរាជធានីភ្នំពេញ នៅថ្ងៃទី៩ ឧសភា ដើម្បីទុកពេលឱ្យតំណាងអយ្យការជាអ្នកសម្រេច៕