ខេត្តកំពត ៖ ជនសង្ស័យប្លន់ទូមាសក្តៅៗនៅផ្សារតានីត្រូវបានចាប់ខ្លួនជាបន្តបន្ទាប់ ដែល២នាក់ចាប់ខ្លួនក្នុងភូមិសាស្ត្រស្រុកកណ្តាលស្ទឹង ខេត្តកណ្តាល និងម្នាក់ទៀតចាប់បានក្នុងភូមិសាស្ត្រខណ្ឌដង្កោ រាជធានីភ្នំពេញ ។ តាមប្រភពព័ត៌មានថា នៅបាត់បក្សពួកម្នាក់ទៀតដែលកំពុងគេចខ្លួន។ ព័ត៌មានជំហានដំបូង និងមិនទាន់យកជាផ្លូវការបាន
ខេត្តកំពត ៖ ជនសង្ស័យប្លន់ទូមាសក្តៅៗនៅផ្សារតានីត្រូវបានចាប់ខ្លួនជាបន្តបន្ទាប់ ដែល២នាក់ចាប់ខ្លួនក្នុងភូមិសាស្ត្រស្រុកកណ្តាលស្ទឹង ខេត្តកណ្តាល និងម្នាក់ទៀតចាប់បានក្នុងភូមិសាស្ត្រខណ្ឌដង្កោ រាជធានីភ្នំពេញ ។ តាមប្រភពព័ត៌មានថា នៅបាត់បក្សពួកម្នាក់ទៀតដែលកំពុងគេចខ្លួន។ ព័ត៌មានជំហានដំបូង និងមិនទាន់យកជាផ្លូវការបាននៅឡើយបានរាយការណ៍ឱ្យដឹងថា ក្រុមជនសង្ស័យដែលត្រូវបានសមត្ថកិច្ចប៉ូលិសចាប់ខ្លួននេះជាក្រុមចោរប្លន់ទូមាសនៅផ្សារតានីកាលពីវេលាម៉ោង១ និង១៥នាទីរសៀល ថ្ងៃទី៨ ឧសភា។ ផ្សារតានីស្ថិតក្នុងឃុំតានី ស្រុកអង្គរជ័យ។
តាមសេចក្តីរាយការណ៍ព័ត៌មានជំហានដំបូងបានឱ្យដឹងថា ក្រុមចោរជិះម៉ូតូ៣គ្រឿង និងមានបក្សពួកទាំងអស់៦នាក់។ មុនពេលធ្វើសកម្មភាពនោះ ម៉ូតូ២គ្រឿងបានបើកមកឈប់ទល់មុខតូបរបស់អាជីវករឈ្មោះហ័រ ម៉ុង ភេទប្រុស អាយុ៧១ឆ្នាំ ហើយប្រាប់ថា ពួកគេចង់ដូរលុយ១០ដុល្លារ ។ ប៉ុន្តែនៅពេលបើកកែបម៉ូតូនោះមិនមែនយកលុយមកដូរទេ បែរជាទាញយកកាំភ្លើងមកភ្ជង់ និងវាយបំបែកទូកញ្ចក់ស្រវាយកលុយ និងគ្រឿងអលង្ការដែលបានដាក់តាំងលក់ ។ ភ្លាមៗនោះផងដែរ ទូមាស២ទៀតនៅក្បែរគ្នាក៏ត្រូវបក្សពួកធ្វើសកម្មភាពភ្ជង់ប្លន់ដូចគ្នា។ អាជីវករដែលរងគ្រោះដោយអំពើប្លន់ទាំងកណ្តាលថ្ងៃនេះមាន ១-ឈ្មោះនួន វិចិត្រ បានបាត់បង់មាសប្លាទីន៣តម្លឹង លុយអាមេរិក៧០០ដុល្លារ និងលុយខ្មែរ២០លានរៀល, ២-ឈ្មោះហ័រ ម៉ុង បាត់បង់មាស៣តម្លឹង លុយខ្មែរ១០លានរៀល និងលុយអាមេរិក២.០០០ដុល្លារ និង៣-ឈ្មោះកែវ ភិរុណ បាត់បង់៥លានរៀល។ សូមបញ្ជាក់ថា ទូមាសនេះមិនមែនស្ថិតនៅក្នុងផ្សារទេ គឺជាការដាក់ទូប្រកបរបរលក់ និងដូរប្រាក់មុខលំនៅឋានរបស់ខ្លួននៅជុំវិញផ្សារ។
ក្រោយពីធ្វើការឆក់ប្លន់ហើយ ក្រុមចោរក៏បានធ្វើការបាញ់រះគំរាមជាច្រើនគ្រាប់ផងដែរ រួចនាំគ្នាជិះម៉ូតូគេចខ្លួនមកទិសខាងជើងតាមផ្លូវជាតិលេខ៣១។ ការតាមប្រមាញ់យ៉ាងប្រកៀកប្រកិតភ្លាមៗ ព័ត៌មានពីការចាប់ខ្លួនជនសង្ស័យត្រូវរាយការណ៍ថា ក្រុមជនសង្ស័យបានដូរមកជិះរថយន្តកាមរីគូទហើម ពណ៌ឈាមជ្រូក ដែលការប្តូរមកជិះរថយន្តនេះមិនដឹងថា ក្រុមជនសង្ស័យប្តូរទៅចំណុចណាទេ។ តែបើតាមការផ្តល់ព័ត៌មានពីស្រុកកណ្តាលស្ទឹងបានឱ្យដឹងថា ក្រុមជនសង្ស័យ៣នាក់បានប្តូររថយន្តមួយឈុតទៀត ក្នុងគោលបំណងបង្វែងដានសមត្ថកិច្ចដែលកំពុងតាមប្រមាញ់ ដោយបានប្តូរពីរថយន្តកាមរីគូទហើម ពណ៌ឈាមជ្រូក នៅចំណុចវត្តបិទមាស ក្នុងឃុំព្រែកស្លែង ហើយប្លុងរថយន្តនោះចោលក្នុងវត្ត ឡើងជិះរថយន្តម៉ាកកូរ៉ូឡា១គ្រឿងទៀតជិះគេចខ្លួន។ ក្រុមជនសង្ស័យដែលមានគ្នាចំនួន៤នាក់គិតរហូតមកដល់ម៉ោង៥និង៣០នាទីល្ងាច ថ្ងៃដដែល តាមប្រភពក្រៅផ្លូវការឱ្យដឹងថា ចាប់បាន៣នាក់ហើយ ដែល២នាក់ចាប់បាននៅស្រុកកណ្តាលស្ទឹង ខេត្តកណ្តាល និងម្នាក់ចាប់ខ្លួននៅខណ្ឌដង្កោ រាជធានីភ្នំពេញ។
ជាមួយនឹងការចាប់ខ្លួនជនសង្ស័យ២នាក់នៅស្រុកកណ្តាលស្ទឹង សមត្ថកិច្ចមិនបានផ្តល់ព័ត៌មានណាមួយឱ្យដឹងនៅឡើយទេ តែបើតាមប្រភពក្រៅផ្លូវការខ្លះៗបានឱ្យដឹងថា បន្ទាប់ពីប្តូររថយន្ត ក្រុមជនសង្ស័យបានបើកគេចតាមផ្លូវលេខ២០B ជាផ្លូវឆ្ពោះទៅសាលាស្រុកកណ្តាលស្ទឹង បណ្តាលឱ្យរថយន្តក្រឡាប់ចូលប្រឡាយដែលគ្មានទឹកនៅភូមិក្បាលសេះ ឃុំគោកត្រប់ ស្រុកកណ្តាលស្ទឹង និងបានចាប់ខ្លួនម្នាក់ឈ្មោះហៀម រិន អាយុ៥០ឆ្នាំ ដែលមានរបួសដោយសារក្រឡាប់រថយន្ត។ ឯម្នាក់ទៀតក៏ត្រូវបានចាប់ខ្លួននៅប្រឡាយលេខ៦៨ ក្នុងភូមិតាំងក្រូច សង្កាត់ទៀន ខណ្ឌដង្កោ រាជធានីភ្នំពេញ ដោយត្រូវបានប្រជាពលរដ្ឋចាប់ឱ្យសមត្ថកិច្ចស្រុកកណ្តាលស្ទឹង ឈ្មោះគឹម ចន្តា ហៅ វាសនា យ៉ាងប្រកិត។ ជនសង្ស័យម្នាក់ទៀតក៏ត្រូវ ចាប់ខ្លួននៅខណ្ឌដង្កោ ឈ្មោះជា ឈុនហឺ ហៅ ស៊ីន សុភាព។
ទាក់ទិននឹងចំនួនក្រុមជនសង្ស័យដែលជិះម៉ូតូ៣គ្រឿងមានគ្នា៦នាក់នោះ តាមប្រភពខ្លះថា ៣នាក់ទៀតបានជិះគេចចូលទៅកាន់ភូមិសាស្ត្រស្រុកឈូក។ ចំណែកការរឹបអូសបានមាស ឬប្រាក់កាសដែលប្លន់បានវិញប៉ុន្មាននោះមិនត្រូវបានសមត្ថកិច្ចឱ្យដឹងនៅឡើយទេ។ ព័ត៌មានខាងលើគ្រាន់តែជាព័ត៌មានជំហានដំបូងដែលសមត្ថកិច្ចមិនទាន់បានផ្តល់ជាផ្លូវការនៅឡើយជុំវិញការបង្ក្រាបក្រុមជនសង្ស័យប្លន់ទូមាសក្តៅៗនេះ។ ទោះបីជាបែបណា អាវុធដែលបានដកហូតមានកាំភ្លើងអាកាស្វាយបត់២ដើម និងកាំភ្លើងខ្លី២ដើម កា៥៤ និងកា៥៩៕
(នាយកឺប+វណ្ណៈ)
ចែករំលែកព័តមាននេះ