- ភ្នំពេញ
រាជធានីភ្នំពេញ ៖ យុវជន និងយុវតីបានក្លាយជាកម្លាំងដ៏សំខាន់នៅក្នុងការបោះឆ្នោត នាថ្ងៃទី២៣ ខែកក្កដាខាងមុខនេះ ដោយសារតែពួកគេតំណាងអោយជាងពាក់កណ្តាលនៃចំនួនមនុស្ស សរុបដែលមានសិទ្ធិបោះឆ្នោត ។ គណបក្សកាន់អំណាច…
រាជធានីភ្នំពេញ ៖ យុវជន និងយុវតីបានក្លាយជាកម្លាំងដ៏សំខាន់នៅក្នុងការបោះឆ្នោត នាថ្ងៃទី២៣ ខែកក្កដាខាងមុខនេះ ដោយសារតែពួកគេតំណាងអោយជាងពាក់កណ្តាលនៃចំនួនមនុស្ស សរុបដែលមានសិទ្ធិបោះឆ្នោត ។ គណបក្សកាន់អំណាច គឺគណបក្សប្រជាជនកម្ពុជាបានមើលឃើញពីសារសំខាន់របស់យុវជន និងយុវតីកម្ពុជាក្នុងការបោះឆ្នោតខាងមុខនេះដោយសារតែពួកគេមានចំនួនច្រើនជាងគេសម្រាប់ការបោះឆ្នោតខាងមុខ ។
បញ្ជីបោះឆ្នោត ឆ្នាំ២០២២ ដែលប្រើសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ នេះ គឺមានអ្នកបោះឆ្នោតសរុប ៩៧១០ ៦៥៥នាក់ ។ ក្នុងនោះមានស្ត្រី ៥ ១៦១ ៩០៩នាក់ ។ ក្នុងចំណោមអ្នកបោះឆ្នោតទាំងជាង៩លាន ៧១ម៉ឺននាក់នេះ គឺមានអ្នកបោះឆ្នោតជាយុវជនជាងពាក់កណ្តាល ។
សកម្មភាពជាច្រើនត្រូវគណបក្សកាន់អំណាច ឬរដ្ឋាភិបាលដឹកនាំដោយគណបក្សកាន់អំណាចបានធ្វើឡើង ដើម្បីជាប្រយោជន៍ដល់យុវជន និងយុវតី ដើម្បីអោយពួកគេយល់ថា បោះឆ្នោតជូនគណបក្សប្រជាជនកម្ពុជា គឺបោះឆ្នោតសម្រាប់អនាគតខ្លួនឯង និងសម្រាប់ ប្រទេសជាតិផងដែរ ។
សម្តេចតេជោ ហ៊ុនសែន នាយករដ្ឋមន្ត្រី និងជាប្រធានគណបក្សប្រជាជនកម្ពុជាបានប្រកាសអំពីគម្រោងបណ្តុះបណ្តាលការងារជូនដល់យុវជន និងយុវតីក្រីក្រចំនួន១,៥ លាននាក់ ។
ទន្ទឹមនឹងនោះ សម្តេចតេជោ ក៏កំពុងបានជួបកម្មកររោងចក្រប្រមាណជា ២ម៉ឺននាក់ស្ទើររាល់ថ្ងៃ ដើម្បីបានដឹងពីការលំបាក និងរកដំណោះស្រាយជួយដល់ពួកគេ ។ ទន្ទឹមនោះសម្តេចក៏បានសន្យាផងដែរថាបន្ទាប់ពីការបោះឆ្នោតហើយ សម្តេចនឹងបន្តជួបកម្មករប្រមាណ២ សែននាក់ទៀត ។ ជាមួយគ្នានោះយុវជន និងយុវតីក៏បានត្រូវផ្តល់ឱកាសផងដែរអោយចូលរួមការងារស្ម័គ្រចិត្ត ដើម្បីជួយដល់សង្គម និងលើកមុខមាត់ប្រទេសកម្ពុជា ។ គណបក្សប្រជាជនក៏បានកសាងបណ្តាញយុវជនយ៉ាងរឹងមាំផងដែរ ។
សហភាពសហព័ន្ធយុវជនកម្ពុជារបស់លោក ហ៊ុន ម៉ានី កូនប្រុសរបស់សម្តេចតេជោ ហ៊ុន សែន ក៏ដើរតួនាទីយ៉ាងសំខាន់ នៅក្នុងការប្រមូល ផ្តុំយុវជន ដើម្បីអោយពួកគេចូលរួមដល់ការងារស្ម័គ្រចិត្តក៏ដូចជាការងារលើកកម្ពស់មុខមាត់ប្រទេសកម្ពុជា ។ ក្រុមយុវជននេះ មានបណ្តាញដឹកនាំតាំងពីថ្នាក់ជាតិតាមក្រសួងស្ថាប័នរដ្ឋ និងឯកជនរហូតដល់ថ្នាក់មូលដ្ឋាននៅតាមភូមិ ។
ក្រុមយុវជនជាច្រើនទៀតក៏បានចូលរួមជាមួយក្រុមយុវជនច្រើនក្រុមទៀតដែលដឹកនាំដោយកូនៗរបស់ថ្នាក់ដឹកនាំគណបក្សប្រជាជនកម្ពុជា ។ យុវជនទាំងស្រីទាំងប្រុស មានឱកាសរួមកម្លាំងគ្នាធ្វើការងារសង្គម ។ ក្នុងនោះ គ្រូពេទ្យវ័យក្មេងក៏បានចូលរួមក្នុងអង្គការសមាគម ដែលមានច្រើនក្រុមដែរដូចជា គ្រូពេទ្យធីតា រួមទាំងក្រុមគ្រូពេទ្យរបស់កូនៗ ថ្នាក់ដឹកនាំគណបក្សប្រជាជនកម្ពុជាជាច្រើន ក្រុមផ្សេងទៀត ។
ជាមួយនឹងការយកចិត្តទុកដាក់ខ្លាំងដល់យុវជន និងយុវតីកម្ពុជា គេជឿថា គណបក្សកាន់អំណាច ឬគណបក្សប្រជាជនកម្ពុជានឹងមានឥទ្ធិពលខ្លាំងក្នុងការដណ្តើមបានការគាំទ្រពីពួកគេនៅក្នុងការបោះឆ្នោតនាខែក្រោយនេះ ។ ដូច្នេះ វាស្ទើរតែគ្មានអ្វីស្រពេចស្រពិលទេថា គណបក្សប្រជាជនកម្ពុជានឹងដណ្តើមបានជ័យជំនះភ្លូកទឹកភ្លកដីនៅក្នុងការបោះឆ្នោត ថ្ងៃទី២៣ ខែកក្កដា ឆ្នាំ២០២៣ ខាងមុខនេះ ។
បើពិនិត្យមើលលទ្ធផលនៃការបោះឆ្នោតវិញ គណបក្សប្រជាជនកម្ពុជា បានកើនអាសនៈនៅរដ្ឋសភាជាបន្តបន្ទាប់ ។ ក្នុងនោះការបោះឆ្នោត នៅឆ្នាំ១៩៩៣ គណបក្សប្រជាជនកម្ពុជាទទួលបាន ៥១អាសនៈ ក្នុងចំណោមអាសនៈរដ្ឋសភាសរុប ១២០អាសនៈ ។ ឆ្នាំ១៩៩៨ ទទួលបាន ៦៤អាសនៈក្នុងចំណោម១២២អាសនៈ ។ ឆ្នាំ២០០៣ គណបក្សប្រជាជនកម្ពុជាទទួលបាន ៧៣អាសនៈ ក្នុងចំណោម១២៣អាសនៈ ។
ការបោះឆ្នោត នៅឆ្នាំ២០០៨ គណបក្សប្រជាជនកម្ពុជាទទួលបាន ៩០អាសនៈក្នុងចំណោម១២៣អាសនៈ ។ ឆ្នាំ២០១៣ គណបក្សប្រជាជនកម្ពុជាទទួលបាន៦៨អាសនៈ ក្នុងចំណោម១២៣អាសនៈ ។ រីឯការបោះឆ្នោត ឆ្នាំ២០១៨ គណបក្សប្រជាជនកម្ពុជាទទួលបាន ១២៥អាសនៈ ក្នុងចំណោមអាសនៈរដ្ឋសភាសរុប១២៥អាសនៈ ។
ដូច្នេះ គេរំពឹងថា ក្នុងនោះការបោះឆ្នោតសកលដែលមាន១៨គណបក្សចូលរួមនេះលទ្ធផល ក៏នឹងមិនខុសពីការបោះឆ្នោត កាលពីឆ្នាំ២០១៨ នោះទេ ដោយសារតែគណបក្ស១៧ផ្សេងទៀត ហាក់ដូចជាមិនមានធនធានមនុស្ស និងធនធានផ្សេងទៀត ដើម្បីប្រកួតប្រជែង ជាមួយគណបក្សប្រជាជនកម្ពុជាឡើយ ។ គណបក្សប្រជាជនកម្ពុជា ទំនងជាអាចទទួលបានអាសនៈនៅរដ្ឋសភាស្ទើរទាំងអស់នៅក្នុងការបោះឆ្នោតថ្ងៃទី២៣ ខែកក្កដា ឆ្នាំ២០២៣ ៕
ចែករំលែកព័តមាននេះ