រាជធានីភ្នំពេញ ៖ ខណៈការបោះឆ្នោតជ្រើសរើសតាំងអ្នកតំណាងរាស្ត្រអាណត្តិទី៧ នៃរដ្ឋសភាកាន់តែខិតជិតមកដល់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងថា ក្រោយថ្ងៃបោះឆ្នោតខាងមុខនេះ…
រាជធានីភ្នំពេញ ៖ ខណៈការបោះឆ្នោតជ្រើសរើសតាំងអ្នកតំណាងរាស្ត្រអាណត្តិទី៧ នៃរដ្ឋសភាកាន់តែខិតជិតមកដល់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងថា ក្រោយថ្ងៃបោះឆ្នោតខាងមុខនេះ នឹងមិនមានការបោះឆ្នោតឡើងវិញ នៅកន្លែងណាមួយនោះឡើយ ហើយរដ្ឋាភិបាលនឹងចូលស្បថកាន់តែនៅថ្ងៃទី២៩ សីហា ។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ «អគារសាលាយុត្ដិធម្ម» របស់ក្រសួងយុត្តិធម៌ ដែលមានទីតាំងស្ថិតនៅសង្កាត់ព្រែកលៀប ខ័ណ្ឌជ្រោយចង្វារ រាជធានីភ្នំពេញ នាថ្ងៃទី២៦ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានបញ្ជាក់ថា «ក្នុងករណីបោះឆ្នោតនៃថ្ងៃទី២៣ ខែកក្កដា ឆ្នាំ២០២៣ ខាងមុខនេះមិនមានការបោះឆ្នោតឡើងវិញនៅកន្លែងណាមួយទេ» ។
សថម្តេចតេជោ មានប្រសាសន៍បន្តថា «ដំណើរការដោះស្រាយបញ្ហាដោយគណៈកម្មាធិការជាតិរៀបចំការបោះឆ្នោត នឹងរហូតទៅដល់ដំណាក់កាលនៃការដោះស្រាយរបស់ក្រុមប្រឹក្សាធម្មនុញ្ញបកត្រឡប់មកវិញ គឺប្រកាសលទ្ធផលផ្លូវការ និងបេក្ខជនជាប់ឆ្នោត អញ្ចឹងប្រើពេលវេលាខ្លីទេ» ។
សម្ដេចតេជោ នាយករដ្ឋមន្ត្រីកម្ពុជាបញ្ជាក់ថា តាមការគ្រោងទុករដ្ឋសភាព នឹងបើកកិច្ចប្រជុំលើកដំបូង ថ្ងៃទី២៨ ខែសីហាក្រោមព្រះអធិបតីព្រះមហាក្សត្រនៃកម្ពុជា ។ បន្ទាប់មក ថ្ងៃទី២៩ ខែសីហា បើកកិច្ចប្រជុំ និងស្បថចូលកាន់តំណែង របស់ក្បាលម៉ាស៊ីនរាជរដ្ឋាភិបាល។
សម្ដេចតេជោ ហ៊ុន សែន បន្ថែមទៀតថា នេះជាប្រតិទិនសម្រាប់ការបង្កើតរដ្ឋាភិបាលថ្មីក្រោយការបោះឆ្នោតនាពេលខាងមុខនេះ ។ ក្នុងករណីគណបក្សប្រជាជនកម្ពុជាឈ្នះបោះឆ្នោតនោះ សម្ដេចមានភារកិច្ចនឹងរៀបចំបែបនេះ ។ ប៉ុន្ដែបើគណបក្សដទៃឈ្នះឆ្នោតវិញទុកឲ្យ គណបក្សឈ្នះឆ្នោតនោះរៀបចំដោយខ្លួនឯងចុះ ។
សូមជម្រាបថា ការបោះឆ្នោតជ្រើសតាំងអ្នកអ្នកតំណាងរាស្ត្រអាណត្តិទី៧ នៃប្រព្រឹត្តិទៅនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ខណៈយុទ្ធនាការបោះឆ្នោតនឹងចាប់ផ្តើមពីថ្ងៃ១ ដល់២១ កក្កដា ឆ្នាំ២០២៣ ។ ការបោះឆ្នោតនេះដែលមានគណបក្សនយោបាយចំនួន១៨ បានចុះបញ្ជីនៅគណៈកម្មាធិការជាតិរៀបចំការបោះឆ្នោត ដើម្បីធ្វើការប្រជែងសន្លឹកឆ្នោត ។ លេខរៀងគណបក្សនយោបាយក្នុងសន្លឹកឆ្នោតមាន១ ៖ សំបុកឃ្មុំ ២ ៖ គណបក្សខ្មែរតែមួយ ៣៖ សញ្ជាតិកម្ពុជា ៤៖ ខ្មែររួបរួមជាតិ ៥ ៖ កម្លាំងប្រជាធិបតេយ្យ ៦ ៖ កសិករ ៧៖ ស្ត្រីដើម្បីស្ត្រី ៨៖ គណបក្សខ្មែរឈប់ ៩៖ ហ្វ៊ុនស៊ិនប៉ិច ១០ ៖ ធម្មាធិបតេយ្យ ១១ ៖ គណបក្សមូលដ្ឋាន ១២ ៖ បំណងប្រជាពលរដ្ឋ ១៣៖ គណបក្សខ្មែរអភិវឌ្ឍន៍សេដ្ឋកិច្ច ១៤៖ ឯកភាពជាតិខ្មែរ ១៥ ៖ ខ្មែរអភិរក្ស ១៦ ៖ យុវជនកម្ពុជា ១៧៖ ជនជាតិដើមប្រជាធិបេតយ្យ ១៨៖ គណបក្សប្រជាជនកម្ពុជា ។
យ៉ាងណាក្តី បើតាមលើកពីមហាជនថា សម្រាប់ការបោះឆ្នោតខាងមុខនេះសោត គណបក្សប្រជាជនកម្ពុជានឹងបន្តទទួលឈ្នះក្នុងការបោះឆ្នោតដដែល៕
ចែករំលែកព័តមាននេះ