ADផ្ទាំងផ្សព្វផ្សាយពាណិជ្ជកម្ម

វៀតណាមថ្លែងថាការបា.ញ់ប្រហា.រនៅដាក់ឡាក់មានជាប់ពាក់ព័ន្ធនឹងក្រុមភេរវ.កម្មនៅអាមេរិក

2 ឆ្នាំ មុន

២៣ ខែ មិថុនា ឆ្នាំ ២០២៣ ម៉ោង ០៤:២៩

ក្រុមប្រដាប់អាវុធដែលបាញ់ប្រហារទៅលើសាលាឃុំ២កន្លែងនៃខេត្តដាក់ឡាក់កាលពីដើមខែមិថុនានោះ ពួកគេមានទំនាក់ទំនងជាមួយក្រុមភេរវកម្មដែលមានទីស្នាក់ការធំនៅប្រទេសអាមេរិក។ នេះបើយោងតាមការប្រកាសរបស់នាយកដ្ឋានសន្តិសុខមាតុភូមិវៀតណាម។ ឧត្ដមសេនីយ៍ផាំង៉ុកវៀត ជាប្រធាននាយកដ្ឋានសន្តិសុខមាតុភូមិនៃក្រសួងសន្តិសុខសាធារណៈ ថ្លែងថាពួកនេះធ្លាប់ជាប់ពាក់ព័ន្ធនឹងសកម្មភាពបាញ់ប្រហារទៅលើការិយាល័យគណៈកម្មការប្រជាជនឃុំអៀធៀវ (Ea Tieu) និងឃុំអៀខ្ទួរ (Ea…

លោកផាំង៉ុកវៀត (Pham Ngoc Viet) ប្រធាននាយកដ្ឋានសន្តិសុខមាតុភូមិ នៃក្រសួងសន្តិសុខសាធារណៈវៀតណាម ថ្លែងនៅញូយ៉ក

បុគ្គលម្នាក់នេះទទួលបេសកកម្មជ្រៀតចូលក្នុងប្រទេសវៀតណាមជាសម្ងាត់ និងរៀបចំផែនការបាញ់ប្រហារ។ នេះជាអ្វីដែលឧត្ដមសេនីយ៍ផាំង៉ុកវៀតថ្លែងប្រាប់អ្នកតំណាងអង្គការសហប្រជាជាតិនៅទីក្រុងញូយ៉ក។ លោកថ្លែងថាការបាញ់ប្រហារកាលពីថ្ងៃទី១១ ខែមិថុនា ដែលបណ្ដាលឱ្យស្លាប់មនុស្ស១១នាក់ របួស២នាក់ និងចាប់មនុស្ស៣នាក់ជាចំណាប់ខ្មាំង ច្បាស់ណាស់ជាអំពើភេរវកម្មដែលមានអង្គការចាត់តាំង។

ប្រទេសវៀតណាមពុំធ្លាប់ទទួលរងការវាយប្រហារដោយអំពើភេរវកម្មពីអង្គការចាត់តាំងជាអន្តរជាតិទេពីមុនមក។ ប៉ុន្តែលោកផាំង៉ុកវៀតយល់ថាឥឡូវនេះ វៀតណាមកំពុងប្រឈមនឹងបញ្ហា១ចំនួនដែលគំរាមកំហែងចំពោះសន្តិសុខជាតិ។ ទី១ វៀតណាមមានចំណុច១ចំនួនដែលអាចជាគោលដៅរបស់ពួកភេរវកម្ម។ ឧទាហរណ៍ដូចជាអគារនៃអ្នកការទូតបរទេស។

ទី២ ក្រុមអាយស៊ីសអាចនឹងផ្លាស់ប្ដូរទីតាំងពីតំបន់មជ្ឈិមបូព៌ាទៅតំបន់អាស៊ីអាគ្នេយ៍វិញម្ដង។ ទី៣ ក្រុមភេរវកម្មឆ្លៀតប្រើប្រាស់បច្ចេកវិទ្យា និងបណ្ដាញសង្គមដើម្បីសាបព្រោះមនោគមន៍វិជ្ជាជ្រុលនិយមរបស់ពួកគេនៅទូទាំងពិភពលោក។ ទង្វើនេះធ្វើឱ្យប្រទេសវៀតណាមងាយនឹងរងគ្រោះបំផុត ព្រោះវៀតណាមមានអ្នកប្រើប្រាស់អ៊ីនធឺណិតច្រើន។

ទី៤ ក្រុមប្រតិកិរិយាវៀតណាម និងក្រុមដទៃទៀតដែលជ្រួតជ្រាបដោយមនោគមន៍វិជ្ជាជ្រុលនិយមកំពុងឆ្លៀតឱកាសដែលវៀតណាមមានបញ្ហាពាក់ព័ន្ធនឹងជនជាតិភាគតិច និងជំនឿសាសនា។ ពួកគេបណ្ដុះបណ្ដាលក្រុមទាំងនេះដើម្បីប្រព្រឹត្តអំពើភេរវកម្មនៅវៀតណាម។ នៅក្នុងហេតុផលនេះ, វៀតណាមសូមថ្កោលទោសជាទម្ងន់ចំពោះរាល់បុគ្គលទាំងឡាយ និងអង្គការចាត់ទាំងឡាយដែលផ្ដល់ទីជម្រក, គាំទ្រ និងបញ្ជាឱ្យបាញ់ប្រហារនៅខេត្តដាក់ឡាក់។

ប្រទេសវៀតណាមសូមអំពាវនាវទៅបណ្ដាប្រទេស និងអង្គការអន្តរជាតិទាំងឡាយគាំទ្រ និងសហការជាមួយក្រុមអ្នកស៊ើបអង្កេតរបស់វៀតណាមដើម្បីវែកមុខអំពើភេរវកម្មនេះ។ លោកផាំង៉ុកវៀតក៏បានស្នើសុំទៅគ្រប់ស្ថាប័នពាក់ព័ន្ធទាំងអស់រួបរួមគ្នាដើម្បីទប់ស្កាត់ និងប្រយុទ្ធប្រឆាំងនឹងសកម្មភាពបែបនេះនាពេលអនាគត។ រហូតមកដល់ពេលនេះ, វៀតណាមចាប់ខ្លួនជនសង្ស័យ៧៤នាក់។ នៅក្នុងចំណោមនោះ, មេខ្លោងនៅពីក្រោយការបាញ់ប្រហារនោះត្រូវបានចាប់ខ្លួនមួយចំនួនធំ៕

ប្រភព៖ Vietnam Express
https://e.vnexpress.net/news/news/armed-group-committing-dak-lak-attacks-have-connections-with-us-based-terrorists-4620658.html