ខេត្តបាត់ដំបង៖ សត្វគោមួយក្បាលដែលម្ចាស់ទើបដឹកទៅចងឱ្យស៊ីស្មៅ ត្រូវរន្ទះបាញ់ងាប់នៅនឹងកន្លែងភ្លាមៗ កាលពីវេលាម៉ោង១និង៣០នាទីរសៀលថ្ងៃទី២១ មិថុនា នៅចំណុចភូមិតាកុក ឃុំនរា ស្រុកសង្កែ។ នេះបើតាម លោក យូម រ៉ាវុធ នាយប៉ុស្ដ៍នគរបាល ឃុំនរា បានរាយការណ៍។
លោក យូម រ៉ាវុធ បានប្រាប់ថា ម្ចាស់គោឈ្មោះ ម៉ាន ឆវី ស្រីអាយុ៦២ឆ្នាំ នៅភូមិ ឃុំ កើតហេតុ។ លោកបានស្រង់សំដីម្ចាស់គោថា មុនពេលមេឃភ្លៀង គាត់បានដឹកគោយកទៅចងឱ្យស៊ីស្មៅនៅចំណុចកើតហេតុ តែបន្តិចក្រោយស្រាប់តែមេឃធ្លាក់ភ្លៀង លាយឡំផ្គររន្ទះយ៉ាងខ្លាំងក្លាផង ក៏បាញ់ចំគោគាត់បណ្ដាលឱ្យងាប់នៅនឹងកន្លែងតែម្ដង។
បើតាមសេចក្ដីរាយការណ៍នានា បានឱ្យដឹងថា នៅរសៀលថ្ងៃទី ២១ មិថុនា នេះមានភ្លៀងធ្លាក់ខ្លាំង ហើយក៏ំមានលាយឡំទៅដោយផ្គររន្ទះផង។ ប៉ុន្តែមិនទាន់មានសេចក្ដីរាយការណ៏ពីតាមបណ្ដាស្រុកដទៃទៀត អំពីគ្រោះមហន្តរាយដោយបាតុភូតធម្មជាតិដូចខាងនេះទេ។
យ៉ាងណា នេះគ្រាន់តែជាព័ត៌មានបឋមប៉ុណ្ណោះ ដែលមានករណីគ្រោះថ្នាក់ដោយបាតុភូតធម្មជាតិ(រន្ទះបាញគោងាប់)។ កាលពីរសៀលថ្ងៃទី២០ មិថុនា ក៏មានរន្ទះបាញ់សត្វគោងាប់អស់ចំនួនពីរក្បាលផងដែរ នៅភូមិសំរោង ឃុំស្នឹង ស្រុកបាណន់។ ដូច្នេះ ប្រជាពលរដ្ឋគួតែមានការប្រុងប្រយ័ត្នចំពោះគ្រោះធម្មជាតិនេះ៕
ចែករំលែកព័តមាននេះ