រាជធានីភ្នំពេញ ៖ ជនបីនាក់ដែលជិះម៉ូតូទំនើបបីគ្រឿងពីជើងទៅខាងត្បូង លុះដល់ស្តុបពេទ្យចិនបានឈ្លោះប្រកែកគ្នាជាមួយអ្នកបើករ៉ឺម៉កម៉ូតូ។ ពេលជិះហួសស្តុបប្រមាណ៤០ម៉ែត្រស្រាប់តែពួកគេឈប់ម៉ូតូ ហើយនាំគ្នាចាប់ក្របួចកអាវ និងព្រួតវាយអ្នកបើករ៉ឺម៉កម៉ូតូហើមមុខហើមមាត់នៅវេលាម៉ោង៩ និង៣០នាទីយប់ ថ្ងៃទី៥ ឧសភា នៅតាម
រាជធានីភ្នំពេញ ៖ ជនបីនាក់ដែលជិះម៉ូតូទំនើបបីគ្រឿងពីជើងទៅខាងត្បូង លុះដល់ស្តុបពេទ្យចិនបានឈ្លោះប្រកែកគ្នាជាមួយអ្នកបើករ៉ឺម៉កម៉ូតូ។ ពេលជិះហួសស្តុបប្រមាណ៤០ម៉ែត្រស្រាប់តែពួកគេឈប់ម៉ូតូ ហើយនាំគ្នាចាប់ក្របួចកអាវ និងព្រួតវាយអ្នកបើករ៉ឺម៉កម៉ូតូហើមមុខហើមមាត់នៅវេលាម៉ោង៩ និង៣០នាទីយប់ ថ្ងៃទី៥ ឧសភា នៅតាមបណ្តោយមហាវិថីព្រះមុនីវង្ស ស្ថិតក្នុងសង្កាត់បឹងកេងកងទី២ ខណ្ឌចំការមន ជាប់របងវិទ្យាល័យព្រះយុគន្ធរ។
បុរសបើករ៉ឺម៉កម៉ូតូរៀបរាប់ថា ពេលគាត់បើករ៉ឺម៉កម៉ូតូតាមផ្លូវស្រាប់តែមានបុរសបីនាក់ជិះម៉ូតូបីគ្រឿងមកពីក្រោយ ហើយងាកមើលមុខគាត់ៗក៏មើលមុខវិញទើបបង្កជាជម្លោះ ហើយពួកគេព្រួតវាយតប់គាត់តែម្តង។ ដោយសារតែការព្រួតវាយដោយកំហឹងនោះគាត់បានស្រែកឱ្យគេជួយ។ ក្នុងចំណោមបុរសទាំងបីនាក់ដែលជិះម៉ូតូទំនើបបីគ្រឿងនោះមានម្នាក់អះអាងខ្លួនជាឯកឧត្តម និងថាខ្លួនគ្រាន់តែចូលទៅជួយឃាត់នោះត្រូវអ្នកបើករ៉ឺម៉កម៉ូតូវាយជាំភ្នែកម្ខាង។
អ្នកធ្វើដំណើរតាមផ្លូវឃើញហេតុការណ៍នេះបានឈប់ចោមរោមមើល ហើយនិយាយថា ភាគីទាំងពីរសុទ្ធតែស្រវឹងដូចគ្នា។ ប៉ូលិសចរាចរប្រចាំគោលដៅស្តុបពេទ្យចិននិយាយថា ខណៈដែលម៉ូតូបីគ្រឿង និងរ៉ឺម៉កម៉ូតូនោះជិះដល់ស្តុបពេទ្យចិនបានឮសូរពួកគេប្រកែកគ្នា លុះពេលជិះហួសទៅដល់ក្បែររបងវិទ្យាល័យព្រះយុគន្ធរស្រាប់តែឃើញវាយគ្នាតែម្តង។ ខណៈនោះឮសូរសម្លេងស្រែកថា «បីនាក់ព្រួតវាយខ្ញុំម្នាក់ស្លាប់ហើយជួយផង»។ ឮដូច្នេះប៉ូលិសចរាចរចូលទៅជួយអន្តរាគមន៍ តែភាគីទាំងពីរនៅតែជជែកគ្នាយកត្រូវរៀងខ្លួន ដូច្នេះហើយក៏ហៅប៉ូលិសប៉ុស្តិ៍បឹងកេងកងទី២ឱ្យទៅដោះស្រាយ។
ខណៈពេលប៉ូលិសប៉ុស្តិ៍បឹងកេងកងទី២ទៅដល់សម្របសម្រួលរហូតដល់ម៉ោង១១ និង៣០នាទីយប់ ភាគីទាំងពីរនៅតែនិយាយមិនចុះសំរុងគ្នាទៀត ដូច្នេះប៉ូលិសឱ្យភាគីទាំងពីរត្រឡប់ទៅលំនៅឋានវិញ ដោយទុកម៉ូតូ និងរ៉ឺម៉កម៉ូតូនៅប៉ុស្តិ៍ចាំដោះស្រាយនៅព្រឹកថ្ងៃទី៦ ឧសភា បន្តទៀត ៕
ចែករំលែកព័តមាននេះ