រាជធានីភ្នំពេញ ៖ ថ្លែងជាសាធារណៈសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងឱ្យដឹងថា តាមរយៈការសិក្សានាពេលកន្លងទៅ កម្ពុជាមានប្រេងច្រើនកន្លែង តែមិនទាន់ខួងយកមកប្រើប្រាស់…
រាជធានីភ្នំពេញ ៖ ថ្លែងជាសាធារណៈសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងឱ្យដឹងថា តាមរយៈការសិក្សានាពេលកន្លងទៅ កម្ពុជាមានប្រេងច្រើនកន្លែង តែមិនទាន់ខួងយកមកប្រើប្រាស់ ខណៈសម្ដេចសង្ឃឹមថា ថ្ងៃអនាគតកម្ពុជានឹងមានប្រេងប្រើ ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការរោងចក្រប្រព្រឹត្តកម្មទឹកស្អាតបាក់ខែង ស្ថិតនៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ នាព្រឹកថ្ងៃទី១៩ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន លើកឡើងថា កម្ពុជាមានប្រេងនៅតំបន់ទន្លេសាប និងសមុទ្រ មានទាំងនៅក្នុងដី ព្រមទាំងក្នុងទឹក ។
សម្ដេចនាយករដ្ឋមន្ដ្រីបញ្ជាក់ថា «ប្រទេសខ្មែរអត់ទាន់បានខួងយកប្រេងនៅក្រោមដីទេ ។ ប្រទេសខ្លះ គេខួងប្រេងក្រោមបាតសមុទ្រ ក្រោមដីយកមកប្រើប្រាស់លក់ឱ្យយើងទៀតរាល់ថ្ងៃនេះ ។ ប៉ុន្ដែយើងមិនទាន់បានខួងយកប្រេងទេ ខួងបានម្ដងគេថា តិចពេកក្រុមហ៊ុនក្ស័យធនរត់ចោលយើងទម្រាំយកបានវិញខំបូមប្រេងចេញមក ក្រុមហ៊ុនក្ស័យធនទៅដោយសារបានចំនួនតិច» ។
ជាមួយគ្នានោះដែរ សម្ដេច នាយករដ្ឋមន្ដ្រីបន្ដថា «ប៉ុន្ដែយើងក៏មានការសិក្សាបន្ដសង្ឃឹមថា អនាគតកម្ពុជាយើងអាចនឹងមានប្រេង ហើយប្រេងនៅតំបន់ទន្លេសាបក៏អាចមានក្នុងដីគោកក៏អាចមានក្នុងទឹកក៏អាចមានគ្រាន់តែយើងមិនទាន់សិក្សាអស់» ។
សូមជម្រាបថា កន្លងមកក្រសួងរ៉ែ និងថាមពលធ្លាប់បានអះអាងថា មានក្រុមហ៊ុនមកពីបណ្តាប្រទេសមួយចំនួនបានចាប់អារម្មណ៍ និងសម្លឹងមើលអំពីលទ្ធភាពជីករុករកប្រេង និងឧស្ម័ននៅកម្ពុជា ។ ការចូលមកនៃក្រុមហ៊ុនទាំងអស់នេះធ្វើឡើង បន្ទាប់ពីដំណើរការរុករកប្រេងនៅកម្ពុជាត្រូវស្ងាត់សូន្យឈឹងអស់រយៈពេលជាង១ឆ្នាំ ក្រោយក្រុមហ៊ុនរុករកប្រេងរបស់សឹង្ហបុរី KrisEnergy បានប្រកាសក្ស័យធន់មក ៕
ចែករំលែកព័តមាននេះ