ខេត្តកំពត ៖ ក្រោយឃាត់ខ្លួន ជនសង្ស័យទាំងនេះបានឆ្លើយសារភាពថា រាល់ពេលធ្វើសកម្មភាពឆក់ ពួកគេតែងតែជិះម៉ូតូឌុបគ្នា និងប្រើកាំបិតប៉័ងតោ២គ្រឿងដែលដាក់តាមខ្លួនរហូត ។ ហើយការដែលពួកគេចូលចិត្តឆក់ទ្រព្យសម្បត្តិទៅលើជនបរទេស ក៏ព្រោះយល់ថា…
ខេត្តកំពត ៖ ក្រោយឃាត់ខ្លួន ជនសង្ស័យទាំងនេះបានឆ្លើយសារភាពថា រាល់ពេលធ្វើសកម្មភាពឆក់ ពួកគេតែងតែជិះម៉ូតូឌុបគ្នា និងប្រើកាំបិតប៉័ងតោ២គ្រឿងដែលដាក់តាមខ្លួនរហូត ។ ហើយការដែលពួកគេចូលចិត្តឆក់ទ្រព្យសម្បត្តិទៅលើជនបរទេស ក៏ព្រោះយល់ថា ជនបរទេសទាំងនោះមិនចេះនិយាយភាសាខ្មែរ និងមិនដឹងទៅប្តឹងនៅទីណាទេ ។
សូមរំលឹកថា សមត្ថកិច្ចនៃអធិការដ្ឋានស្រុកទឹកឈូ បានសហការជាមួយកម្លាំងរបស់ស្នងការដ្ឋាននគរបាលខេត្តកំពតតាមឃាត់ខ្លួនយុវជន២នាក់ ក្រោមបទសង្ស័យឆក់ទ្រព្យសម្បត្តិជនបរទេស ។
លោកឧត្តមសេនីយ៍ត្រី លក ញ៉ាវ ស្នងការរងទទួលផែនការងារព្រហ្មទណ្ឌបានប្រាប់ឱ្យដឹងថា យុវជនសង្ស័យទាំង២នាក់រួមមាន ១-ឈ្មោះ ស៊ុន រដ្ឋា អាយុ១៩ឆ្នាំ មានទីលំនៅភូមិកំពង់នង់ ឃុំកូនសត្វ ស្រុកទឹកឈូ ខេត្តកំពត ២-ឈ្មោះរឿន សុភា អាយុ២០ឆ្នាំ មានទីលំនៅភូមិដំណាក់ត្រាច ឃុំកណ្ដោល ស្រុកទឹកឈូ ខេត្តកំពត ដោយទាំង២នាក់ បានជួលបន្ទប់ស្នាក់នៅបណ្តោះអាសន្នក្នុងស្រុកឈូក ។
លោកស្នងការរងបានរៀបរាប់ថា កាលពីវេលាម៉ោង២និង៤៧នាទីរសៀលថ្ងៃទី១៤ មិថុនា ឆ្នាំ២០២៣ កន្លងមក ជនសង្ស័យទាំង២នាក់ជិះម៉ូតូ១គ្រឿង បានឆក់ទូរសព្ទម៉ាក Iphone១៣ និងកាបូបស្ពាយផ្ទុកឯកសារ និងទ្រព្យសម្បត្តិមួយចំនួនពីស្ត្រីបរទេសម្នាក់ដែលកំពុងជិះម៉ូតូនៅលើផ្លូវវាងក្រុង ស្ថិតក្នុងភូមិត្រពាំងធំ ឃុំត្រពាំងធំ ស្រុកទឹកឈូ ។
ភ្លាមៗនោះ បុរសបរទេសដែលជាមិត្តភក្តិស្ត្រីរងគ្រោះបានព្យាយាមជិះម៉ូតូដេញតាមដែរ តែត្រូវក្រុមជនសង្ស័យលើកកាំបិតប៉័ងតោចង្អុលមុខ ទើបបុរសជនបរទេសនោះត្រឡប់ក្រោយវិញ ។ លោកឧត្តមសេនីយ៍ត្រីបានបញ្ជាក់ថា ក្រោយហេតុការណ៍កើតឡើង ជនរងគ្រោះបានដាក់បណ្ដឹងចូលអធិការដ្ឋាននគរបាលស្រុកទឹកឈូ។
ក្រោយទទួលបានពាក្យបណ្តឹងពីជនរងគ្រោះលោកឧត្តមសេនីយទោម៉ៅ ចន្ទ័មធុរិទ្ធ ស្នងការខេត្តនិងដោយបានការសម្រួលនីតិវិធី ដោយលោកជីវ ចន្ទ័តារា ព្រះរាជអាជ្ញានៃអយ្យការអមសាលាដំបូងខេត្ត បានដឹកនាំកំលាំងព្រហ្មទណ្ឌ ដើម្បីចុះស្រាវជ្រាវកំណត់មុខសញ្ញា ដឹកនាំដោយលោកឧត្តមសេនីយត្រីលក ញ៉ាវ ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តដើម្បីបើកការស៊ើបអង្កេតរហូតកំណត់មុខសញ្ញាបានជាក់លាក់ ។
ភ្លាមៗនោះ កម្លាំងនគរបាលស្រុកទឹកឈូ និងកម្លាំងស្នងការដ្ឋានបានចុះសហការជាមួយសមត្ថកិច្ចស្រុកឈូកតាមឃាត់ខ្លួនពួកគេរហូតដល់បន្ទប់ផ្ទះជួលតែម្តង ។ លោកលក ញ៉ាវ បានបន្តថា តាមរយ:ការសារភាពរបស់ជនសង្ស័យ គឺនៅដើមខែឧសភា ឆ្នាំ២០២៣ ពួកគេបានឆក់យកកាមេរ៉ាមួយគ្រឿងរបស់ជនបរទេសប្រុសស្រី២នាក់នៅផ្សារក្តាម ខេត្តកែប និងចុងខែឧសភាដដែល បានឆក់ទូរសព្ទដៃពីនារីបរទេសម្នាក់ស្ថិតនៅឃុំកូនសត្វ ស្រុកទឹកឈូ ។
ពេលឆក់លើកក្រោយនេះ ដោយជនរងគ្រោះមិនព្រមលែង ត្រូវបានជនដៃដល់កាប់ជនរងគ្រោះមួយកាំបិតប៉័ងតោបណ្តាលឲ្យរងរបួសត្រង់កដៃខាងឆ្វេងមួយកាំបិត ទើបជនរងគ្រោះព្រមលែងសម្ភារពីដៃហើយត្រូវជនសង្ស័យយកបានហើយជិះម៉ូតូគេចខ្លួនដោយសុវត្ថិភាព ។
ចែករំលែកព័តមាននេះ