ខេត្តកោះកុង ៖ កាលពីវេលាម៉ោង១១និង៤៥នាទីថ្ងៃត្រង់ថ្ងៃទី៥ ឧសភា សមត្ថកិច្ចប៉ូលិសព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត សហការជាមួយប៉ូលិសក្រុងខេមរ ភូមិន្ទ ស្ទាក់ចាប់បានក្រុមឆបោកធ្វើជាបបួលលេងល្បែងរួចគាបយកទ្រព្យសម្បត្តិពីអ្នកដទៃបានចំនួន៥នាក់ ក្នុងចំណោម៦នាក់ និងរឹបអូសបានម៉ូតូ៣គ្រឿង
ខេត្តកោះកុង ៖ កាលពីវេលាម៉ោង១១និង៤៥នាទីថ្ងៃត្រង់ថ្ងៃទី៥ ឧសភា សមត្ថកិច្ចប៉ូលិសព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត សហការជាមួយប៉ូលិសក្រុងខេមរ ភូមិន្ទ ស្ទាក់ចាប់បានក្រុមឆបោកធ្វើជាបបួលលេងល្បែងរួចគាបយកទ្រព្យសម្បត្តិពីអ្នកដទៃបានចំនួន៥នាក់ ក្នុងចំណោម៦នាក់ និងរឹបអូសបានម៉ូតូ៣គ្រឿង ។ ក្រុមជនឆបោកទាំងនោះ ត្រូវប៉ូលិសឃាត់ខ្លួន បន្ទាប់ពីពួកគេបានប្រើល្បិចស្ទាក់បបួលពលរដ្ឋម្នាក់ឈ្មោះឡៅ រ៉ាឌី ហៅតាលក់ពងទា អាយុ៥២ឆ្នាំ លេងល្បែងបត់លុយចាក់ រួចដោះយកចិញ្ចៀនពីឈ្មោះឡៅ រ៉ាឌី នាំគ្នាគេចខ្លួនបាត់ កាលពីវេលាម៉ោង៤រសៀលថ្ងៃទី៤ ឧសភាកន្លងទៅ នៅចំណុចមុខវត្តទេពនិម្មិត ហៅវត្តថ្មី ស្ថិតក្នុងភូមិ៣ សង្កាត់់ស្មាច់មានជ័យ ក្រុងខេមរភូមិន្ទ ។
លោកវរសនីយ៍ត្រីឡាយ ម៉េងឡាំង នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបញ្ជាក់ថា បន្ទាប់ពីក្រុមឆបោកខាងលើនេះ បានធ្វើសកម្មភាពប្រើល្បិចឆបោកឈ្មោះឡៅ រ៉ាឌី រួច ជនរងគ្រោះក៏បានមកប្តឹងសមត្ថកិច្ច ហើយសមត្ថកិច្ចក៏បានតាមរកភ្លាមៗដែរ លុះដល់វេលាម៉ោង១១ និង៤៥នាទី ថ្ងៃទី៥ ឧសភា ទើបចាប់ខ្លួនបានចំនួន៥នាក់ ។ ជនសង្ស័យឆបោកទាំង៥នាក់នោះ១-ឈ្មោះលី ចំរើន ភេទប្រុស អាយុ៣៤ឆ្នាំ មានទីលំនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ២-ឈ្មោះសុខ ពិសី ភេទប្រុស អាយុ៤២ឆ្នាំ មានទីលំនៅភូមិជ្រែកោង សង្កាត់ជ្រៃកោង ខណ្ឌដង្កោ រាជធានីភ្នំពេញ ៣-ឈ្មោះផេង ធារ៉ា ភេទប្រុស អាយុ៤២ឆ្នាំ មានទីលំនៅភូមិរលួស ឃុំរលួស ស្រុកកណ្តាលស្ទឹង ខេត្តកណ្តាល ៤-ឈ្មោះចាន់ សឿន ហៅស៊ុយ ភេទប្រុស អាយុ៥២ឆ្នាំ ទីលំនៅភូមិអូតាពូង ឃុំរកាកោះ ស្រុកគងពិសី ខេត្តកំពង់ស្ពឺ ៥-ឈ្មោះកា សំផុន ហៅឡឹត ភេទប្រុស អាយុ៤៧ឆ្នាំ ទីលំនៅភូមិព្រះពន្លា ឃុំព្រះពន្លា ស្រុកសិរីសោភ័ណ ខេត្តបន្ទាយមានជ័យ ជាមេខ្លោង ហើយពួកគេទាំងអស់គ្នា មានមុខរបររត់ម៉ូតូឌុប ។ ចំណែកឈ្មោះរ៉ន ជាបក្សពួកបានជិះម៉ូតូរត់គេចខ្លួនបាត់ ។
លោកឡាយ ម៉េងឡាំង បានបន្តថា ម៉ូតូដែលជាវត្ថុតាងរបស់ជនល្មើសជិះធ្វើសកម្មភាព៣គ្រឿង ត្រូវសមត្ថកិច្ចរឹបអូស ១-ម៉ាកវីវ៉ា ពណ៌ខ្មៅ ពាក់ស្លាកលេខស្វាយរៀង 1A-2316 ២-ម៉ាកវ៉េវ ពណ៌ខ្មៅ ពាក់ស្លាកលេខភ្នំពេញ 1C-0216 និង៣-ម៉ាកវ៉េវ ពណ៌ក្រហម គ្មានស្លាកលេខ ។ ករណីបង្ក្រាបក្រុមប្រើល្បិចឆបោកនេះត្រូវបានធ្វើឡើងតាមការណែនាំរបស់លោកឧត្តមសេនីយ៍ត្រីសំ ឃីតវៀន ស្នងការនគរបាលខេត្ត និងដឹកនាំផ្ទាល់ដោយលោកវរសនីយ៍ឯក ស៊ិនសេន ស្នងការរងទទួលផែនកណ្តាលយុត្តិធម៌ ។ លោកស្នងការរងស៊ិន សេន បានបញ្ជាក់ថា ជនសង្ស័យបានសារភាពថា ពួកគេពិតជាបានប្រើល្បិចបបួលឈ្មោះឡៅ រ៉ាឌី លេងល្បែងមូរលុយចាក់ហើយដោះយកចិញ្ចៀនចំនួន៥ជី ប្រាកដមែន ។ ជនសង្ស័យនិងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ហើយបន្តធ្វើការស្រាវជ្រាវរកមុខសញ្ញាដែលគេចខ្លួនរួចទៀត ៕
ចែករំលែកព័តមាននេះ