ក្រុងប៉ោយប៉ែត ៖ រថយន្តដឹកទំនិញសំពីងសំពោងនៅតែកើតមាន និងបន្តបង្កការភ័យខ្លាចដល់ប្រជាពលរដ្ឋនៅក្រុងប៉ោយប៉ែតដដែល ដោយគេសង្កេតឃើញឈ្មួញធំៗ៣-៤នាក់ បានយករថយន្តធុនធំកង់៦លើកដាក់ទំនិញនៅចំណុចខាងជើងផ្សារអគ្គ ស្ថិតនៅក្នុងភូមិក្បាលស្ពាន សង្កាត់ប៉ោយប៉ែត ។ រថយន្តបានផ្ទុកទំនិញយ៉ាងខ្ពស់សំពីងសំពោង
ក្រុងប៉ោយប៉ែត ៖ រថយន្តដឹកទំនិញសំពីងសំពោងនៅតែកើតមាន និងបន្តបង្កការភ័យខ្លាចដល់ប្រជាពលរដ្ឋនៅក្រុងប៉ោយប៉ែតដដែល ដោយគេសង្កេតឃើញឈ្មួញធំៗ៣-៤នាក់ បានយករថយន្តធុនធំកង់៦លើកដាក់ទំនិញនៅចំណុចខាងជើងផ្សារអគ្គ ស្ថិតនៅក្នុងភូមិក្បាលស្ពាន សង្កាត់ប៉ោយប៉ែត ។ រថយន្តបានផ្ទុកទំនិញយ៉ាងខ្ពស់សំពីងសំពោង និងយកកៅស៊ូតង់ចងជុំវិញ ហើយមានកម្មករខ្លះបានដើរទប់ពីក្រោយផងដែរ ដោយសារតែមានការភ័យខ្លាចទំនិញនៅលើរថយន្តរលំធ្លាក់ចុះមកដី។
ទំនិញទាំងនោះនៅពេលលើកដាក់លើរថយន្តរួចរាល់នៅចំណុចផ្សារអគ្គមាត់ច្រកប៉ោយប៉ែត គេយកទៅដាក់នៅចំណុចមុខបរិវេណកាស៊ីណូហ្គោលដិនក្រោន រួចបន្តយកចូលទៅក្នុងប្រទេសសៀមតាមច្រកទ្វារអន្តរជាតិប៉ោយប៉ែត។ តាមប្រភពពីម្ចាស់ទំនិញទាំងនោះបានបង្ហើបប្រាប់អ្នកយកព័ត៌មានកោះសន្តិភាពឱ្យដឹងថា ចំពោះការដាក់ទំនិញលើរថយន្តសំពីងសំពោងបែបនេះ រូបគាត់ក៏មិនចង់ដែរ ពីព្រោះពេលខ្លះដោយសារតែដាក់ទំនិញខ្ពស់ពេក និងសំពីងសំពោងផងនោះក៏ភ្លាត់ក្រឡាប់រថយន្តផ្ងារជើងក៏មាន ហើយត្រូវខូចខាតទំនិញអស់មួយចំនួន និងថែមទាំងខូចដល់រថយន្តផងដែរ។ ប៉ុន្តែម្ចាស់ទំនិញនោះបន្តថា ការដឹកទំនិញបែបនេះ គឺដោយសារតែគ្មានជម្រើស ពីព្រោះត្រូវបង់លុយឱ្យស្ថាប័នសមត្ថកិច្ចពាក់ព័ន្ធច្រើនពេក។ ជាពិសេសនៅចំណុចមាត់ច្រករង្វង់មូលនោះមានសមត្ថកិច្ចដល់ទៅ២ស្ថាប័ន គឺសមត្ថកិច្ចប៉ូលិសអន្តោប្រវេសន៍ច្រក និងសមត្ថកិច្ចកងរាជអាវុធហត្ថខេត្តបន្ទាយមានជ័យ ។ គាត់ត្រូវបង់លុយឱ្យសមត្ថកិច្ចទាំង២ស្ថាប័ននោះ ក្នុង១រថយន្តពី១.២០០បាត ទៅ១.៥០០បាត លុយសៀម ដោយពួកគេរាប់ក្បាលឡានយកលុយតែម្តង ។ ដូច្នេះហើយទើបពួកគាត់ដឹកទំនិញសំពីងសំពោងបែបនេះ ធ្វើយ៉ាងណាដើម្បីបានប្រាក់ចំណេញខ្លះ ។
លោកទ្រី ណារិន អភិបាលក្រុងប៉ោយប៉ែត បានឱ្យកោះសន្តិភាពដឹងតាមទូរស័ព្ទនៅព្រឹកថ្ងៃទី៤ ឧសភា ថា ចំពោះបញ្ហាទាំងអស់នេះលោកបានដឹងហើយ និងកំពុងតែរកវិធានការចាត់ការទៅតាមច្បាប់ចរាចរណ៍ផ្លូវគោក និងមិនអនុញ្ញាតឱ្យពួកគេដឹកទំនិញសំពីងសំពោងតាមរថយន្តរបៀបអនាធិបតេយ្យ បង្កនូវការភ័យខ្លាចដល់ពលរដ្ឋនៅក្នុងក្រុងប៉ោយប៉ែត នេះតទៅទៀតទេ ។
គួររំលឹកផងដែរថា ចំពោះរថយន្តដឹកទំនិញសំពីងសំពោងបែបអនាធិបតេយ្យ និងបង្កការភ័យខ្លាចដល់ប្រជាពលរដ្ឋនៅក្រុងប៉ោយប៉ែត នេះ ខាងភាគីសៀមគេមិនអនុញ្ញាតឱ្យដឹកទំនិញរបៀបនេះចូលក្នុងប្រទេសរបស់គេឡើយ។ ទំនិញទាំងនេះពេលដឹកមកដល់ចំណុចព្រំដែនច្រកប៉ោយប៉ែត ត្រូវបានគេយករទេះសាងបន្ត ទើបអាចនាំចូលក្នុងប្រទេសសៀមបាន ៕
ចែករំលែកព័តមាននេះ