តារាចម្រៀងលោក ណុប បាយ៉ារិទ្ធ បានធ្វើការឆ្លើយតបយ៉ាងចាក់ដោតមិនសំចៃមាត់ទៅកាន់គណនីហ្វេសប៊ុករបស់បុរសម្នាក់ ដែលប្រើប្រាស់ពាក្យសម្តីមិនសមរម្យ និងមើលងា.យមកកាន់រូបលោក ព្រមទាំង
រាជធានីភ្នំពេញ ៖ តារាចម្រៀងលោក ណុប បាយ៉ារិទ្ធ បានធ្វើការឆ្លើយតបយ៉ាងចាក់ដោតមិនសំចៃមាត់ទៅកាន់គណនីហ្វេសប៊ុករបស់បុរសម្នាក់ ដែលប្រើប្រាស់ពាក្យសម្តីមិនសមរម្យ និងមើលងា.យមកកាន់រូបលោក ព្រមទាំងតារាចម្រៀងរួមទ្រនំចំនួន៣ដួងទៀត។
ការវា.យបកដោយពាក្យសម្តីតាមបណ្តាញសង្គមពីតារាចម្រៀងរូបនេះ បានធ្វើឡើង បន្ទាប់ពីមានម្ចាស់គណនីហ្វេសប៊ុកដែលមានឈ្មោះថា «Sakara FC» បានធ្វើការចែកចាយវីដេអូនៃកម្មវិធី The Voice Cambodia ត្រង់វគ្គបេក្ខនារីមួយរូប ត្រូវបានរូបលោក និង Coach ៣នាក់ទៀត គោះប៊ូតុងយកទាំងអស់ ជាមួយនឹងការសរសេរពាក្យមិនសមរម្យថា «ច្រៀងឡូយ និងពីរោះជាង អា Coach បួនក្បាលនឹងទៀត»។ ពាក្យមួយឃ្លានេះ បានធ្វើអោយតារាចម្រៀងលោក ណុប បាយារិទ្ធ ហាក់ក្តៅចុងច្រមុះ និងបានធ្វើការឆ្លើយតបទៅវិញយ៉ាងចាស់ដៃវិញតែម្តង។
តាមរយៈសំណេរដែលបានបង្ហោះតាមគណនីហ្វេសប៊ុករបស់ខ្លួនលោក ណុប បាយារិទ្ធ បានលើកឡើងថា «សម្តីសរជាតិ មាយាទសរពូជ» នេះជាសុភាសិតខ្មែរដែលចាស់ទុំតែងអប់រំកូនចៅគ្រប់គ្នា។ ពាក្យតិទានស្ថាបនា ខុសពីការប្រមា.ថមើលងា.យ។ លោកថា តើឆ្លុះបញ្ចាំងអ្វីពីខ្លួនអ្នកវិញ? អ្នកចង់បង្ហាញថា ពួកខ្ញុំអន់ ឬឆ្លុះបញ្ចាំងពីកម្រិតវប្បធម៌ សុជីវធម៌ ចំណេះដឹងរបស់អ្នកអន់? ច្រៀងអន់ អាចរៀនច្រៀងបាន អាចចំណាយពេលហ្វឹកហាត់បង្កើនសមត្ថភាពបាន តែបើឈ្លើយ អត់សុជីវធម៌ហើយគឺសន្ដាន ហើយអាចពិបាកត្រង់ត្រូវទៅអង្គុយរៀនមុខវិជ្ជាសុជីវធម៌ជាមួយក្មេងៗអាយុស្របាលកូនខ្លួនឯងម្តងទៀតឬយ៉ាងណា?។
លោកបញ្ជាក់ថា សម្តីបែបនេះ ទើបអាចសាងមោទនភាពដល់ខ្លួនឯង និងដល់ប្រពន្ធកូន? ប្រើភាសាបែបនេះ ទើបអួតគេថា សមជាមនុស្សចេះដឹង? គេមើលមកថាឡូយ? បង្ហាញពីគុណតម្លៃ និងកិត្តិយសរបស់ខ្លួនឯង?។
បើតាមលោក ណុប បាយារិទ្ធ ថា ពាក្យ «ក្បាល» គេប្រើជាមួយសត្វ ចឹងបើអ្នកចង់ទុកពួកខ្ញុំជាសត្វ អ្នកក៏ត្រូវប្រៀបធៀបពីខ្លួនអ្នកផ្ទាល់ជាមួយពួកខ្ញ្ញុំជាមុនសិនដូចគ្នា ពួកខ្ញុំមានសមត្ថភាពធ្វើអ្វីបានខ្លះ? អ្នកអាចធ្វើអីបានខ្លះ? គុណតម្លៃរបស់មនុស្សគេវាស់វែងលើចំណេះដឹង សមត្ថភាព និងលទ្ធផលដែលធ្វើបាន។ តិចចុងក្រោយតូចចិត្ត មិនហ៊ានទទួលការពិត។ តិចចេះតែមើលងា.យគេ អត់ចេះមើលពីខ្លួនឯង ក្លាហានតែមើលពីគេ មិនក្លាហានមើលពីការពិតរបស់ខ្លួនឯង។ លោកបញ្ជាក់ថា បើសម្តីអត់សុជីវធម៌ចឹង តើមានសមត្ថភាពអប់រំកូនអោយធ្វើជាកូនល្អ ជាបុគ្គលល្អក្នុងសង្គមបានទេ? នេះជាគំរូដ៏អាក្រក់បំផុត។
លោក ណុប បាយារិទ្ធ បានលើកឡើងបន្ថែមទៀតថា ខមមិនអ្វីក៏ជាការបង្ហាញពីខ្លួនឯងដែរ សូមកុំបង្ហាញអោយគេឃើញពីកម្រិតសុជីវធម៌របស់យើងទាប ធ្លាក់ដល់0 ។ ពាក្យល្អមានច្រើនណាស់ ចំណុចល្អរបស់មនុស្សម្នាក់ៗប្រាកដជាមានច្រើនជាងចំណុចខ្វះខាត ដូច្នេះសូមនិយាយរាល់ចំណុចល្អរបស់មនុស្សម្នាក់ៗផង កុំមើលតែចំណុចខ្វះខាត ហើយបើចាំមើលតែចំណុចខ្វះខាតរបស់អ្នកដទៃដដែល ចូរមើលពីចំណុចខ្វះខាតរបស់ខ្លួនឯងមុនគេ ព្រោះចំណាយកែលម្អខ្លួនឯង គឺប្រសើរជាងទៅទាមទារ ឬកែលម្អអ្នកដទៃ។ សម្អាតខ្លួនឯងមុន មើលពីខ្លួនឯងមុន គឺជារឿងល្អ»។
លោកថា ខ្ញុំមិនដែលតាំងខ្លួនឯងល្អឯក ពិសេស ឬអស្ចារ្យជាងនរណាៗទេ តែខ្ញុំច្បាស់ថា រវាងពាក្យ១និយាយអោយគេបាក់ទឹកចិត្ត ពាក្យមួយនិយាយអោយគេសប្បាយចិត្ត មានកម្លាំងចិត្ត មានស្នាមញញឹម គឺខ្ញុំនឹងយកពាក្យល្អ បើទោះជាត្រូវកុហក ក៏ខ្ញុំសុខចិត្តអោយតែពាក្យកុហករបស់ខ្ញុំអាចធ្វើអោយអ្នកណាម្នាក់ញញឹមបាន នោះខ្ញុំនឹងប្រើការកុហករបស់ខ្ញុំអោយមានតម្លៃ ប្រើពាក្យកុហកអោយទៅជាការរឿងល្អ។ គ្រប់ពាក្យកុហកមិនមែនសុទ្ធតែគ្មានតម្លៃ ឬមិនល្អទាំងអស់នោះទេ អោយតែមនុស្សយកទៅប្រើអោយមានគុណធម៌ ទើបខ្ញុំដាច់ខាត នៅសុខៗមិននិយាយអោយអ្នកណាម្នាក់ឈឺចាប់ដោយសារខ្ញុំទេ៕
ចែករំលែកព័តមាននេះ