ប្រជាពលរដ្ឋចំនួន៦គ្រួសារនៅភូមិឈើទាល ឃុំស្ដេចគង់ខាងលិច ស្រុកបន្ទាយមាស កាលពីព្រឹកថ្ងៃទី១០ ខែមិថុនា ឆ្នាំ២០២៣កន្លងទៅ បាននាំគ្នាមកឈរមើលសកម្មភាពគ្រឿងចក្ររបស់ក្រុមហ៊ុនមួយដែលបានកាយដីបឹងប៉ះពាល់លើដីពួកគាត់ដែលកំពុងសាបព្រោះស្រូវ
ខេត្តកំពត ៖ ប្រជាពលរដ្ឋចំនួន៦គ្រួសារនៅភូមិឈើទាល ឃុំស្ដេចគង់ខាងលិច ស្រុកបន្ទាយមាស កាលពីព្រឹកថ្ងៃទី១០ ខែមិថុនា ឆ្នាំ២០២៣កន្លងទៅ បាននាំគ្នាមកឈរមើលសកម្មភាពគ្រឿងចក្ររបស់ក្រុមហ៊ុនមួយដែលបានកាយដីបឹងប៉ះពាល់លើដីពួកគាត់ដែលកំពុងសាបព្រោះស្រូវ ដោយមិនបានប្រាប់ឱ្យដឹងឡើយ ។
ការស្ដារបឹងប៉ះពាល់លើដីប្រជាពលរដ្ឋដែលកំពុងអាស្រ័យផលនោះ តាមពិតទៅគឺជាការជីកក្រវាត់ដីរបស់ក្រុមហ៊ុន ដែលបានទិញពីប្រជាពលរដ្ឋប៉ុណ្ណោះ ហើយខាងអាជ្ញាធរបែរជានិយាយថា ស្ដារបឹងទៅវិញ ។
អ្នកស្រី សែម ហឿន អាយុ៦០ឆ្នាំ នៅភូមិឈើទាល បាននិយាយកាលពីព្រឹកថ្ងៃទី១០ ខែមិថុនា ឆ្នាំ២០២៣ថា អ្នកភូមិឈើទាលខឹងសម្បានឹងក្រុមហ៊ុនមួយនេះ ដែលយកគ្រឿងចក្រមកកាយដីបឹងក្រោមរូបភាពថាស្ដារបឹង ធ្វើឱ្យស្រូវអ្នកភូមិដែលបានសាបព្រោះរួចរាល់ហើយនិងកន្លែងខ្លះស្រូវបានដុះហើយនោះ រងផលប៉ះពាល់ ។
អ្នកស្រី សែម ហឿន និយាយថា ដីក្នុងបឹងនេះគាត់បានអាស្រ័យផលតាំងពីដូនតាមកម្ល៉េះ ថ្វីដ្បិត
តែដីអត់ប្លង់មែន តែគាត់គ្រោងជីកយកអាចម៍ដីចាក់លើដីភូមិ តែអាជ្ញាធរមិនអនុញ្ញាតឱ្យកាយទេ ។ ផ្ទុយទៅវិញ ត្រង់គ្រឿងចក្ររបស់ក្រុមហ៊ុនមកកាយក្រវាត់ព្រំដីរបស់ខ្លួន បែរជាអាជ្ញាធរស្ងៀមស្ងាត់ទៅវិញ ។
អ្នកភូមិម្នាក់ទៀតអ្នកស្រី ឡឹង ធឿន អាយុ៥០ឆ្នាំ នៅភូមិឈើទាលដែរនិយាយថា អាជ្ញាធរមិនគួរឱ្យក្រុមហ៊ុនមកកាយដីបំផ្លាញស្រូវប្រជាពលរដ្ឋទេ ។ ការកាយដីក្នុងបឹងនេះ បានចូលដីគាត់ដែលមានប្លង់ជិត៣ម៉ែត្រឯណោះ ។
លោក ជុំ សារឿន នាយករដ្ឋបាលសាលាស្រុកបន្ទាយមាស និយាយថា ការកាយដីបឹង ឬស្ដារបឹងធ្វើផ្លូវ បើប៉ះពាល់ដីប្រជាពលរដ្ឋមិនត្រូវធ្វើឡើយ គួររង់ចាំរកដំណោះស្រាយសិន ។ ចំណែកប្រជាពលរដ្ឋ បានទាមទារឱ្យអាជ្ញាធរពិនិត្យឱ្យបានច្បាស់លាស់ ៕
ចែករំលែកព័តមាននេះ