ខេត្តស្វាយរៀង ៖ ប្រជាពលរដ្ឋនៅភូមិតាប៉ោ និងភូមិសំឡីខាងជើងឃុំសំឡីបានរិះគន់ក្រុមហ៊ុនចំនួន០២ ដែលទទួលការកែលំអផ្លូវដី និងផ្លូវថ្មបំបែកមិនត្រឹមត្រូវតាមស្តង់ដានៃកិច្ចសន្យា សំណូមពរឲ្យអាជ្ញាធរពិនិត្យ និងឲ្យក្រុមហ៊ុនកែលំអតាមកិច្ចសន្យានៃគម្រោង ។
ប្រជាពលរដ្ឋសំណូមពរនេះកើតឡើង នៅព្រឹកថ្ងៃទី០៩ មិថុនា ២០២៣ នៅភូមិតាប៉ោ និងភូមិសំឡី ខាងជើងឃុំសំឡីស្រុកកំពង់រោទ៌ ។ គម្រោងទី១ ប្រជាពលរដ្ឋនៅភូមិតប៉ោ ឃុំសំឡីបានលើកឡើងថា នៅភូមិតាប៉ោទទួលបានគម្រោងកែលម្អផ្លូវ ក្រាលថ្មបំបែក០១ខ្សែ ប្រវែង១,៣៧០ម៉ែត្រ ទទឹង០៥ម៉ែត្រ ក្រាលថ្មបំបែកកម្រាស់០,១៥ម៉ែត្រ ក្នុងតម្លៃទឹកប្រាក់១១០លានរៀល ។ ហើយបានប្រកាសបើកការដ្ឋាន នៅព្រឹកថ្ងៃទី៦ មិថុនា ២០២៣ ហើយបានដកគ្រឿងចក្រ នៅថ្ងៃទី០៨ មិថុនា ២០២៣ ដោយការអនុវត្តកែរលម្អផ្លូវខុសកិច្ចសន្យា គឺការក្រាលថ្មបំបែកស្តើងកន្លែងខ្លះកម្រាស់០,១០ម៉ែត្រ កន្លែងខ្លះ បានតែ០,០៥ម៉ែត្រប៉ុណ្ណោះ តាមកិច្ចសន្យា គឺកម្រាស់០,១៥ម៉ែត្រ ។
លោកមេឃុំ សំឡី បានមានប្រសាសន៍ ប្រាប់អ្នកសារព័ត៌មាន នារសៀលថ្ងៃទី០៩មិថុនាថា ឃុំសំឡីទទួលបានគម្រោងកិច្ចសន្យាកែលំអ ផ្លូវលំចំនួន០២ខ្សែ គម្រោងទី១ នៅភូមិតាប៉ោ កែលម្អផ្លូវ ១ខ្សែ ប្រវែង១,៣៧០ម៉ែត្រ ទទឹង០៥ម៉ែត្រ ក្រាលថ្មបំបែក កម្រាស់០,១៥ម៉ែត្រ ដែលមានទឹកប្រាក់១១០លានរៀល ។ បានដាក់ដេញថ្លៃ កាលពីព្រឹកថ្ងៃទី១៥ ឧសភា ២០២៣ មានក្រុមហ៊ុនចូលដាក់សំណើរដេញថ្លៃចំនួន០៣ក្រុមហ៊ុន លទ្ធផលបានទៅលើក្រុមហ៊ុនរស្មីវង់ភគ្រ័ ក្នុងទឹកប្រាក់១១០លានរៀល ។
លោកមេឃុំបាន មានប្រសាសន៍ទៀតថា ក្រុមហ៊ុន បានចុះអនុវត្តគម្រោង នៅថ្ងៃទី២៨ ឧសភា ២០២៣ ហើយបានប្រជុំបើកការដ្ឋាន នៅព្រឹកថ្ងៃទី០៦ មិថុនា ២០២៣ ដោយមានការអញ្ជើញជាអធិបតីពីសំណាក់លោក សុច ពិសី អភិបាលស្រុកកំពង់រោទ៌ ។ ហើយហើយក្រោយពីបើកការដ្ឋា បាន០៣ថ្ងៃ គឺនៅថ្ងៃទី០៨ មិថុនា ២០២៣ ក្រុមហ៊ុនបានដកគ្រឿងចក្រចេញ ទើបមានប្រតិកម្មពីប្រជាពលរដ្ឋរាយការណ៍ទៅអាជ្ញាធរឃុំនៃតំណាងគណកម្មការម្ចាស់គម្រោង បានចុះទៅពិនិត្យមើលផ្លូវក្រាលថ្មបំបែក ឃើញថា ការក្រាលថ្មបំបែករបស់ក្រុមហ៊ុន គឺស្តើងមែន លោកមេឃុំក៏បានហៅក្រុមហ៊ុនទទួលការមកសាកសួរ ក្រុមហ៊ុន ប្រាប់ថា ក្រុមហ៊ុនទើបតែអនុវត្តបាន៥០ភាគរយមិនទាន់រួចរាល់នៅឡើយទេ ក៏ប៉ុន្តែក្រុមហ៊ុនដកគ្រឿងចក្រទៅធ្វើកន្លែងផ្សេងសិន ដល់សប្តាហ៌ក្រោយទើបយកថ្ម មកចាក់បន្ថែមកន្លែងណាដែលស្តើងមិនទាន់គ្រប់តាមកិច្ចសន្យា ។
លោកមេឃុំបន្តទៀតថា នៅពេលណាក្រុមហ៊ុនរស្មីវង់ភគ្រ័យកថ្ម និងគ្រឿងចក្រមកធ្វើបន្ត រួចដាក់សំណើរបញ្ចប់គម្រោងក្រុមការងារនៃគណកម្មការបច្ចេកទេស លទ្ធកម្មឃុំ ស្រុក និងខេត្តចុះពិនិត្យឃើញថា ត្រូវតាមគម្រោងកិច្ចសន្យា ទើបទទួល និងបើកប្រាក់ជូនក្រុមហ៊ុន ។
ចំពោះគម្រោងទី២ នៅភូមិសំឡីខាងជើង គឺ ៖ ជាគម្រោងកិច្ចសន្យា កែលម្អ ផ្លូវដី០១ខ្សែ ប្រវែង២,៩២០ម៉ែត្រ ទទឹង០៦ម៉ែត្រ កម្ពស់០,៤០ម៉ែត្រ ដែលមានទឹកប្រាក់១៦៧លានរៀល ក្រុមហ៊ុនដេញថ្លៃបានទៅក្រុមហ៊ុនគង់ សុភី ។
លោកមេឃុំបានបញ្ជាក់ថា ករណីប្រជាពលរដ្ឋលើកឡើង ក្រុមហ៊ុនយកដីស្អុយ ទៅចាក់ធ្វើផ្លូវនោះ លោក និងក្រុមការងារតំណាងម្ចាស់គម្រោងរបស់ឃុំបានចុះទៅពិនិត្យមើលហើយ គឺមុនដំបូងក្រុមហ៊ុនបានយកដីល្អ គឺជីរណ្តៅដី ដីឥដ្ឋ ចាក់បានប្រមាណជាង១គីឡូម៉ែត្រ ក៏មានភ្លៀងធ្លាក់ធ្វើឲ្យរថយន្តដឹកដីចូលទៅដឹកដី នៅកន្លែងរណ្តៅដីលែងបានទើបក្រុមហ៊ុនសុំប្តូទីតាំង ទៅយកដីនៅឯបឹងមកជំនួស ដោយអជ្ញាធរមិនអាចរារាំងការងារក្រុមហ៊ុន ម្យ៉ាងខ្លាចភ្លៀងនាំឲ្យរាំងស្ទះក្រុមហ៊ុនក៏យល់ព្រមឲ្យទៅយកដី បឹងក្នុងអាងទំនប់ដូនទយ មកដាក់ធ្វើផ្លូវ ។
ហើយពេលមានប្រជាពលរដ្ឋប្រតិកម្ម លោកបានចុះទៅពិនិត្យមើលដីដែលក្រុមហ៊ុនគង់សុភី យកមកចាក់ធ្វើផ្លូវនោះ គឺជាប្រភេទល្បាយខ្សាច់ និងមានលាយដីខ្មៅ២៥ភាគរយ ហើយក្រុមហ៊ុនបានចាក់ដីបឹងនេះ ប្រវែងប្រមាណជា៣០០ម៉ែត្រប៉ុណ្ណោះ ដីមិនសូវល្អ ទើបលោកសុំឲ្យក្រុមហ៊ុនផ្អាកយកដីបឹង ប្តូររកអាចម៍ដីល្អមកធ្វើផ្លូវបន្ត ក្រុមហ៊ុនក៏បានយល់ព្រម ។
លោកមេឃុំបន្តទៀតថា ឃុំមានលោកមេភូមិជាតំណាងឲ្យម្ចាស់គម្រោងនៅមើលគ្រប់ដំណើរការ បើក្រុមហ៊ុនទទួលការអនុវត្តមិនត្រូវតាមស្តង់ដា បច្ចេកទេសនៃកិច្ចសន្យាឃុំមិនទទួលយក និងមិនបើកប្រាក់ជូនក្រុមហ៊ុនទេ ។
ទាក់ទិនករណីនេះដែរ លោក គង់ សុភី ប្រធានក្រុមហ៊ុនគង់សុភី បានមានប្រសាសន៍តាមទូរស័ព្ទប្រាប់អ្នកសារព័ត៌មានយើងថា ដោយមានភ្លៀងប៉ុន្មានថ្ងៃ ធ្វើឲ្យរថយន្តដឹកដីមិនអាចចូលទៅដឹកអាចម៌ដីនៅរណ្តៅដីបាន លោកបានប្តូរទៅជីកយកអាចម៌ដីនៅឯបឹងវិញ ហើយដីនោះមានរបាយខ្សាច់ និងដីឥដ្ឋពណ៌ខ្មៅ មិនមែនជាដីស្អុយទេ អ្នកបច្ចេកទេសគេយកចូលឡាបូរ ទើបដឹង គឺជាប្រភេទដីល្អ ពេលដីឥដ្ឋខ្មៅនេះរឹង គឺរឹងដូចថ្ម ហើយក្រុមហ៊ុនលោក គឺទទួលការអនុវត្តគម្រោងកែលំអផ្លូវតាមកិច្ចសន្យា ហើយពេលបញ្ចប់គម្រោងប្រគល់ឲ្យក្រុមការងារគណកម្មការបច្ចេកទេសពិនិត្យរួចឃើញថា ត្រូវតាមកិច្ចសន្យាទើបប្រគល់ផ្លូវជូន ហើយបើកឲ្យរថយន្តធ្វើចរាចរណ៍រយៈពេលថែទាំ០៦ខែ បើស្រុតខូចនោះក្រុមហ៊ុនជួសជុលឲ្យវិញ ។ ចំណែកក្រុមហ៊ុនរស្មីវង់ភគ្រ័មិនអាចរកការបំភ្លឺបានទេ រហូតដល់ម៉ោង៥ល្ងាចថ្ងៃទី០៩ មិថុនា២០២៣នេះ៕
ចែករំលែកព័តមាននេះ