ភាពមន្ទិលសង្ស័យថា តើក្រុម Man Utd ឬ Schalke ជាអ្នកបានឡើងទៅលេងវគ្គផ្តាច់ព្រ័ត្រនោះ ត្រូវបានបញ្ចប់ហើយកាលពីរាត្រីថ្ងៃព្រសហ្បតិ៍ កន្លងទៅនៅពេលដែលក្រុមបិសាចក្រហម Man Utd នៅតែបន្តរកបានជ័យជម្នះ 4-1 ទៅលើ Schalke បន្ថែមទៀតក្នុងពហុកីឡដ្ឋាន Old Trafford ធ្វើឱ្យគ្រាប់បាល់សរុបទាំង២ជើង Man Utd បានយកឈ្នះ Schalke 6-1។
ជ័យជម្នះដ៏ត្រចះត្រចង់នេះបានបើកផ្លូវឱ្យក្រុម Man Utd ធ្វើដំណើរទៅវគ្គផ្តាច់ព្រ័ត្រ ត្រូវជួបជាមួយក្លឹបអ្នកមានបុណ្យ Barcelona នៅថ្ងៃទី២៨ ឧសភា ក្នុងពហុកីឡដ្ឋាន Wembley របស់អង់គ្លេស។ នេះគឺជាការធ្វើដំណើរឡើងមកដល់វគ្គផ្តាច់ព្រ័ត្រលើកទី៥ របស់ក្រុមបិសាចក្រហម Man Utd។ ការឡើងមកដល់វគ្គផ្តាច់ព្រ័ត្រ៤លើកកន្លងមក Man Utd ធ្លាប់បានលើកពានរង្វាន់ចំនួន៣លើក គឺឆ្នាំ១៩៦៨ បំបាក់ Benfica 4-1 ក្នុងពហុកីឡដ្ឋាន Wembley (អង់គ្លេស), ឆ្នាំ១៩៩៩ យកឈ្នះ Bayern 2-1 ក្នុងពហុកីឡដ្ឋាន Camp Nou (អេស្ប៉ាញ) និងឆ្នាំ២០០៨ គេបានយកឈ្នះ Chelsea ដោយលទ្ធផល 5-4 ក្នុងការទាត់បាល់ប៉េណាល់ទី។ ដោយឡែកឆ្នាំ២០០៩ Man Utd ទទួលបានចំណាត់ថ្នាក់លេខ២ ក្រោយពីចាញ់ Barcelona 2-0 ក្នុងពហុកីឡដ្ឋាន Stadio Olimpico (អុីតាលី)។
នៅក្នុងដំណើរប្រកួត ក្លឹប Man Utd បាននាំមុខ Schalke ដោយលទ្ធផល 2-0 បណ្តោះអាសន្ន ដោយកីឡាករ Valencia ស៊ុតបាល់បញ្ចូលទីបាន១គ្រាប់ នៅនាទីទី២៦ និងកីឡាករ Gibson រកគ្រាប់បាល់បន្ថែមបាន១គ្រាប់ទៀតនៅនាទីទី៣១។ ៤នាទីក្រោយមក Schalke បើកការវាយបកយ៉ាងខ្លាំង ហើយជាលទ្ធផលនៅក្នុងនាទីទី៣៥ កីឡាករ Jurado ស៊ុតបាល់បញ្ចូលទីបាន១គ្រាប់សងវិញ។ ១០នាទីជាបន្តទៀត ក្រុមទាំង២មិនមានឱកាសស៊ុតបាល់បញ្ចូលទីដូចគ្នាទៅវិញទៅមក ធ្វើឱ្យចប់ការប្រកួតតង់ទី១ Man Utd នៅតែរក្សាការនាំមុខ Schalke 2-1។
ចូលមកដល់តង់ទី២ ទោះបីក្រុម Schalke មានប្រៀបជាងទាំងការគ្រប់គ្រងបាល់ និងឱកាសស៊ុតបាល់បញ្ចូលទី តែមិនអាចរកគ្រាប់បាល់បញ្ចូលទីបាន ផ្ទុយទៅវិញក្លឹប Man Utd រកគ្រាប់បន្ថែមបាន២គ្រាប់ទៀតដោយកីឡាករ Anderson ម្នាក់ឯង ក្នុងនាទី៧២ និងនាទី៧៦ ក្រោយពីមានការបញ្ជូនបាល់ដ៏ល្អពីកីឡាករ Berbatov។ ការនាំមុខ 4-1 របស់ Man Utd បានរក្សារហូតទៅដល់បញ្ចប់ការប្រកួត៩០នាទី។ លទ្ធផលសរុបទាំង២ជើង ក្លឹប Man Utd បានយកឈ្នះ Schalke 6-1 មានកៅអីមួយនៅវគ្គផ្តាច់ព្រ័ត្រ ដែលនឹងត្រូវធ្វើការប្រកួតនៅថ្ងៃទី២៨ ខែឧសភា ឆ្នាំ២០១១ ក្នុងពហុកីឡដ្ឋាន Wembley ទឹកដីអង់គ្លេស។ តើក្រុម Barcelona ឬក៏ Man Utd ជាអ្នកលើកពានរង្វាន់យូហ្វាឆេមពានលីកឆ្នាំ២០១១នេះ?
ចែករំលែកព័តមាននេះ