កីឡាករលំដាប់ទី១ពិភពលោករ៉ាហ្វាអែលណាដាល់និងកីឡាករស៊ែប៊ីណូវ៉ាក់ យ៉ូកូវិចបានឆ្លងចូលដល់ជុំទី៣នៃការប្រកួតតឺន្នីសMadrid Openយ៉ាងងាយស្រួលបន្ទាប់ពីបានបំបាក់គូប្រកួតរបស់ខ្លួនក្នុងជុំទី២កាលពីថ្ងៃពុធទី០៤ខែឧសភាកន្លងមកនេះ។ ការប្រកួតកម្មវិធីនេះត្រូវបានរៀបចំធ្វើនៅទីលានប្រកួតក្រុងម៉ាឌ្រីដប្រទេសអេស្ប៉ាញ ។
ណាដាល់បានយកឈ្នះកីឡាករម៉ាកូស បាដាទីសក្នុងលទ្ធផល២សិតជាប់ៗគ្នា៦-១និង៦-៣ខណៈកីឡាករយ៉ូកូវិចបានយកឈ្នះកីឡាករអាហ្វ្រិកខាងត្បូងឃេវីន អ៊ែនដឺសុនក្នុងលទ្ធផល៦-៣និង៦-៤ ។
នៅជុំបន្ទាប់ណាដាល់នឹងជួបប្រកួតជាមួយម្ចាស់ជើងឯកក្របខណ្ឌធំUS Openឆ្នាំ២០០៩ចូអាន ម៉ាទីនឌែលប៉ូត្រូដែលបានប្រើពេល៦៤នាទីយកឈ្នះកីឡាករក្រូអាស៊ីម៉ារីន ស៊ីលិចក្នុងលទ្ធផល៦-៣និង៦-០ ។
ណាដាល់បាននិយាយថា៖«ខ្ញុំគិតថាគេជាកីឡាករដែលអន់បំផុតដែលខ្ញុំបានជម្រុះចេញពីកម្មវិធីទី២នេះ»។
ចំណែកកីឡាករឌែលប៉ូត្រូមើលទៅហាក់ដូចជាមិនចង់ជួបជាមួយកីឡាករណាដាល់ដែលជាម្ចាស់ពានជើងឯកក្របខណ្ឌFrench Open៥សម័យនោះទេ ។ គេបាននិយាយថា៖«ទីនេះជាផ្ទះរបស់គេ(ណាដាល់) ដូច្នេះការប្រកួតរបស់គេពិតជាបានល្អខ្លាំងណាស់។ រយៈពេល២ឆ្នាំមកនេះ ណាដាល់តែងតែឈ្នះស្ទើរគ្រប់ការប្រកួត។កាលពីជុំទី១កីឡាករអាហ្សង់ទីនរូបនេះបានជម្នះនូវការឈឺចាប់ត្រគាករបស់ខ្លួនប្រកួតទាល់តែឈ្នះកីឡាកររុស្ស៊ីមីកហេល យូស្នីក្នុងលទ្ធផល៦-១,៣-៦និង៦-៣។ បន្ទាប់ពីទទួលបានជ័យជម្នះឌែលប៉ូត្រូបាននិយាយនៅពេលនោះថា៖«ខ្ញុំបានឈឺនៅផ្នែកត្រគាក តែខ្ញុំបានព្យាយាមប្រកួតទាល់តែចប់។ ទីបំផុតខ្ញុំយកឈ្នះទាល់តែបានបើទោះបីជារំខានដោយការឈឺចាប់ក៏ដោយ »។ កីឡាករអាហ្សង់ទីនរូបនេះបានបញ្ជាក់ទៀតថា គេបានព្យាយាមជម្នះរាល់បញ្ហាទាំងឡាយ ពោលគឺចាប់តាំងពីពេលដែលរូបគេបានយកឈ្នះពានជើងឯកនៅប្រទេសព័រទុយហ្គាល់មកម៉្លេះ។ ពិតជាដូចជាការគ្រោងទុកមែន បន្ទាប់ពីឌែលប៉ូត្រូឈ្នះកីឡាករក្រូអាស៊ីម៉ារីន ស៊ីលិច គេពិតជាអាចទៅជួបជាមួយកំពូលកីឡាកររ៉ាហ្វាអែល ណាដាល់ ។ ឌែលប៉ូត្រូបានបន្ថែមថា៖«ដំបូងខ្ញុំត្រូវប្រកួតជាមួយម៉ារីន ស៊ីលិច។ សង្ឃឹមថាខ្ញុំនឹងអាចយកឈ្នះគេបាន»។
កីឡាករបារាំងហ្សូវីលហ្វ្រ៊ី ហ្សុងហ្គាក៏បានទទួលនូវក្តីរីករាយផងដែរបន្ទាប់ពីទទួលបានជោគជ័យឆ្លងផុតជុំទី១។ ហ្សុងហ្គាបានយកឈ្នះកីឡាករអេស្ប៉ាញ៦-៤និង៦-២ ។ កីឡាករអេស្ប៉ាញដេវីដ ហ្វេរ័រក៏បានឈានចូលដល់ជុំទី៣ផងដែរបន្ទាប់ពីបានយកឈ្នះកីឡាករបារាំងអេឌ្រាន ម៉ង់ណារីណូក្នុងលទ្ធផល៧-៥,០-៦និង៦-០ ។
ឯកីឡាករយ៉ូកូវិចនៅជុំបន្ទាប់គេនឹងជួបជាមួយកីឡាករអេស្ប៉ាញហ្គិលឡេម៉ូ ហ្គាស្យ៉ាឡូប៉េស។ សូមបញ្ជាក់ថាកីឡាករឡូប៉េសនៅក្នុងការជួបគ្នាចំនួន៤លើករួចមកហើយជាមួយយ៉ូកូវិច គឺគេពុំទាន់អាចយកឈ្នះបានម្តងនៅឡើយទេ។ យ៉ូកូវិចបាននិយាយថា៖«វាជាការពិតដែលថាការប្រកួតរបស់ខ្ញុំល្អខ្លាំងណាស់ ហើយខ្ញុំពិតជាសប្បាយចិត្តចំពោះលទ្ធផលនេះ»។
កីឡាករតូម៉ាស់ បឺឌីនិងកីឡាកររ៉ូប៊ីន សូដឺលីងក៏បានឆ្លងផុតជុំទី២នោះដែរ ។
ចំណែកលទ្ធផលនៃការប្រកួតឯកត្តជនផ្នែកនារីវិញនាងសាម៉ាន់ថា ស្តូសួក៏បានឈានចូលដល់ជុំទី៣ផងដែរ។កីឡាការិនីអូស្ត្រាលីរូបនេះបានឆ្លងផុតជុំទី២បន្ទាប់ពីបានយកឈ្នះកីឡាការិនីស្លូវ៉ាគីដានៀលឡា ហ៊ែនទូឆូវ៉ាក្នុងលទ្ធផល៧-៦និង៧-៥ ។ សូមបញ្ជាក់ថាកាលពីខែមុននាងស្តូសួក៏ធ្លាប់បានយកឈ្នះនាងហ៊ែនទូឆូវ៉ាម្តងរួចមកហើយដែរ ។
នាងបាននិយាយថា៖«ខ្ញុំបានប្រឹងប្រែងប្រកួតយ៉ាងអស់ពីសមត្ថភាព ហើយខ្ញុំសប្បាយចិត្តដែលទទួលបានផលជាផ្លែផ្កាល្អបែបនេះ»។
កីឡាការិនីអុីតាលីហ្វ្រង់សេស្កា ស្គៀវ៉ូនក៏បានឆ្លងផុតជុំទី២ដែរបន្ទាប់ពីបានយកឈ្នះកីឡាការិនីមិត្តរួមជាតិខ្លួនសារ៉ា អេរ៉ានីក្នុងលទ្ធផល៦-០,២-៦និង៦-៣។ នាងលីណាបានយកឈ្នះនាងអុីវេតា បេណេសូវ៉ាក្នុងលទ្ធផល៦-១និង៦-៤ ៕
ចែករំលែកព័តមាននេះ