យោងទៅតាមប្រភពព័ត៌មាន AP ចេញផ្សាយពីទីក្រុងស៊ូរិច កាលពីថ្ងៃអង្គារ ទី៣ ខែឧសភា បានឱ្យដឹងថា FIFA បានកំណត់កាលបរិច្ឆេទខែកក្កដា ឆ្នាំ២០១២ ដើម្បីអនុម័តទទួលយកប្រព័ន្ធបច្ចេកវិទ្យា Goal-Line ជាផ្លូវការ ហើយអាចដាក់ឱ្យប្រើប្រាស់សាកល្បងមុនពេលការប្រកួតបាល់ទាត់ពិភពលោកឆ្នាំ២០១៤ នៅប្រទេសប្រេស៊ីស។
ក្រុមប្រឹក្សាគ្រប់គ្រងបាល់ទាត់ពិភពលោកបានអញ្ជើញអ្នកបច្ចេកទេសផលិតប្រព័ន្ធ Goal-Line ដើម្បីចូលរួមក្នុងដំណើរការធ្វើតេស្តបច្ចេកទេស២ដំណាក់កាលនៅក្នុងខែកញ្ញា ឆ្នាំ២០១១ និងខែមីនា ឆ្នាំ២០១២ ដែលមានការត្រួតពិនិត្យដោយវិទ្យាស្ថានត្រួតពិនិត្យបច្ចេកទេសឯករាជ្យមួយ។
លទ្ធផលចុងក្រោយនៃការវាយតម្លៃពីប្រព័ន្ធនឹងត្រូវយកទៅបង្ហាញដល់ក្រុមប្រឹក្សាសមាគមបាល់ទាត់អន្តរជាតិ (IFAB) នៅក្នុងកិច្ចប្រជុំពិសេសមួយនៅក្នុងខែកក្កដា ឆ្នាំ២០១២។
នៅក្នុងរបាយការណ៍ IFAB បានលើកឡើងថា FIFA បានបន្ទន់ជំហររបស់ខ្លួនដោយយល់ព្រមទទួលយកសំណើសុំឱ្យមានការបំពាក់ប្រព័ន្ធបច្ចេកវិទ្យា Goal-Line ដើម្បីជួយការងារលោកអាជ្ញាកណ្តាលក្នុងការកាត់ក្តីប្រកបដោយតម្លាភាពនៅពេលបាល់ឆ្លង ឬមិនឆ្លងគំនូសពណ៌ស។
យោងទៅតាមប្រភពព័ត៌មានពីក្រុមប្រឹក្សាសមាគមបាល់ទាត់ពិភពលោកបានឱ្យដឹងដែរថា រហូតមកដល់ពេលនេះមានប្រព័ន្ធបច្ចេកវិទ្យា Goal-Line ប្រហែលជាង១០ប្រភេទត្រូវបានយកមកធ្វើតេស្តកាលពីខែមីនា ឆ្នាំ២០១១ ប៉ុន្តែគ្មានប្រព័ន្ធ Goal-Line ណាមួយមានកម្រិតស្តង់ដាដែលអាចទទួលយកបាននោះទេ។
ក្រុមប្រឹក្សាសមាគមបាល់ទាត់ពិភពលោកបានបន្តទៀតថា ក្រុមហ៊ុនបច្ចេកវិទ្យាដែលមានបំណងដេញថ្លៃធ្វើប្រព័ន្ធនេះត្រូវជម្រាបជូនដំណឹងទៅ FIFA នៅខែក្រោយ។
គួររំលឹកដែរថា ប្រព័ន្ធបច្ចេកវិទ្យា Goal-Line នេះត្រូវបានលោក Sepp Blatter ប្រធាន FIFA ធ្លាប់បានជំទាស់អស់រយៈពេលជាយូរមកហើយ តែលោកបានបន្ទន់ឥរិយាបថវិញក្រោយពីមានរឿងដ៏ចម្រូងចម្រាស់រវាងការប្រកួតក្រុមអាល្លឺម៉ង់ និងអង់គ្លេស ដែលពេលនោះគ្រាប់បាល់របស់កីឡាករហ្វ្រែង ឡាំផាដ ទាត់ចូលហួសគំនូសស តែត្រូវអាជ្ញាកណ្តាលបដិសេធកាលពីប្រកួតបាល់ទាត់ពិភពលោកឆ្នាំ២០១០ នៅអាហ្វ្រិកខាងត្បូង។ ដូច្នេះដើម្បីចៀសវាងនូវកំហុស លោកត្រូវទទួលយកបច្ចេកវិទ្យានេះ៕
ចែករំលែកព័តមាននេះ