ខេត្តបាត់ដំបង ៖ ជនមិនស្គាស់អត្តសញ្ញាណម្នាក់បានជិះកង់យកទៅបន្លំប្ដូរយកម៉ូតូម៉ាក Scoopy ស៊េរីឆ្នាំ ២០២១មួយគ្រឿង រួចជិះគេចខ្លួនដោយសុវត្ថិភាព កាលពីរសៀលថ្ងៃទី០៦ មិថុនា នៅចំណុចស្ដង់លក់-ទិញម៉ូតូមួយកន្លែងនៅភូមិអូរចា…
ខេត្តបាត់ដំបង ៖ ជនមិនស្គាស់អត្តសញ្ញាណម្នាក់បានជិះកង់យកទៅបន្លំប្ដូរយកម៉ូតូម៉ាក Scoopy ស៊េរីឆ្នាំ ២០២១មួយគ្រឿង រួចជិះគេចខ្លួនដោយសុវត្ថិភាព កាលពីរសៀលថ្ងៃទី០៦ មិថុនា នៅចំណុចស្ដង់លក់-ទិញម៉ូតូមួយកន្លែងនៅភូមិអូរចា សង្កាត់អូរចា ក្រុងបាត់ដំបង ដោយបានបន្សល់ទុកកង់និងរូបជនសង្ស័យនៅក្នុងកាមេរ៉ាសុវត្ថិភាពសម្រាប់ឲ្យសមត្ថកិច្ចធ្វើការស្រាវជ្រាវបន្ត ។ ប្រភពពីសមត្ថកិច្ចបានឲ្យដឹងថា ស្ដង់លក់ទិញម៉ូតូនោះមានយីហោ «ឈុនលី» ស្ថិតនៅចំណុចភូមិ-សង្កាត់ខាងលើ ។
ជនគ្មានអត្តសញ្ញាណនោះ បានឆក់ឱកាសជិះកង់យកទៅបន្លំប្ដូរយកម៉ូតូម៉ាក Scoopy ខាងលើនេះ នៅពេលម្ចាស់ហាងលក់ម៉ូតូរវល់ចូលក្នុងផ្ទះមួយភ្លែត ខណៈម៉ូតូម៉ាកចម្រុះ និងស៊េរីទំនើបៗរាប់សិបគ្រឿងដាក់តាំងលក់ត្រៀបត្រានៅខាងមុខ ។ ប្រភពបានបន្តថា ជនសង្ស័យបានទុកកង់នៅទីនោះ រួចឡើងជិះម៉ូតូចេញទៅបាត់តែម្ដង ខណៈសោម៉ូតូនៅជាប់នឹងម៉ូតូនោះស្រេច ដោយបានបន្សល់ទុកតែរូបភាពជាប់ក្នុងកាមេរ៉ាសុវត្ថិភាព ទាំងកង់ទាំងមនុស្ស ។ បើតាមសមត្ថកិច្ចស្រង់សំដីម្ចាស់ហាងលក់ម៉ូតូបានបំភ្លឺថា គាត់ទើបជិះម៉ូតូចូលកន្លែងលក់ ហើយទុកនៅខាងមុខក្បែរម៉ូតូរាប់សិបគ្រឿងទៀត ដោយប្រញាប់ចូលបន្ទប់ទឹកមិនបានដកសោចេញ តែមិនបានប៉ុន្មាននាទីផង ស្រាប់តែចេញមកវិញក៏បាត់ម៉ូតូល្មម ។
គាត់បានឆែកមើលកាមេរ៉ាសុវត្ថិភាព ក៏ឃើញយ៉ាងច្បាស់នូវជនម្នាក់បានជិះកង់កញ្ចាស់រេរាៗ មកឈប់នៅខាងមុន ក្រឡេកមើលឆ្វេងស្ដាំក៏ស្រាប់តែទុកកង់ចោលឡើងជិះម៉ូតូគាត់ចេញទៅយ៉ាងស្រូលបាត់ស្រមោលមួយរំពេច ។ បើនិយាយពីសកម្មភាពលោកនៅក្នុងកាមេរ៉ាសុវត្ថិភាពវិញ ។ ដំបូងគេឃើញជនម្នាក់នោះ ជិះកង់រេរាៗងាកឆ្វេងងាកស្ដាំនៅខាងមុខហាងលក់ម៉ូតូ ។ ជននោះបានព្យាយាមជិះយឺតៗចូលទៅខាងមុខស្ដង់លក់ម៉ូតូ ហើយបានឈប់ទីនោះ តែងាកឆ្វេងស្ដាំដែលទំនងរកមើលម្ចាស់ហាង ។
ពេលនោះ គេមិនឃើញមានមនុស្សម្នានៅក្នុងហាងទេ ស្រាប់តែជនសង្ស័យបានទុកកង់នៅទីនោះ រួចឡើងជិះម៉ូតូម៉ាក Scoopy ពណ៌.សមួយគ្រឿង ចេញទៅយ៉ាងលឿនមុនពេលម្ចាស់ចេញពីក្នុងផ្ទះ ។ ម្ចាស់ហាងលក់ម៉ូតូនេះ បានរាយការណ៏ប្ដឹងទៅសមត្ថកិច្ចភ្លាមៗដែរ ក្រោយកើតហេតុ។ បើតាមសមត្ថកិច្ចបានប្រាប់ថា ក្រោយទទូលដំណឹងពីជនរងគ្រោះមន្ត្រីជំនាញបានចុះទៅសួរនាំជនរងគ្រោះ និងបានពិនិត្យរូបភាពជនសង្ស័យដែលជិះកង់ទៅប្ដូរយកម៉ូតូស៊េរីទំនើបនោះហើយ ។ ប៉ុន្តែហាក់មិនទាន់មានតម្រុយពីមុខសញ្ញា ឬ ប្រភពរស់នៅរបស់ជនដៃដល់នោះនៅឡើយទេ ព្រោះកំពុងធ្វើការស្រាវជ្រាវ ៕
ចែករំលែកព័តមាននេះ