រាជធានីភ្នំពេញ ៖ មន្រ្តីសាលាក្តីខ្មែរក្រហមបានឲ្យដឹងថា នៅវេលាម៉ោង៩និង៣០នាទី ព្រឹកថ្ងៃទី៤ ឧសភា អង្គជំនុំជម្រះសាលាដំបូងនៃសាលាក្តីខ្មែរក្រហម បានបើកសវនាការជំនុំជម្រះលើវិធាន៦៨.៣ ស្តីពី «ការស្នើសុំនៅក្រៅឃុំជាបណ្តោះអាសន្នពីសំណាក់អៀង សារី» ដោយមានការចូលរួមពីសំណាក់ជនជាប់ចោទ អៀង សារី អាយុ៨៥ឆ្នាំ ដែលបានបង្ហាញ
រាជធានីភ្នំពេញ ៖ មន្រ្តីសាលាក្តីខ្មែរក្រហមបានឲ្យដឹងថា នៅវេលាម៉ោង៩និង៣០នាទី ព្រឹកថ្ងៃទី៤ ឧសភា អង្គជំនុំជម្រះសាលាដំបូងនៃសាលាក្តីខ្មែរក្រហម បានបើកសវនាការជំនុំជម្រះលើវិធាន៦៨.៣ ស្តីពី «ការស្នើសុំនៅក្រៅឃុំជាបណ្តោះអាសន្នពីសំណាក់អៀង សារី» ដោយមានការចូលរួមពីសំណាក់ជនជាប់ចោទ អៀង សារី អាយុ៨៥ឆ្នាំ ដែលបានបង្ហាញ ខ្លួននៅចំពោះមុខអង្គសវនាការនិងមេធាវីការពារក្តីរបស់ជនជាប់ចោទ។
ក្រោយពីបើកសវនាការសួរដេញដោលមេធាវីការពារក្តីឱ្យជនជាប់ចោទអៀង សារី ដែលបានដាក់បង្ហាញឯកសារទាមទារឱ្យកូនក្តីបាននៅក្រៅឃុំ និងបានលើកហេតុផលជាច្រើនមកបង្ហាញក្នុងសវនាការនោះអស់រយៈពេលជិត២ម៉ោងមក លោកនិល ណុន សហចៅក្រមភាគីកម្ពុជានៃសាលាដំបូងរបស់សាលាក្តីខ្មែរក្រហមបានប្រកាសបិទអង្គសវនាការ។ លោកនិល ណុន បានប្រកាសថា សាលាដំបូងនៃសាលាក្តីខ្មែរក្រហម នឹងប្រកាសសាលក្រមនៃសវនាការសុំនៅក្រៅឃុំរបស់ជនជាប់ចោទអៀង សារី នៅពេលក្រោយតែពុំបានកំណត់ពីពេលវេលាទេ។ មេធាវីការពារក្តីឱ្យអៀង សារី គឺលោកអាង ឧត្តម បានទាមទារឱ្យកូនក្តីរបស់ខ្លួនបានទទួលការអនុញ្ញាតរស់នៅក្រៅឃុំដោយសំអាងថា លោកអៀង សារី មានវ័យចាស់ជរា និងមានជំងឺដែលត្រូវការសម្រាកព្យាបាលនៅផ្ទះ។
មានអតីតមេដឹកនាំជាន់ខ្ពស់ខ្មែរក្រហមចំនួន៣នាក់ហើយដែលបានប្តឹងទាមទារសុំនៅក្រៅឃុំនោះ គឺនួន ជា, ខៀវ សំផន និងអៀង ធីរីទ្ធ (ប្រពន្ធអៀង សារី) ក៏ប៉ុន្តែសាលាដំបូងនៃសាលាក្តីមិនបានអនុញ្ញាតឱ្យពួកគេរស់នៅក្រៅឃុំឡើយ ដោយហេតុផលខ្លាចប៉ះពាល់សុវត្ថិភាពជនជាប់ចោទទាំងនោះ។ ដូច្នេះជនជាប់ចោទ អៀង សារី ក៏ប្រហែលជាពុំទទួលបានការអនុញ្ញាតឱ្យរស់នៅក្រៅឃុំដូចគ្នាដែរ។
លោកឌឹម សុវណ្ណារុំ អ្នកនាំពាក្យសាលាក្តីបានថ្លែងថា នៅក្នុងសវនាការមានការចូលរួមពីភាគីទាំងអស់ដែលពាក់ពន្ធ័រួមមាន វត្តមានជនជាប់ចោទអៀង សារី និងសហមេធាវីការពារក្តី។ ទោះបីជាយ៉ាងណា សាលាក្តីនៅមិនទាន់កំណត់ពេលនៃការប្រកាសសាលក្រមក្នុងសំណុំរឿងនេះនៅឡើយទេ។ លោកឌឹម សុវណ្ណារុំ បន្តថា ចំណែកឯសំណុំរឿងក្តីរបស់ឌុច សាលាក្តីគ្រោងប្រកាសនៅចុងខែមិថុនា ២០១១។
ក្រោមការគ្រប់គ្រងរបស់មេដឹកនាំនៃរបបខ្មែរក្រហម ប្រជាពលរដ្ឋខ្មែរជិត២លាននាក់ត្រូវបានសម្លាប់ក្នុងរយៈពេលជាង៣ឆ្នាំ។ អតីតមេដឹកនាំជាន់ខ្ពស់ និងអ្នកទទួលខុសត្រូវខ្ពស់បំផុតនៃរបបនេះចំនួន៥នាក់ត្រូវបាននាំយកមកកាត់ទោសពីបទឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ ដែលស្ថិតនៅក្នុងសំណុំរឿងលេខ០០១ និងលេខ០០២៕
ចែករំលែកព័តមាននេះ