ខេត្តសៀមរាប ៖ រដូវវស្សាជារដូវ ដែលមានភ្លៀងធ្លាក់ ធ្វើឱ្យរុក្ខជាតិតូចធំ ដុះយ៉ាងស្រស់បំព្រង តែរុក្ខជាតិទាំងនោះ ក៏មានផលប៉ះពាល់ខ្លះៗដែរ ដូច្នេះអាជ្ញាធរជាតិអប្សរា តែងតែធ្វើការសម្អាតស្មៅ និងរុក្ខជាតិតូចៗ ដែលដុះនៅលើប្រាសាទជាប្រចាំ ដើម្បីរក្សាសោភ័ណភាព ការពារកុំឱ្យស្មៅ និងរុក្ខជាតិទាំងនោះ បំផ្លាញភាពស្រស់ស្អាត។ ចំណែកឯ ឫសរបស់វា ក៏បង្កឱ្យខូចខាតដល់ថ្ម និងរចនាសម្ពន្ធប្រាសាទផ្សេងៗជាច្រើនទៀតរបស់ប្រាសាទដែរ នេះបើយោងតាមអាជ្ញាធរជាតិអប្សរា ចេញផ្សាយនៅថ្ងៃទី០៥ មិថុនា ២០២៣នេះ ។
បើយោងតាមលោក ងិន ធី ប្រធានកម្មករផ្នែកសម្អាតប្រាសាទ បានអោយដឹងថា ការសម្អាតនេះ ធ្វើឡើងជាញឹកញាប់ជាងគេ គឺនៅរដូវវស្សា ព្រោះមានភ្លៀងធ្លាក់ងាយធ្វើឱ្យរុក្ខជាតិតូចៗ និងស្មៅដុះលឿន ។ រីឯ បច្ចេកទេសក្នុងការសម្អាតតាមប្រាសាទធ្វើឡើងដោយមានជណ្ដើរ មួកសុវត្ថិភាព ក្នុងការរក្សាសុវត្ថិភាពពេលឡើងទៅលើកំពូលប្រាសាទ ឬផ្នែកផ្សេងៗ ដើម្បីដកស្មៅ និងកូនរុក្ខជាតិតូចៗ៕
ចែករំលែកព័តមាននេះ