អារ៉ាប៊ីសាអូឌីត ៖ តម្លៃប្រេងបានកើនឡើង បន្ទាប់ពីអារ៉ាប៊ីសាអូឌីតបានអះអាងថា ខ្លួននឹងកាត់បន្ថយចំនួនប្រេង១លានបារ៉ែលក្នុងមួយថ្ងៃ (bpd) នៅក្នុងខែកក្កដា ខាងមុខនេះ។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី០៥ ខែមិថុនា ឆ្នាំ២០២៣។
ប្រភពដដែលបានបន្តថា សមាជិកផ្សេងទៀត នៃអង្គការ OPec+ ដែលជាក្រុមប្រទេសផលិតប្រេងក៏បានយល់ព្រមបន្តកាត់បន្ថយផលិតកម្មក្នុងការប៉ុនប៉ងដើម្បីលើកទង់សម្រាប់តម្លៃ ខណៈដែល OPec+ មានចំនួនប្រហែល ៤០% នៃប្រេងឆៅរបស់ពិភពលោក ហើយការសម្រេចចិត្តរបស់វាអាចមានឥទ្ធិពលយ៉ាងខ្លាំងទៅលើតម្លៃប្រេងសកល។
នៅក្នុងពាណិជ្ជកម្មអាស៊ី នៅថ្ងៃទី០៥ ខែមិថុនា ឆ្នាំ២០២៣ ប្រេងឆៅ Brent បានកើនឡើងដល់ទៅ ២.៤% មុនពេលមានតម្លៃប្រហែល ៧៧ដុល្លារក្នុងមួយបារ៉ែល។ អង្គការ OPec+ បានអះអាងថា គោលដៅផលិតកម្មនឹងធ្លាក់ចុះ ១.៤លានបារ៉ែលក្នុងមួយថ្ងៃ បន្ថែមពីឆ្នាំ ២០២៤ ខណៈដែលកិច្ចប្រជុំរយៈពេល៧ម៉ោង កាលពីថ្ងៃទី០៤ ខែមិថុនា កន្លងទៅ នៃប្រទេសដែលសម្បូរប្រេង បានបង្ហាញអំពីប្រឆាំងនឹងចំពោះការធ្លាក់ចុះនៃតម្លៃថាមពល។
តម្លៃប្រេងបានកើនឡើង នៅពេលប្រទេសរុស្ស៊ីបានឈ្លានពានលើប្រទេសអ៊ុយក្រែន កាលពីឆ្នាំមុន ប៉ុន្តែឥឡូវនេះ តម្លៃបានត្រឡប់មកវិញ ក្នុងកម្រិតមុនពេលសង្គ្រាមរវាងប្រទេសទាំងពីរចាប់ផ្តើម។
កាលពីខែតុលាឆ្នាំមុន អង្គការ OPec+ ដែលជាទម្រង់មួយ សំដៅទៅលើអង្គការប្រទេសនាំចេញប្រេង និងសម្ព័ន្ធមិត្តរបស់ខ្លួន បានយល់ព្រមកាត់បន្ថយការផលិតចំនួន ២លានបារ៉ែលក្នុងមួយថ្ងៃ ដែលប្រហែល ២% នៃតម្រូវការពិភពលោក។ នៅក្នុងខែមេសាឆ្នាំនេះ ក្រុមដដែលនេះ បានយល់ព្រមលើការកាត់បន្ថយបន្ថែមទៀត ដែលនឹងត្រូវបន្តរហូតដល់ដំណាច់ឆ្នាំនេះ។ ប៉ុន្តែទោះយ៉ាងណាក៏ដោយ ឧបនាយករដ្ឋមន្ត្រីរបស់ប្រទេសរុស្ស៊ី លោក Alexander Novak បានថ្លែងថា កិច្ចពិភាក្សាកាលពីថ្ងៃទី០៤ ខែមិថុនា កន្លងទៅ បាននាំទៅដល់ការបន្តកិច្ចព្រមព្រៀងរហូតដល់ចុងឆ្នាំ ២០២៤។
កាលពីថ្ងៃទី០៤ ខែមិថុនា កន្លងទៅ រដ្ឋមន្ត្រីថាមពលអារ៉ាប៊ីសាអូឌីត ព្រះអង្គម្ចាស់ Abdulaziz bin Salman បានបញ្ជាក់ថា ការកាត់បន្ថយប្រេងចំនួន ១លានបារ៉ែលក្នុងមួយថ្ងៃរបស់អារ៉ាប៊ីសាអូឌីត អាចត្រូវបានពន្យារពេលលើសពីខែកក្កដា ប្រសិនបើចាំបាច់ ដែលការលើកឡើងនេះ ត្រូវបានគេមើលឃើញថា គឺជាការដេញថ្លៃ ដើម្បីរក្សាស្ថិរភាពទីផ្សារប្រេង៕
ចែករំលែកព័តមាននេះ