សម្ដេចតេជោ ៖ កម្ពុជានឹងចាកចេញពីប្រទេសអភិវឌ្ឍន៍តិចតួចនៅឆ្នាំ២០២៧
- ភ្នំពេញ
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានមានជំនឿថា កម្ពុជានឹងចាកចេញពីប្រទេសអភិវឌ្ឍន៍តិចតួចនៅឆ្នាំ២០២៧ ខាងមុខ ទោះបីភាពមិនច្បាស់លាស់នូវបញ្ហាការប្រែប្រួលអាកាសធាតុ ជំងឺរាតត្បាត និងភូមិសាស្ដ្រនយោបាយក៏ដោយ ។
សម្តេចតេជោ បានថ្លែងក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សា ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកថ្ងៃទី៥ ខែមិថុនា ឆ្នាំ២០២៣ នៅមជ្ឈមណ្ឌលកោះពេជ្រថា កំណើនសេដ្ឋកិច្ចរបស់កម្ពុជាបាន និងកំពុងមានសព្វថ្ងៃនេះផ្ដល់ឱកាសឱ្យកម្ពុជាឈានទៅសម្រេចគោលដៅខាងលើនេះផងដែរ ។
សម្ដេច នាយករដ្ឋមន្ដ្រីបានគូសបញ្ជាក់យ៉ាងដូច្នេះថា ៖«ប៉ុន្តែយ៉ាងណាក៏ដោយបើទោះបីមានបញ្ហាប្រឈមផ្នែកទាក់ទិនជាមួយនឹងបញ្ហាការប្រែប្រួលអាកាសធាតុ ជំងឺរាតត្បាត និងភាពមិនច្បាស់លាស់នៃភូមិសាស្ដ្រនយោបាយ តែខ្ញុំមានជំនឿក្នុងចិត្ត ហើយជំនឿជាក់លាក់ទៀតផងនៅត្រង់ថា កម្ពុជានឹងចាកចេញពីប្រទេសអភិវឌ្ឍន៍តិចតួចនៅក្នុងឆ្នាំ២០២៧ យ៉ាងយូរបំផុត ហើយបន្តទៅយើងនឹងដើរដល់គោលដៅនៃការបង្កើនប្រាក់ចំណូលមធ្យមកម្រិតខ្ពស់ នៅក្នុងឆ្នាំ២០៣០ ដូចអ្វីដែលដាក់ចេញជាគោលដៅនៃការអភិវឌ្ឍប្រកបចីរភាព» ។
ជាមួយគ្នានោះដែរ សម្ដេចតេជោ បានថ្លែងថា ការរៀនសូត្រត្រូវធ្វើជាប់ជាប្រចាំ ប្រសិនបើការរៀននោះនៅត្រឹងនឹងក្លាយជាជនអភិរក្សនិយមដ៏គួរឱ្យខ្លាចព្រោះ ពិភពលោក និងបច្ចេកវិទ្យាពិតជាដើរលឿនណាស់ ។ សម្ដេច នាយករដ្ឋមន្ដ្រី បានថ្លែងឱ្យដឹងថា «ខ្ញុំសូមបញ្ជាក់ថា សារភាពការណ៍ពិភពលោកដើរលឿនណាស់ បច្ចេកវិទ្យាដើរលឿនណាស់ ដូច្នេះតម្រូវឱ្យយើងមានរៀនសូត្រជាប់ជាប្រចាំមិនអាចនៅត្រឹងបានទេ ប្រសិនបើយើងនៅត្រឹង គឺយើងនឹងក្លាយជាជនអភិរក្សនិយមដ៏គួរឱ្យខ្លាច» ។
ឆ្លៀតឱកាសនោះ សម្ដេចតេជោ ហ៊ុន សែន ក៏បានណែនាំឲ្យយកចិត្តទុកដាក់ ទៅលើស្ត្រីឲ្យបន្តទទួលបានការបណ្ដុះបណ្ដាល ខណៈស្ត្រីបានដើរតួនាទីសំខាន់ទាំងសេដ្ឋកិច្ចក្នុងប្រ័ពន្ធ និងក្រៅប្រព័ន្ធ ។ សម្ដេចគូសបញ្ជាក់ថា «ចឹងទេឥឡូវហ្នឹង យើងឃើញនៅក្នុងចំណោមសេដ្ឋកិច្ចទាំងក្នុងប្រព័ន្ធទាំងក្រៅប្រព័ន្ធ ស្ត្រីបានដើរតួនាទីសំខាន់ណាស់ អញ្ចឹងយើងក៏ត្រូវផ្ដោតការយកចិត្តទុកដាក់ជំរុញបន្តទៀតលើកទឹកចិត្តឲ្យស្ត្រីទទួលបាននូវការបណ្ដុះបណ្ដាល»៕
ចែករំលែកព័តមាននេះ