អាជីវករនាំគ្នាត្អូញត្អែររឿងស្ងាត់ម៉ូយ លក់មិនដាច់ រកលុយបង់ថ្លៃតូប និងធនាគារស្ទើរមិនចង់បាន
- ប៉ៃលិន
ខេត្តប៉ៃលិន ៖ រហូតមកដល់ថ្ងៃទី០៤ ខែមិថុនា ឆ្នាំ២០២៣នេះ គេសង្កេតឃើញអាជីវករលក់ដូរនៅក្នុងផ្សារសាមគ្គី ហៅប៉ាហ៊ី បាននាំគ្នាត្អូញត្អែរពីការលក់មិនសូវដាច់ ស្ងាត់ម៉ូយ ដោយអ្នកខ្លះសម្រេចចិត្តបិទតូបជាបណ្តោះអាសន្ន និងអ្នកខ្លះទៀតបន្តលក់ដូរក្នុង១ថ្ងៃៗស្ទើរតែរកថវិកាបង់ថ្លៃតូប និងថ្លៃធនាគារស្ទើរតែមិនបានឡើយ។
បើតាមការរៀបរាប់ពីអាជីវករម្នាក់មានឈ្មោះ គន្ធា ភេទស្រី បានរៀបរាប់ឱ្យដឹងថា ផ្សារសាមគ្គី ហៅប៉ាហ៊ីសព្វថ្ងៃនេះ ហាក់បីដូចជាមានសភាពស្ងប់ស្ងាត់ មានតែអ្នកលក់ អត់មានអ្នកចូលទិញអីវ៉ាន់នោះទេ។
អាជីវករខាងលើបន្តថា ស្របពេលដែលលក់ដូរមិនសូវដាច់ ងាកៗបង់ថ្លៃតូប ធ្មេចបើកៗដល់ថ្ងៃបង់ធនាគារ ដោយតូបខ្លះចាប់តាំងពីព្រឹករហូដល់ពេលថ្ងៃទៅហើយនៅមិនទាន់ឃើញម្ចាស់មកបើកទ្វារលក់ដូរនោះទេ ព្រោះស្ងាត់ពេក ក៏នាំគ្នាបិទតូបទុកចោលមួយរយៈសិន។ ខណៈអ្នកខ្លះបាក់ទឹកចិត្ត អ្នកខ្លះទៀតក៏គ្មានកម្លាំងក្នុងការបើកតូប។ ម្យ៉ាងវិញទៀត មិនដឹងបើកតូបលក់ឱ្យនរណានោះទេ0x017d7 បើមានតែអ្នកលក់ អត់មានអ្នកចូលទិញ ពោលគឺស្ងាត់ជ្រៀបតែម្តង។
អាជីវកររូបនេះបញ្ជាក់ថា ចំណែកឯនៅផ្នែកខាងក្នុងផ្សារវិញមើលទៅគួរឱ្យសង្វេគ ដោយអាជីវករខ្លះបិទតូបខាងក្នុងចេញទៅលក់ដូរនៅតាមចិញ្ចើមផ្លូវផ្នែកខាងក្រៅ ក្រែងលោមានអតិថិជនឈប់ម៉ូតូចុះទិញ តែបើលក់ដូរនៅខាងក្នុងគឺចប់តែម្តង។
គាត់និយាយទាំងទឹកមុខក្រៀមក្រំបន្ថែមទៀតថា ឱ្យសង្ឃឹមអ្វីទៀត បើការលក់ដូរស្ទើរពេញ១ថ្ងៃ អត់មានអ្នកចូលកៅឆាយអីវ៉ាន់សូម្បីតែម្នាក់។ ហើយវិលចុះវិលឡើង ត្រូវតែខិតខំរកលុយបង់ថ្លៃតូប និងថ្លៃជំពាក់បំណុលគេយ៉ាងផុតមុខផុតក្រោយ។
លើសពីនេះ ហេតុផលធំៗមួយចំនួនដែលអត់សូវមានអតិថិជនចូលទិញអីវ៉ាន់ក្នុងផ្សារ គឺ ៖
ទី១- មនុស្សឥឡូវមិនចង់ចូលក្នុងផ្សារទេ គេច្រើនដើរទិញខាងក្រៅ លឿនឆាប់រហ័ស ងាយស្រួលចតឡាន និងម៉ូតូ។
ទី២- គេលក់ដូរតាមអនឡាញ ព្រោះការរកថវិការតាមវិធីនេះ កំពុងតែរីកដុះដាលច្រើនដូចផ្សិត មនុស្សម្នាភាគច្រើនចូលចិត្តទិញទំនិញតាមអនឡាញ ងាយស្រួលដឹកមកដល់ផ្ទះស្រាប់តែម្តង៕
ចែករំលែកព័តមាននេះ