ភ្នំពេញ៖ ក្នុងសារជាសំឡេងជូនជាពិសេសដល់អ្នកចម្រៀង មាស សុខសោភា នាយប់ថ្ងៃទី៤ ខែមិថុនានេះ សម្តេចតេជោ ហ៊ុន សែន បានប្រាប់​ឱ្យអ្នកចម្រៀងរូបនេះ ដកចេញពីហ្វេសប៊ុក​របស់ខ្លួន​នូវបទចម្រៀង មានចំណងជើងថា «មរណភាព​ព្រះស្វាមី ជ័យវរ្ម័នទី៧»។ មូលហេតុ ត្រូវបានសម្តេចតេជោ ប្រកាសថា ចម្រៀងនោះ មានលក្ខណៈ​បំភៃ​ប្រវត្តិសាស្ត្រ ពាក់ព័ន្ធនឹង​អតីត​ព្រះមហាក្សត្រខ្មែរ ដែល​ប្រជាជនកម្ពុជា ១៧លាននាក់ កំពុងគោរព​។

សូមរម្លឹកថា នៅព្រលប់ថ្ងៃទី៤មិថុនានេះ ក្រសួងវប្បធម៌ និងវិចិត្រសិល្បះ ក៏បានប្រកាស ទទូចសុំឲ្យអ្នកនាង មាស សុខសោភា ​និងអ្នកពាក់ព័ន្ធផ្សេងទៀត លុបចោលបទចម្រៀង «មរណភាពព្រះស្វាមី ជ័យវរ្ម័នទី៧» ពីបណ្តាញសង្គមហ្វេសប៊ុក និងបណ្តាញសង្គមផ្សេងទៀត ជាបន្ទាន់។ ស្របជាមួយគ្នានេះ ក្រសួងស្នើសុំចំពោះសាធារណជន មេត្តាកុំចែករំលែក​ផ្សព្វផ្សាយបទចម្រៀងនេះ បន្ត។

ក្រសួងវប្បធម៌ និងវិចិត្រសិល្បៈ សូមបញ្ជាក់ជូនថា ការផលិតបទចម្រៀងខាងលើ គឺពុំមានភស្តុតាង​​ពិតប្រាកដ ដែលជាហេតុ បង្កឲ្យមានការភ័នច្រឡំ ចំពោះប្រវត្តិសាស្រ្តកម្ពុជា។

ក្រសួងវប្បធម៌ និងវិចិត្រសិល្បះ ក៏សូមអំពាវនាវ ចំពោះសិល្បករ ក៏ដូចជាផលិតករទាំងអស់ ដែលចង់បង្កើត និងផលិតស្នាដៃ ពាក់ព័ន្ធនឹងវប្បធម៌ ឬប្រវត្តិសាស្រ្តជាតិ សូមធ្វើការសិក្សាស្រាវ​ជ្រាវ​ឲ្យបានគ្រប់ជ្រុងជ្រោយ ឬក៏អាចស្នើសុំសហការជាមួយក្រសួងវប្បធម៌ ឬអ្នកស្រាវ​ជ្រាវនានា ដើម្បីរក្សានូវតម្លៃប្រវត្តិសាស្រ្ត និងវប្បធម៌ដ៏ផូរផង់របស់ជាតិ៕