រាជធានីភ្នំពេញ ៖ មន្ត្រីជាន់ខ្ពស់មួយរូប នៅក្រសួងមហាផ្ទៃ និងអ្នកស្រាវជាវមួយរូបនៅរាជបណ្ឌិតសភាកម្ពុជា បានប្រតិកម្មជាខ្លាំងទៅលើបទចម្រៀងថ្មីមួយបទមានចំណងជើងថា «មរណភាពព្រះស្វាមីជ័យវរ្ម័នទី៧» ដែលបទចម្រៀងមួយបទនេះ បកស្រាយដោយតារាចម្រៀងជួរមុខនៅកម្ពុជា គឺអ្នកនាង មាស សុខសោភា។
តារាចម្រៀងស្រីដែលមានទឹកដមសម្លេងផ្អែមស្រទន់ បានបង្ហោះវីដេអូចម្រៀងមួយមានចំណងជើងថា «មរណភាពព្រះស្វាមីជ័យវរ្ម័នទី៧» អមដោយសារអះអាងថា បទចម្រៀងមួយនេះដែរ «ជាការសំណូមពរសុំរបស់លោកតាសក់.សភ្នំត្បែង រៀបរាប់ពីប្រវត្តិនៃការសោយទីវង្គតដ៏សែនកំសត់របស់ព្រះបាទជ័យវរ្ម័នទី៧ និងជាការរំលឹកដឹងគុណរបស់ទ្រង់ដែលបានលះបង់ និងខិតខំថែរក្សាទឹកដីមហានគរក្នុងនាមយើងជាកូនខ្មែរគ្រប់អង្គ សូមប្រសិទ្ធិពរជ័យ សូមទ្រង់ទទួលបាននូវព្រះសុខភាពជាងរយពាន់ព្រះវស្សា និងជោគជ័យគ្រប់ភារៈកិច្ចឈ្នះអស់មារសត្រូវ »។
យ៉ាងណាមិញ នៅរសៀលថ្ងៃទី៤ ខែមិថុនា ឆ្នាំ២០២៣ លោក ហ៊ុយ វណ្ណៈ រដ្ឋលេខាធិការ ក្រសួងមហា និងជាប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានបញ្ចេញប្រតិកម្មខ្លាំងៗ ដោយរូបលោកបានសុំអោយអ្នកចម្រៀង មាស សុខភា លុបបទចម្រៀង «មរណភាពព្រះស្វាមី ជ័យវរ្ម័នទី៧» ចោលទៅ ព្រោះវាធ្វើឱ្យប៉ះពាល់ដល់ប្រវត្តិសាស្ដ្រ។
លោក ហ៊ុយ វណ្ណៈ បានសរសេរសារលើបណ្តាញសង្គមហ្វេសប៊ុកផ្លូវការរបស់លោកថា «បទចម្រៀង «មរណភាពព្រះស្វាមីជ័យវរ្ម័នទី៧» ធ្វើឱ្យខ្ញុំភ្ញាក់ខ្លួន និងតក់ស្លុតខ្លាំងណាស់»។ «ខ្ញុំក៏ជាអ្នកអក្សរសាស្ត្រ និងជាអ្នកស្រាវជ្រាវប្រវត្តិសាស្ត្រខ្មែរមួយរូបដែរ ប៉ុន្តែមិនធ្លាប់ប្រទះឃើញឯកសារស្តីពីការសោយព្រះទីវង្គតរបស់ព្រះបាទជ័យវរ្ម័នទី៧ ដែលជាមហាក្សត្រខ្មែរដ៏ល្បីល្បាញ និងជាទីគោរពរបស់ខ្មែរយើង ដូចបានរៀបរាប់ក្នុងខ្លឹមសារបទចម្រៀងនេះទេ»។ នេះជាការបញ្ជាក់របស់លោក ហ៊ុយ វណ្ណៈ។
លោកបន្តថា «ខ្ញុំមិនបរិយាយទៅឆ្ងាយទេ ប៉ុន្តែសុំមេត្តាកុំបំផ្លាញប្រវត្តិសាស្ត្រ និងដួងព្រលឹងខ្មែរខ្លួនឯង។ បើអាចសុំលុបវីដេអូនេះចោលទៅ»។ លោករដ្ឋលេខាធិការក្រសួងមហាផ្ទៃ បន្តទៀតថា «ការតែងនិពន្ធនេះ ខុសចាប់តាំងពីការប្រើពាក្យពេចន៍ឡើងទៅ កុំនិយាយទៅដល់សច្ចៈភាពខ្លឹមសារប្រវត្តិសាស្ត្រ។ ពាក្យមរណភាព គេមិនប្រើចំពោះព្រះមហាក្សត្រទេ។ ខ្ញុំមិនចាត់ទុកថា ប្អូនស្រីដែលជាអ្នកចម្រៀងមានចេតនាអាក្រក់ណាមួយនោះទេ ប៉ុន្តែតាមរយៈវណ្ណកម្មនេះ បង្ហាញថា ក្រុមផលិតទាំងមូលនៅខ្ចីសេចក្តី និងខ្វះភាពគ្រប់ជ្រុងជ្រោយ។ ជាថ្មីម្តងទៀត ខ្ញុំមិនគាំទ្រការយកព្រលឹងជាតិយើង ទៅលេងសើចបែបនេះទេ។ គួរលុបចោលទៅ ហើយលុបឱ្យបានលឿន។ «គ្មាននរណាបំផ្លាញព្រលឹងខ្មែរ ក្រៅតែពីខ្មែរខ្លួនឯងនោះទេ»។
ជាមួយនឹងការបង្ហោះសារប្រតិកម្មខាងលើ យើងឃើញលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ក៏បានសម្តែងនូវប្រតិកម្មលើបទចម្រៀងនេះផងដែរ។
លោកបណ្ឌិត គិន ភា ដែលជាអ្នកស្រាវជ្រាវជាន់ខ្ពស់ពិសេស នៃវិទ្យាស្ថានជាតិសម្រាប់ការសិក្សាសកលនៃបណ្ឌិត្យសភាវិទ្យាសាស្ត្រសង្គមចិន និងជាសមាជិកក្រុមប្រឹក្សាជាតិភាសាខ្មែរ ផងដែរនោះ បានសរសេរថា «រូបលោកសុំចោទជាសំណួរចំពោះឃ្លាមួយចំនួននៃបទចម្រៀង ដែលមានបញ្ហា ដូចជា ៖ ១- កម្មពៀរ ៖ តើព្រះបាទជ័យវរ្ម័នទី៧ បានសាងកម្មពៀរអ្វី? ជាមួយអ្នកណា? ២- ព្រោះតែសាសនា ៖ តើជម្លោះសាសនាកើតឡើងដោយរបៀបណា? នរណានៅពីក្រោយជម្លោះនោះ?។
លោកបណ្ឌិត គិន ភា បានបន្តថា ចំណុចទី៣ នៃឃ្លាបទចម្រៀងដែលមានបញ្ហាដែរនោះ គឺឃ្លាដែលលើកឡើងថា «ឃុបឃិតសម្លា.ប់ឈា.មឯង។ ចំណុចនេះ លោកបណ្ឌិត គិន ភា ចោទជាសំណួរថា តើនរណាឃុបឃិតជាមួយនរណា? យោងឯកសារណា? មានភស្តុតាងបញ្ជាក់ទេ? ។ សម្រាប់ឃ្លាបន្ទាប់នៃបទចម្រៀផងលើកឡើងថា «ចូលដៃសត្រូវ» លោកបណ្ឌិតគិន ភា ក៏ចោទជាសំណួរថា តើនរណាចូលដៃសត្រូវ? សត្រូវនោះជានរណា? យោងឯកសារណា? ភស្តុតាងបញ្ជាក់?។ ចំណុចមួយទៀតនៃបទចម្រៀង គឺត្រង់ឃ្លាថា «ចាប់បងខ្លួនឯងបូជាព្រះកាយ» លោកបណ្ឌិតគិន ភា ក៏លើកជាសំណួរថា នរណាជាអ្នកចាប់? មានឯកសារណាសរសេរដូច្នេះ?។
លោកបណ្ឌិត គិន ភា បានបន្ថែមថា «សរុបទៅ បទចម្រៀងនេះ មានបញ្ហាច្រើនពាក់ព័ន្ធរឿងរ៉ាវប្រវត្តិសាស្ត្រ គួរតែពិនិត្យខ្លឹមសារឡើងវិញ ចៀសវាងការបង្កើតភាពមិនច្បាស់លាស់នៃប្រវត្តិសាស្ត្រ»។
ជាមួយគ្នានោះ ក៏មានមហាជនអ្នកប្រើប្រាស់បណ្តាញសង្គមជាច្រើនបានបញ្ចេញទស្សនៈស្រដៀងគ្នានេះផងដែរថា «គួរលុបបទចម្រៀងនេះចោល» ព្រោះគ្មានសិលាចារិត ឬឯកសារណា អាចបញ្ជាក់ពីការសោយទីវង្គតរបស់ទ្រង់ទេ សូមកុំយកការស្រមើរស្រមៃរបស់អ្នកនិពន្ធ ធ្វើអោយខុសប្រវត្តិសាស្ត្រ។ ខ្លះក៏ពោលថា «ច្រៀងបំភ្លៃប្រវត្តិសាស្ត្រហើយ ជាកូនខ្មែរដែរ ហើយជាតារាល្បីទៀត ក្រុមការងារក៏មាន ម៉េចធ្វើការខ្ជីខ្ជាម៉េស ម៉េចអត់ដឹងពីរឿងឯកសារប្រវត្តិសាស្ត្រខ្លួនឯងចឹង» ជាដើម។
ហើយគិតត្រឹមម៉ោង៥រសៀល ថ្ងៃទី៤ ខែមិថុនា ឆ្នាំ២០២៣នេះ គេមិនទាន់ឃើញមានការឆ្លើយតបយ៉ាងណាពីតារាចម្រៀង អ្នកនាង មាស សុខសោភា នោះទេ៕
ចែករំលែកព័តមាននេះ