ប្រធានាធិបតីបារាំង លោកនីកូឡាស់ សាកូហ្ស៊ី កាលពីថ្ងៃទី៤ ឧសភា កន្លងមក បានស្នើដល់សហគមន៍អន្តរជាតិឱ្យដាក់ទណ្ឌកម្មធ្ងន់ធ្ងរប្រឆាំងមេដឹកនាំស៊ីរី លោកបាចា អាល់អាសាដ ប៉ុន្តែលោកបានផាត់ចេញនូវចំណាត់ការយោធាដើម្បីបញ្ឈប់ការប៉ះទង្គិចគ្នារវាងហ្វូងបាតុករ និងកងកម្លាំងរដ្ឋាភិបាល។ លោកសាកូហ្សី បានលើកឡើងដូច្នេះក្នុងអំឡុងពេលនៃបទសម្ភាសន៍មួយជាមួយទស្សនាវដ្តី L’Express ។ ក្នុងបទ សម្ភាសន៍នោះដែរ ប្រមុខរដ្ឋបារាំងរូបនេះថ្លែងគូសបញ្ជាក់ថា យើងមិនអាចប្រើកម្លាំងយោធាដើម្បីបញ្ឈប់ការប៉ះទង្គិចគ្នានៅស៊ីរីបានឡើយ។
លោកប្រធានាធិបតីសាកូហ្ស៊ី ថ្លែងថា យើងមិនអាចទទួលយករបបដែលប្រើប្រាស់កម្លាំងយោធាប្រឆាំងបាតុករដែលធ្វើបាតុកម្មដោយសន្តិវិធីឡើយ ។ ជាមួយគ្នានេះ លោកសាកូហ្ស៊ី បានបន្ទោសយ៉ាងចាស់ដៃចំពោះការប្រើប្រាស់គ្រាប់ពិតប្រឆាំងហ្វូងបាតុកររបស់មេដឹកនាំស៊ីរីដោយលោកគូសបញ្ជាក់ថា ប្រសិនបើរដ្ឋាភិបាលស៊ីរីនៅតែបន្តធ្វើដូច្នេះទៀតអាចមានការផ្អិបទំនាក់ទំនងទ្វេភាគីរវាងប្រទេសទាំងពីរបារាំង-ស៊ីរី។
ប្រទេសស៊ីរីកើតមានការធ្វើបាតុកម្មយ៉ាងខ្លាំងក្លាមិនធ្លាប់មានពីមុនមករយៈពេល៦សប្តាហ៍មកហើយ ដោយចាប់ផ្តើមផ្ទុះឡើងនៅក្នុងទីក្រុង Deraa ហើយរីករាលដាលដល់ទីក្រុងផ្សេងៗ ក្នុងនោះមានទីក្រុងដាម៉ាស់ រដ្ឋធានីរបស់ប្រទេសនេះផងដែរ ដោយក្រុមបាតុករអំពាវនាវឱ្យមានការធ្វើកំណែទម្រង់មួយចំនួន ។ បើទោះបីជាបែបណា ការធ្វើបាតុកម្មប្រឆាំងរដ្ឋាភិបាលនៅប្រទេសស៊ីរីនៅតែបន្តកើតឡើងក្រោយពីរដ្ឋាភិបាលបញ្ជូនរថក្រោះ និងទាហានជាច្រើនទៀតទៅកាន់កន្លែងធ្វើបាតុកម្មធ្វើឱ្យស្ថានការណ៍ក្នុងប្រទេសកាន់តែមានភាពធ្ងន់ធ្ងរឡើង ៕
ចែករំលែកព័តមាននេះ