រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតអូស្រ្តាលីឱ្យដឹងថា នៅវេលាម៉ោង៣និង៣០នាទីរសៀលថ្ងៃទី៤ ឧសភា ២០១១ស្ថានទូតអូស្រ្តាលីប្រចាំនៅរាជធានីភ្នំពេញ បានរៀបចំទទួលស្វាគមន៍ចំពោះការអញ្ជើញមកដល់ប្រទេសកម្ពុជារបស់លោកអៀន ហ្រេ្វហ្ស័រ អ្នកបង្កើតវ៉ាក់សាំងការ ពារមេរោគប៉ាបពីឡូម៉ាយូមែន
រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតអូស្រ្តាលីឱ្យដឹងថា នៅវេលាម៉ោង៣និង៣០នាទីរសៀលថ្ងៃទី៤ ឧសភា ២០១១ស្ថានទូតអូស្រ្តាលីប្រចាំនៅរាជធានីភ្នំពេញ បានរៀបចំទទួលស្វាគមន៍ចំពោះការអញ្ជើញមកដល់ប្រទេសកម្ពុជារបស់លោកអៀន ហ្រេ្វហ្ស័រ អ្នកបង្កើតវ៉ាក់សាំងការ ពារមេរោគប៉ាបពីឡូម៉ាយូមែន ដែលប្រឆាំងទៅនឹងមេរោគមហារីកមាត់ស្បូន(HPV)និងជាអ្នក ទទួលជ័យលាភីជាពលរដ្ឋឆ្នើមរបស់ប្រទេស អូស្រ្តាលីឆ្នាំ២០០៦។
លោកដេវ ហ្កចច៍ អនុប្រធានបេសកកម្មស្ថានទូតអូស្រ្តាលីក្នុងរាជធានីភ្នំពេញបានឱ្យដឹងថា លោកសាស្រ្តាចារ្យអៀន ហ្រេ្វហ្ស័រ បានធ្វើ អន្តោប្រវេសន៍មករស់នៅប្រទេសអូស្រ្តាលីនៅឆ្នាំ១៩៨១ ហើយចាប់ផ្តើមបំពេញការងារជាអ្នកស្រាវជ្រាវផ្នែកវេជ្ជសាស្រ្តតាំងពីពេលនោះមកដែលដំបូងនៅមែលប៊ន បន្ទាប់មកព្រីសបេននៅឆ្នាំ១៩៨៥។ អស់រយៈពេលជាច្រើនឆ្នាំ ការសិក្សា របស់លោកអៀន ហ្វ្រេហ្ស័រ គឺផ្តោតសំខាន់ទៅ លើភាពទាក់ទងគ្នារវាងមេរោគ HPV និងជំងឺមហារីកស្បូន ។ ក្រុមការងាររបស់លោកអៀន ហ្រេ្វហ្ស័រ បានបង្កើតវ៉ាក់សាំងការពារជំងឺមហារីកមាត់ស្បូនលើកដំបូងគេបង្អស់លើពិភពលោកនៅឆ្នាំ១៩៩១ ហើយបានប្រកាសឱ្យប្រើប្រាស់នៅឆ្នាំ២០០៦។
លោកដេវ ហ្កចច៍ បន្តថា បន្ទាប់ពីមានការចាក់វ៉ាក់សាំងការពារនៅក្នុងប្រទេសអូស្រ្តាលីបន្ចុប្បន្ននេះមានសិស្សស្រីអូស្រ្តាលីថ្នាក់អនុវិទ្យាល័យចំនួន៨០% ត្រូវបានចាក់វ៉ាក់ សាំងការពារ។ស្រដៀងគ្នានេះដែរ កម្មវិធីចាក់វ៉ាក់សាំងការពារបានចាប់ផ្តើមអនុវត្តនៅសហរដ្ឋអាមេរិក កាណាដា បារាំង អង់គ្លេស អាល្លឺម៉ង់ ក្រិក នូវែលសេឡង់ កូរ៉េខាងត្បូង និងប្រទេសស៊ុយអែត។
មន្រ្តីស្ថានទូតអូស្រ្តាលីបន្តថា លើសពីឈ្មោះជាអ្នកទទួលជ័យលាភី ជាប្រជាពលរដ្ឋឆ្នើមរបស់ប្រទេសអូស្រ្តាលីប្រចាំឆ្នាំ២០០៦ លោកសាស្រ្តាចារ្យ អៀន ហ្វ្រេហ្ស័រ បានទទួលជ័យលាភីជាច្រើនដទៃទៀត ដូចជាជ័យលាភីCSIRO Eureka ចំពោះភាពជាអ្នកដឹកនាំក្នុងវិទ្យាសាស្រ្តនៅឆ្នាំ២០០៥ មេដាយ Howard Floreyចំពោះការស្រាវជ្រាវវេជ្ជសាស្រ្តនៅឆ្នាំ២០០៧ ជ័យលាភីរបស់នាយករដ្ឋមន្រ្តីនៅឆ្នាំ២០០៨ ជ័យលាភីBalzanចំពោះឱសថការពារនៅឆ្នាំ២០០៨និងមេដាយមាសពីសមាគមឱសថអូស្រ្តាលីនៅឆ្នាំ២០០៩ ។
ដើម្បីចូលរួមជាមួយដំណើរទស្សនកិច្ចរបស់លោកសាស្ត្រាចារ្យ អៀន ហ្វ្រេហ្ស័រ នៅភ្នំពេញ ស្ថានទូតអូស្រ្តាលីបានបញ្ចាំងខែ្សភាពយន្តឯកសារស្តីពីការតាមប្រមាញ់ជំងឺមហារីកជូនតំណាងមកពីវិស័យសុខាភិបាលនៅកម្ពុជាទស្សនា ។ភាពយន្តឯកសារនេះ បង្ហាញពីការខិតខំប្រឹងប្រែងរបស់ក្រុមការងាររបស់លោកសាស្រ្តាចារ្យអៀន ហ្វ្រេហ្ស័រ ក្នុងការបណ្តុះបណ្តាលភ្នាក់ងារសុខាភិបាលនៅកោះVanuatuក្នុងការការពារវ៉ាក់សាំងនេះឱ្យបានល្អប្រសើរ។ការបង្កើតវ៉ាក់សាំងការពារមេរោគHPVគឺជាឧទាហរណ៍មួយ នៃកំណត់ត្រាភាពប៉ិនប្រសប់ដ៏អស្ចារ្យមួយរបស់អូស្រ្តាលីក្នុងវិស័យស្រាវជ្រាវវិទ្យាសាស្រ្តនិងការអភិវឌ្ឍ ។
អ្នកវិទ្យាសាស្រ្តអូស្រ្តាលីបាននិងកំពុងទទួលខុសត្រូវចំពោះការរកឃើញវេជ្ជសាស្រ្តជាច្រើនដែលបានធ្វើឱ្យប្រសើរឡើងដល់ជីវិតមនុស្សរាប់លាននាក់ ដោយរាប់បញ្ចូលទាំងការបង្កើតស្កែន័រអ៊ុលត្រាសោន ការវះកាត់បន្ថែមប្រព័ន្ធ ជំនួយសំឡេងដែលត្រូវបានបង្កើតឡើងដើម្បីជាជំនួយដល់ការលំបាកស្តាប់និងថ្លង់ក្នុងកម្រិតធ្ងន់ធ្ងរ ។ ថ្នាំរីលិនហ្សា ជាថ្នាំការពារជំងឺផ្តាសាយធំដំបូងបំផុតក្នុងពិភពលោក ដែលត្រូវបានបង្កើតនៅឆ្នាំ១៩៩៦ និងម៉ាស៊ីនសូឡាស្កែន ដែលត្រូវបានបង្កើតនៅឆ្នាំ១៩៩៨ ដែលអាចធ្វើការកំណត់បាននូវសាច់ដុំមហារីកបានយ៉ាងរហ័ស។ក្នុងចំណោមជនជាតិអូស្រ្តាលីទទួលរង្វាន់ណូបែល១០នាក់ ៩នាក់មានស្នាដៃផ្នែកវិទ្យាសាស្រ្ត ។ ជំងឺមហារីកមាត់ស្បូនបានសម្លាប់ស្ត្រីទូទាំងពិភពលោកជាង២៣០.០០០នាក់ ក្នុង១ឆ្នាំ ។
ក្នុងសុន្ទរកថារបស់លោកជំទាវផេននី រីឆាដស៍ (Penny Richards) ឯកអគ្គរាជទូតអូស្ត្រាលីប្រចាំព្រះរាជាណាចក្រកម្ពុជា ក្នុងឱកាសចាក់បញ្ចាំងខ្សែភាពយន្តឯកសារស្តីពី «ការតាមប្រមាញ់ជំងឺមហារីក » បានបង្ហាញថា ជំងឺមហារីកជាជំងឺដែលអាចប៉ះពាល់យើងទាំងអស់គ្នា ក្នុងកាលៈទេសៈណាមួយនៃជីវិតរបស់មនុស្សយើងគ្រប់ៗគ្នា ។ មនុស្សម្នាក់ក្នុងចំណោមបីនាក់ នឹងកើតជំងឺមហារីក ។ យើងទាំងអស់គ្នាសុទ្ធតែធ្លាប់ស្គាល់អ្នកណាម្នាក់ដែលកើតជំងឺមហារីក ។ នៅទូទាំងពិភពលោកមានប្រជាជនជាង២៥លាននាក់កំពុងរស់នៅដោយមានជំងឺមហារីក ។ រហូតដល់ឆ្នាំ២០២០ ជំងឺមហារីកនឹងសម្លាប់មនុស្សជាង១០លាននាក់ក្នុងមួយឆ្នាំ ។ ដោយមានតួលេខដ៏ច្រើនបែបនេះ យើងប្រហែលជាអាចបាក់ទឹកចិត្តចុះចាញ់សង្គ្រាមប្រឆាំងនឹងជំងឺមហារីកដោយងាយ ស្រួល ។ ក៏ប៉ុន្តែ មានការរីកចម្រើនក្នុងការស្រាវជ្រាវ ហើយខ្ញុំមានសេចក្តីសោមនស្សរីករាយយ៉ាងក្រៃលែងនាថ្ងៃនេះ និងសូមស្វាគមន៍ការអញ្ជើញចូលរួមរបស់លោកសាស្ត្រាចារ្យ អៀន ហ្វ្រេហ្ស័រ ដែលជាវីរជនឆ្នើមមួយរូបក្នុងការប្រយុទ្ធប្រឆាំងនឹងជំងឺដ៏កាចសាហាវមួយនេះ ។
លោកសាស្ត្រាចារ្យអៀន ហ្វ្រេហ្ស័រ កើតនៅក្នុងតំបន់ Glasgow ក្នុងប្រទេសស្កុតឡែន ហើយបានបញ្ចប់ការសិក្សានៅសាកលវិទ្យាល័យអេឌីនបឺក(University of Edinburgh) ។ នៅឆ្នាំ១៩៩១ លោកសាស្ត្រាចារ្យហ្វ្រេហ្ស័រ ត្រូវបានតែងតាំងជាប្រធាននៃមជ្ឈមណ្ឌលសម្រាប់ការស្រាវជ្រាវអំពីជំងឺមហារីក និងប្រព័ន្ធការពាររាងកាយ (ដែលសព្វថ្ងៃបានក្លាយជាវិទ្យាស្ថានសាកលវិទ្យាល័យឃ្វីនហ្សឺលែន ដាយអឺមិនធិណា The University of Queensland Diamantina ) ។ នាខែកុម្ភៈដើមឆ្នាំនេះ គេបានប្រកាសតែងតាំងគាត់ជានាយកប្រតិបត្តិនៃវិទ្យាស្ថានស្រាវជ្រាវសុខភាពមួយហៅថា Translational Research Institute នៅទីក្រុងប្រ៊ីស្បែន ។
លោកសាស្ត្រាចារ្យ ហ្វ្រេហ្ស័រ បានសិក្សាអស់ជាច្រើនឆ្នាំ ដោយផ្តោតទៅលើទំនាក់ទំនងរវាងវីរុស Human Papilloma Virus (HPV) និងជំងឺមហារីកមាត់ស្បូន ។ ក្នុងឆ្នាំ១៩៩១ លោកសាស្ត្រាចារ្យ ហ្វ្រេហ្ស័រ និងក្រុមរបស់គាត់បានបង្កើតនូវវ៉ាក់សាំងសម្រាប់ការពារជំងឺមហារីកមាត់ស្បូនដំបូងបំផុតនៅលើពិភព លោក ។ វ៉ាក់សាំងនេះ ត្រូវបានគេដាក់ឱ្យប្រើប្រាស់នៅឆ្នាំ២០០៦ ហើយក្នុងឆ្នាំដដែលនោះដែរលោកសាស្ត្រាចារ្យ ហ្វ្រេហ្ស័រ ក៏បានទទួលរង្វាន់ជាប្រជាជនអូស្ត្រាលីឆ្នើមប្រចាំឆ្នាំ២០០៦។
ការបង្កើតវ៉ាក់សាំងប្រឆាំងនឹងវីរុស HPV គឺគ្រាន់តែជាឧទាហរណ៍មួយបញ្ជាក់អំពីស្នាដៃនិងរបកគំហើញផ្នែកវិទ្យាសាស្ត្រថ្មីៗគួរឱ្យកត់សម្គាល់របស់ប្រទេសអូស្ត្រាលីតែប៉ុណ្ណោះ ។ ចំណុចខ្លាំងនៃការស្រាវជ្រាវវិទ្យាសាស្ត្ររបស់ប្រទេសអូស្ត្រាលី មាននៅក្នុងវិស័យវិទ្យាសាស្ត្រសិក្សាលំហក្រៅភព វិទ្យាសាស្ត្របរិស្ថាន ឱសថសាស្ត្រ ជីវវិទ្យា និងការសិក្សាអំពីប្រព័ន្ធការពាររាងកាយ ៕
ចែករំលែកព័តមាននេះ