ខេត្តសៀមរាប ៖ ផ្ទះក្បឿងដ៏ធំមួយខ្នងស្ថិតនៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប បានបាក់ធ្លាក់រាបដល់ដី កាលពីព្រឹកថ្ងៃទី៤ ឧសភា បណ្តាលឱ្យគ្រោងផ្ទះទាំងមូល រួមទាំងសម្ភារប្រើប្រាស់មួយចំនួនទៀតរងការខូចខាតយ៉ាងដំណំ ខណៈអ្នកម៉ៅការជួសជុលស្ទូចរំកិល ដើម្បីផ្លាស់ប្តូរទីតាំងថ្មី ហើយជួបបញ្ហាបច្ចេកទេស។ ពុំមាន
ខេត្តសៀមរាប ៖ ផ្ទះក្បឿងដ៏ធំមួយខ្នងស្ថិតនៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប បានបាក់ធ្លាក់រាបដល់ដី កាលពីព្រឹកថ្ងៃទី៤ ឧសភា បណ្តាលឱ្យគ្រោងផ្ទះទាំងមូល រួមទាំងសម្ភារប្រើប្រាស់មួយចំនួនទៀតរងការខូចខាតយ៉ាងដំណំ ខណៈអ្នកម៉ៅការជួសជុលស្ទូចរំកិល ដើម្បីផ្លាស់ប្តូរទីតាំងថ្មី ហើយជួបបញ្ហាបច្ចេកទេស។ ពុំមានសេចក្តីរាយការណ៍ជុំវិញព័ត៌មានពីចំនួនអ្នករងរបួស ឬស្លាប់នៅក្នុងហេតុការណ៍នោះទេ គ្រាន់តែដឹងថា ទំហំនៃការខូចខាតមានចំនួនរហូតជាង២ម៉ឺនដុល្លារ។ ពេលនេះម្ចាស់ផ្ទះបានប្តឹងទៅសមត្ថកិច្ចមូលដ្ឋាន ដើម្បីទាមទារឱ្យអ្នកទទួលម៉ៅការជួសជុលផ្ទះទទួលខុសត្រូវចំពោះការខូចខាតនេះ។
មន្ត្រីប៉ូលិសប៉ុស្តិ៍ស្វាយដង្គំឱ្យដឹងថា ផ្ទះដែលធ្លាក់ដល់ដីនោះមានទំហំ៩ម៉ែត្រ គុណ១២ម៉ែត្រ ជាប្រភេទផ្ទះថ្មក្រោមឈើលើ ប្រក់ក្បឿង ជាកម្មសិទ្ធិរបស់បុរសឈ្មោះម៉ុត សុផាត អាយុ៥៦ឆ្នាំ និងប្រពន្ធឈ្មោះសោម ថាវី ហៅនាង អាយុ៤៧ឆ្នាំ។ ចំណែកអ្នកម៉ៅការជួសជុលផ្ទះដែលធ្វេសប្រហែសបណ្តាលឱ្យមានគ្រោះថ្នាក់នោះឈ្មោះប៉ុល សុក ភេទប្រុស អាយុ៤៥ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប។
លោកម៉ុត សុផាត ជាម្ចាស់ផ្ទះរងគ្រោះរៀបរាប់កាលពីរសៀលថ្ងៃទី៤ មេសា ថា បញ្ហានេះកើតឡើងដោយសារតែកំហុសធ្វេសប្រហែសរបស់អ្នកម៉ៅការជួសជុល ដូច្នេះគាត់សម្រេចប្តឹងមេជាង ដើម្បីឱ្យទទួលខុសត្រូវ។ ផ្ទះដែលដួលរលំនោះគាត់បានសាងសង់ឡើងតាំងពីអំឡុងឆ្នាំ១៩៩១មកម៉្លេះ ដោយបានចំណាយអស់ជាង៣០ដំឡឹងមាស។ ពេលនេះវាមានសភាពទាបពេក ទឹកលិចរាល់ពេលភ្លៀង ទើបគាត់លើកវាឱ្យខ្ពស់ជាងមុនបន្តិច ដោយជួលជាងក្នុងតម្លៃ១.២០០ដុល្លារ ដើម្បីស្ទូចរំកិលផ្លាស់ប្តូរទីតាំងពីមុខទៅក្រោយ ប៉ុន្តែជាងពុំមានបច្ចេកទេសគ្រប់គ្រាន់ បូករួមទាំងការធ្វេសប្រហែសផងនោះ ធ្វើឱ្យផ្ទះកាច់បាក់រាបដល់ដីខូចខាតទាំងស្រុង។ បន្ថែមពីលើនេះ សម្ភារប្រើប្រាស់មួយចំនួនទៀតដែលនៅលើផ្ទះនោះរួមមាន គ្រែដេកចំនួន៥ សាឡុងមួយឈុត ទូសំអាង១ ទូរទស្សន៍២១អ៊ីង ១គ្រឿង និងម៉ាស៊ីនកុំព្យូរទ័រ៣គ្រឿងត្រូវផ្ទះសង្កត់ខូចខាតគ្មានសល់ បើសរុបជាទឹកប្រាក់ប្រមាណជាង២ម៉ឺនដុល្លារអាមេរិកឯណោះ ។
លោកប៉ុល សុក និយាយថា គាត់មានបំណងទទួលខុសត្រូវចំពោះអ្វីដែលបានកើតឡើង ប៉ុន្តែគាត់ក្រណាស់សូម្បីតែដីធ្វើផ្ទះក៏គ្មាននៅដែរ គឺសង់ខ្ទមនៅតាមដីចំណីផ្លូវ ដូច្នេះគាត់មិនមានលទ្ធភាពសងការខូចខាតក្នុងទំហំជាង២ម៉ឺនដុល្លារនោះបានទេ ។ អ្នកម៉ៅការរូបនោះបន្តថា គាត់នៅតែមានជំហរក្នុងការសម្របសម្រួលដោះស្រាយជាមួយម្ចាស់ផ្ទះទៅតាមលទ្ធភាពដែលរូបគាត់អាចជួយបានខ្លះ បូករួមទាំងថ្លៃពលកម្មសម្រាប់សាងសង់ផ្ទះឡើងវិញ ព្រោះបើតាមមើលការខូចខាតសម្រាប់ផ្ទះឈើវាមានកម្រិតតែ២០ទៅ៣០%ប៉ុណ្ណោះ គឺអាចជួសជុលបានវិញ។ នេះជាមធ្យោបាយដែលយោគយល់គាត់ ហើយគាត់មានលទ្ធភាពទទួលយកបាន។ នៅរសៀលថ្ងៃដដែល លោកអនុសេនីយ៍ទោ ឆឹង សុភា មេប៉ុស្តិ៍រដ្ឋបាលស្វាយដង្គំ បានប្រាប់តាមទូរស័ព្ទថា ចំពោះរឿងនោះលោកពុំមានលទ្ធភាពដោះស្រាយទេ ត្រូវបញ្ជូនសំណុំរឿងទៅថ្នាក់លើដើម្បីចាត់ការបន្ត ៕
ចែករំលែកព័តមាននេះ