រាជធានីភ្នំពេញ ៖ ការរំលេចអោយឃើញនូវតួនាទីរបស់សារព័ត៌មានក្នុងការកាត់បន្ថយ គ្រោះភ័យនៃគ្រោះមហន្តរាយនិងការបន្សុំានឹងបម្រែបម្រួលអាកាសធាតុ កាលពីព្រឹកថ្ងៃទី៤ ខែឧសភា ឆ្នាំ២០១១ ក្រសួងព័ត៌មាននិងអង្គការ Action aid បានរៀបចំកិច្ចពិភាក្សាពិសេសមួយដោយមានការចូលរួមជាអធិបតីពីលោក ខៀវ កាញារីទ្ធ រដ្ឋមន្រ្តី
រាជធានីភ្នំពេញ ៖ ការរំលេចអោយឃើញនូវតួនាទីរបស់សារព័ត៌មានក្នុងការកាត់បន្ថយ គ្រោះភ័យនៃគ្រោះមហន្តរាយនិងការបន្សុំានឹងបម្រែបម្រួលអាកាសធាតុ កាលពីព្រឹកថ្ងៃទី៤ ខែឧសភា ឆ្នាំ២០១១ ក្រសួងព័ត៌មាននិងអង្គការ Action aid បានរៀបចំកិច្ចពិភាក្សាពិសេសមួយដោយមានការចូលរួមជាអធិបតីពីលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន និងការចូលរួមពីបណ្តានិពន្ធនាយក និពន្ធនាយករងមកពីស្ថាប័នសារព័ត៌មានមួយចំនួន ។
លោកខៀវ កាញារីទ្ធ មានមានប្រសាសន៍ថា ការពិភាក្សានេះមានសារសំខាន់ណាស់ដើម្បីពញ្ញាក់ស្មារតីអ្នកសារព័ត៌មានឱ្យយល់ដឹងអំពីតួនាទីនិងផ្សព្វផ្សាយព័ត៌មានអំពីការប្រែប្រួលអាកាសធាតុដើម្បីកាត់បន្ថយគ្រោះមហន្តរាយដែលបណ្តាលមកពីគ្រោះធម្មជាតិ ខណៈពេលដែលប្រទេសនៅលើពិភពលោកបានចំណាយប្រាក់ប្រមាណជាង១០ពាន់លានដុល្លារដើម្បីទប់ទល់នឹងការប្រែប្រួលអាកាសធាតុ ។
លោកបញ្ជាក់ថា ក្នុងថវិកាជាង១០ពាន់លានដុល្លានេះគឺគេចំណាយតែ៤%ប៉ុណ្ណោះសម្រាប់កម្មវិធីបង្ការគ្រោះមហន្តរាយ ។ ដូចជានៅកម្ពុជាយើងបានប្រើប្រាស់ប្រព័ន្ធសារព័ត៌មានដើម្បីផ្សព្វផ្សាយនិងពន្យល់ប្រជាជនឱ្យយល់អំពីគ្រោះថ្នាក់នៃការរាតត្បាតនៃជម្ងឺផ្តាសាយបក្សីដែលធ្វើឱ្យកម្ពុជាទទួលចំណាត់ថ្នាក់ល្អក្នុងចំណោមប្រទេសជាច្រើនលើពិភពលោក ។ ដូចគ្នានេះផងដែរ ការផ្សព្វផ្សាយមុនតាមរយៈសារព័ត៌មានអំពីវិធានការការពារ និងគ្រោះថ្នាក់នៃជម្ងឺគ្រុនឈាមហើយបានធ្វើអោយការរាតត្បាតនៃជម្ងឺនេះមានការថយចុះ ។ ដូច្នេះតួនាទីសារព័ត៌មានមានសារសំខាន់ណាស់ក្នុងការចូលរួមកាត់បន្ថយគ្រោះភ័យនៃគ្រោះមហន្តរាយនិងការបន្សុំាទៅនឹងបម្រែបម្រួលអាកាសធាតុ ។
លោកស្រី ខារ៉ូឡាញ ម៉ាកខូលែន នាយិកាអង្គការ Action aid បានទទួលស្គាល់ថា សារព័ត៌មានគឺមានតួនាទីសំខាន់ណាស់ក្នុងការផ្សព្វផ្សាយឱ្យប្រជាជនបានយល់ដឹងនិងអប់រំអោយពួកគាត់មានវិធានការក្នុងការទប់ស្កាត់នូវគ្រោះមហន្តរាយនិងឥទ្ធិពលនៃការប្រែប្រួលអាកាសធាតុនិងជម្ងឺឆ្លងផ្សេងៗ ។ លោកស្រីលើកឡើងថាបច្ចុប្បន្ននេះប្រសិនបើសារព័ត៌មានមិនបានផ្សព្វផ្សាយអោយប្រជាជនបានដឹងមុន ឬបានយល់ទេនោះគ្រោះធម្មជាតិនឹងបង្កមហន្តរាយយ៉ាងធ្ងន់ធ្ងរដល់ប្រជាជនមិនខាន។ ដូច្នេះហើយគេមិនអាចនឹងមើលរំលងតួនាទីរបស់ សារព័ត៌មានទេ ។
កិច្ចពិភាក្សានោះក៏មានការលើកឡើងអំពីបទពិសោធន៍របស់ស្ថាប័នសារព័ត៌មានក្នុងការផ្សព្វផ្សាយអំពីបញ្ហាដែលទាក់ទងនឹងប្រធានបទ គ្រោះមហន្តរាយនិងបម្រែបម្រួលនៃធាតុអាកាសផងដែរ ។ ទន្ទឹមនោះកិច្ចពិភាក្សាបានអំពាវនាវឱ្យមានកិច្ចសហការគ្នាកាន់តែរឹងមាំរវាងស្ថាប័នសារព័ត៌មាន និងអង្គការសង្គមស៊ីវិល រួមទាំងស្ថាប័នពាក់ព័ន្ធដើម្បីលើកកម្ពស់ការផ្សព្វផ្សាយអប់រំប្រជាជនឱ្យបានដឹងអំពីវិធានការទប់ស្កាត់និងគ្រោះថ្នាក់នៃគ្រោះមហន្តរាយបង្កឡើងដោយធម្មជាតិ ៕
ចែករំលែកព័តមាននេះ