ចាប់ខ្លួនបានហើយ មហាចោរដ៏ល្បីឈ្មោះម្នាក់នៅក្នុងខេត្តកោះកុង
- កោះកុង
កម្លាំងជំនាញ នៃអធិការដ្ឋាននគរបាលក្រុងខេមរៈភូមិន្ទ បានចុះចាប់ខ្លួនមហាចោរដ៏ល្បីឈ្មោះម្នាក់ មានទីលំនៅក្នុងខេត្តកោះកុង តាមដីកា
ខេត្តកោះកុង ៖ កាលពីវេលាម៉ោង១១និង៣០នាទីព្រឹក ថ្ងៃទី៣១ ខែឧសភា ឆ្នាំ២០២៣ កម្លាំងជំនាញ នៃអធិការដ្ឋាននគរបាលក្រុងខេមរៈភូមិន្ទ បានចុះចាប់ខ្លួនមហាចោរដ៏ល្បីឈ្មោះម្នាក់ មានទីលំនៅក្នុងខេត្តកោះកុង តាមដីកាចាប់ខ្លួនលេខ៤៣៤៣ ត.ព្រ ចុះថ្ងៃទី១១ ខែវិច្ឆិកា ឆ្នាំ២០២០ ដែលចេញដោយចៅក្រមស៊ើបសួរ នៃសាលាដំបូងខេត្តកោះកុង លោក ឡោ ក្រឹម។
លោកវរសេនីយ៍ឯក យស ចាន់វិចិត្រ អធិការនគរបាលក្រុងខេមរៈភូមិន្ទ ដែលដឹកនាំប្រតិបត្តិការតាមចាប់ខ្លួនមហាចោរដ៏ល្បីឈ្មោះម្នាក់នោះ បានបញ្ជាក់ថា ជនដែលត្រូវចាប់ខ្លួន (មេចោរ) តាមដីកាខាងលើ មានឈ្មោះ ពោធិ៍ វ៉ាន់វិធួន ហៅធួន ភេទប្រុស អាយុ៣៨ឆ្នាំ មុខរបរមិនពិតប្រាកដ ទីកន្លែងកំណើតនៅក្នុងភូមិ៣ សង្កាត់ដងទង់ ក្រុងខេមរៈភូមិន្ទ ខេត្តកោះកុង។ ហើយមេចោរនោះជាប់ចោទពីបទ «លួចមានស្ថានទម្ងន់ទោស ដោយការប្រព្រឹត្តិអំពើហិ.ង្សា» និងបទ «ការមិនរាងចាលក្នុងបទមជ្ឈិម បន្ទាប់ពីការផ្តន្ទាទោសបទមជ្ឈិម» ដែលប្រព្រឹត្តនៅភូមិ៣ សង្កាត់ដងទង់ ក្រុងខេមរៈភូមិន្ទ ខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២០។ បទល្មើសនេះ មានចែង និងបញ្ញត្តិផ្តន្ទាទោសតាមមាត្រា៣៥៧ ចំណុចទី២ និងមាត្រា៨៨ នៃក្រមព្រហ្មទណ្ឌ។
លោកអធិការបានបញ្ជាក់ថា ការស្ទាក់ចាប់ខ្លួនមេចោរដ៏ល្បីឈ្មោះម្នាក់នេះបាន គឺនៅចំណុចភូមិព្រែកស្វាយ សង្កាត់ស្ទឹងវែង ក្រុងខេមរៈភូមិន្ទ ខេត្តកោះកុង ខណៈពេលដែលជនល្មើសរូបនេះ កំពុងតែធ្វើដំណើរតាមផ្លូវ។ បន្ទាប់ពីចាប់ខ្លួនមហាចោរឈ្មោះធួននេះបានភ្លាម មានបងប្អូនប្រជាពលរដ្ឋជាច្រើនបានសម្ដែងការសាទរយ៉ាងខ្លាំង ព្រោះក្នុងរយៈពេលរាប់សិបឆ្នាំកន្លងមក មហាចោររូបនេះបានសាងកេរ្តិ៍ឈ្មោះខាងលួច គាស់សោរផ្ទះ ឬហាងលក់ដូរ ដើម្បីចូលលួចយកទ្រព្យសម្បត្តិដ៏មានតម្លៃរបស់ប្រជាពលរដ្ឋ និងមន្ត្រីរាជការអស់រាប់សិបកន្លែងទៅហើយ។ ក្រៅពីនេះ នៅមានធ្វើសកម្មភាពសេព រក្សាទុក និងចែកចាយគ្រឿងញៀ.នយ៉ាងសកម្មទាំងនៅខេត្តកោះកុង និងនៅរាជធានីភ្នំពេញទៀតផង។
បើតាមប្រភពច្បាស់ការណ៍ លើកឡើងថា នេះជាការចាប់លើកទី៣មកហើយ ដែលកាលពីចាប់ខ្លួនលើកទី២ មេចោររូបនេះត្រូវតុលារការផ្តន្ទាទោសជាច្រើនឆ្នាំខ្លាំងណាស់ ប៉ុន្តែមានមន្ត្រីប៉ូលិសបង្ក្រាបគ្រឿងញៀ.នក្រសួងមហាផ្ទៃម្នាក់ ធ្វើជាខ្នងបង្អែករត់ការដោះលែងមហាចោររូបនេះអោយរួចខ្លួនមុនកាលកំណត់ ដើម្បីយកមហាចោរល្បីឈ្មោះនេះ ធ្វើជាភ្នាក់ងារសម្ងាត់ស្រាវជ្រាវបទល្មើសគ្រឿងញៀ.ននៅក្នុងរាជធានីភ្នំពេញ ប៉ុន្តែអង្គភាព ACU កំពុងបើកការស្រាវជ្រាវហើយ៕
ចែករំលែកព័តមាននេះ