ADផ្ទាំងផ្សព្វផ្សាយពាណិជ្ជកម្ម

Picture

ប៉េ​អឹ​ម​ចាប់​បុរស​២​នាក់​ដែល​ឆក់​ស្ត្រី​ម្នាក់​ធ្លាក់​ពី​លើ​ម៉ូតូ​កង់​បី បញ្ជូន​ទៅ​តុលាការ​ហើយ​(​វី​ដេ​អូ​)

9 ខែ មុន
  • ភ្នំពេញ

ជនសង្ស័យ​ជា​មុខសញ្ញា​ឆក់​២​នាក់​ដែល​ធ្វើ​សកម្មភាព​ឆក់​ស្ត្រី​ម្នាក់ បណ្តាល​ឲ្យ​ធ្លាក់​ពីលើ​ម៉ូតូ​កង់​បី​កាលពី​រសៀល​ថ្ងៃ​ទី​៣០ ខែឧសភា ឆ្នាំ​២០២៣​នោះ ពេល​នេះ​ត្រូវ​បាន​កម្លាំង

រាជធានី​ភ្នំពេញ ៖ ជនសង្ស័យ​ជា​មុខសញ្ញា​ឆក់​២​នាក់​ដែល​ធ្វើ​សកម្មភាព​ឆក់​ស្ត្រី​ម្នាក់ បណ្តាល​ឲ្យ​ធ្លាក់​ពីលើ​ម៉ូតូ​កង់​បី​កាលពី​រសៀល​ថ្ងៃ​ទី​៣០ ខែឧសភា ឆ្នាំ​២០២៣​នោះ ពេល​នេះ​ត្រូវ​បាន​កម្លាំង​សមត្ថកិច្ច​កង​រាជ​អាវុធ​រាជធានី​ភ្នំពេញ ចាប់​បញ្ជូន​ទៅ​កាន់​តុលាការ​ហើយ​។

សូម​ជំរាប​ថា កាលពី​ថ្ងៃ​ទី​១៦ ខែឧសភា ឆ្នាំ​២០២៣ វេលា​ម៉ោង​ប្រមាណ​១០​និង​៥៧​នាទី មាន​ករណី​ចោរឆក់​កាបូប​មួយ​កើតឡើង​តាម​បណ្តោយ​ផ្លូវ​សហព័ន្ធ​រុ​ស្ស៊ី ត្រង់​ចំណុច​ភូមិ​ទ្រុងមាន់ សង្កាត់​អូរ​បែក​ក្អម ខណ្ឌ​សែន​សុខ រាជធានី​ភ្នំពេញ បណ្តាល​ឲ្យ​ស្ត្រី​វ័យ​ចំណាស់​ម្នាក់​ធ្លាក់​ពីលើ​ម៉ូតូ​កង់​បី ខណៈ​កំពុង​ធ្វើ​ដំណើរ បណ្ដាល​ឱ្យ​ស្ត្រី​រង​គ្រោះ​ដួល​បោ​.​ក​ទៅ​នឹង​ថ្នល់​គួរ​ឲ្យ​រន្ធត់ និង​តក់ស្លុត រហូត​ភ្ញាក់ផ្អើល​ពេញ​បណ្តាញ​សង្គម Facebook​។

តាម​រយៈ​វី​ដេ​អូ​ដែល​រថយន្ត​ថត​ជាប់​សកម្មភាព​ឆក់​នេះ គេ​អាច​សន្និដ្ឋាន​បាន​ថា ជនសង្ស័យ​ប្រហែល​មាន​គ្នា​០៦​នាក់ ជិះ​ម៉ូតូ​០៤​គ្រឿង​អម​គ្នា​ធ្វើ​សកម្មភាព​។

ហើយ​ចំពោះ​អំពើ​អកុសល ពិតជា​មិន​អាច​គេច​ផុត​ពី​ច្បាប់​កម្មផល​មែន បើ​ទោះបីជា​ក្រុម​ជនសង្ស័យ​ធ្វើ​សកម្មភាព​ឆក់​បាន​សម្រេច និង​គេចខ្លួន​រហូត​ដល់​ទៅ​១០​ថ្ងៃ​ហើយ​ក៏​ដោយ ហើយ​បើ​ទោះបីជា​ជន​រង​គ្រោះ​មិន​បាន​ដាក់​ពាក្យបណ្តឹង ឬ​ផ្តល់​ព័ត៌មាន​ដល់​សមត្ថកិច្ច​អាវុធហត្ថ​ក៏​ដោយ តែ​អាវុធហត្ថ​រាជធានី​ភ្នំពេញ បាន​ប្រទះ​ឃើញ​ការ​ផ្សព្វផ្សាយ​ក្នុង​បណ្តាញ​ហ្វេ​ស​ប៊ុ​ក ក៏​ចាត់វិធានការ​ណ៍​ស្រាវជ្រាវ​តាម​រកមុខ​សញ្ញា​ក្រុម​ចោរឆក់​ទាំងនោះ រហូត​ដល់​ថ្ងៃ​ទី​២៦ ខែឧសភា ឆ្នាំ​២០២៣ កម្លាំង​មូលដ្ឋាន​អាវុធហត្ថ​ខណ្ឌ​សែន​សុខ ក៏​កំណត់​មុខសញ្ញា​បាន រហូត​ឈាន​ដល់​ធ្វើការ​ឃាត់ខ្លួន​ជនសង្ស័យ​ចំនួន​០២​នាក់​។ ក្នុង​នោះ​រួម​មានឈ្មោះ ហូ​យ សុ​ភ័​ក្រ អាយុ​១៩​ឆ្នាំ មុខរបរ​សិស្ស និង​ម្នាក់​ទៀត​ឈ្មោះ ធឿ​ន ចាន់រ​ដ្ឋា ហៅ​វុ​ត្ថា អាយុ​២០​ឆ្នាំ មុខរបរ​មិន​ពិតប្រាកដ​។

បើ​តាម​ជនសង្ស័យ​ឈ្មោះ ហូ​យ សុ​ភ័​ក្រ បាន​សារភាព​ថា ខ្លួន​ធ្លាប់​ធ្វើ​សកម្មភាព​ឆក់​កាបូប និង​ទ្រព្យសម្បត្តិ​មាន​តម្លៃ​ពី​ប្រជាពលរដ្ឋ​ធ្វើ​ដំណើរ​តាម​ដងផ្លូវ​ជា​ច្រើន​លើក​មក​ហើយ​តាំងពី​ឆ្នាំ​២០១៩​មក​ម្ល៉េះ និង​ក៏​ធ្លាប់​ជាប់​ពន្ធនាគារ​ចំនួន​៣​លើក​ផង​ដែរ ដោយ​លើក​ទី​១ ក្នុង​ឆ្នាំ​២០១៩ ជាប់​ពាក់ព័ន្ធ​ករណី​ហិ​.​ង្សា (​កា​.​ប់​ទៅ​លើ​ជន​រង​គ្រោះជា​សិស្សសាលា​ដូច​គ្នា​)​។ លើក​ទី​២ ក្នុង​ឆ្នាំ​២០២០ ជាប់​ពាក់ព័ន្ធ​ករណី​ប្លន់ និង​លើក​ទី​៣ ក្នុង​ឆ្នាំ​២០២១ ជាប់​ពាក់ព័ន្ធ​ករណី​ឆក់​ទូរស័ព្ទ ចំណែក​លើក​ទី​៤​នេះ ខ្លួន​ចេញ​ធ្វើ​សកម្មភាព​ឆក់​កាបូប​សារ​ជា​ថ្មី បណ្តាល​ឲ្យ​ស្ត្រី​ចំណាស់​ម្នាក់ ធ្លាក់​ពីលើ​កង់​បី តែ​ក៏​ត្រូវ​បាន​សមត្ថកិច្ច​អាវុធហត្ថ ស្រាវជ្រាវ​ចាប់ខ្លួន​បាន​ទៀត​។

ជនសង្ស័យ​ទាំង​០២​នាក់​ខាងលើ​នេះ ត្រូវ​បាន​កម្លាំង​ជំនាញ​ការិយាល័យ​ប្រឆាំង​បទល្មើស​ព្រហ្មទណ្ឌ នៃ​កងរាជអាវុធហត្ថ​រាជធានី​ភ្នំពេញ កសាង​សុំ​ណុំ​រឿង​បញ្ជូន​ទៅ​កាន់​តុលាការ ដើម្បី​ចាត់ការ​តាម​នីតិវិធី​ច្បាប់​។

គួរ​រំលឹក​ថាឆក់​កាបូប​បាន​សម្រេច គេចខ្លួន​បាន​១០​ថ្ងៃ ចុង​ក្រោយ ក៏​ត្រូវ​អាវុធហត្ថ​រាជធានី​ភ្នំពេញ តាម​ចាប់​បាន​៕

អត្ថបទសរសេរ ដោយ

កែសម្រួលដោយ