ខេត្តកំពង់ធំ ៖ ជាមួយនឹងអំពើចោរកម្មដែលកើតឡើងជាបន្តបន្ទាប់នៅក្នុងផ្សារកំពង់ធំត្រូវក្រុមអាជីវករស្តីបន្ទោសថា មកពីគ្មានការយកចិត្តទុកដាក់របស់អ្នកទទួលខុសត្រូវ ដែលដឹងតែពីដើរប្រមូលយកភាស៊ីមិនដែលភ្លេចម្តងណាទេ តែបែរជាមិនទទួលខុសត្រូវក្នុងការរក្សាការពារទំនិញ និងសម្ភារតាមតូបបណ្តោយឱ្យចោរចូលលួចគាស់នៅពេលយប់
ខេត្តកំពង់ធំ ៖ ជាមួយនឹងអំពើចោរកម្មដែលកើតឡើងជាបន្តបន្ទាប់នៅក្នុងផ្សារកំពង់ធំត្រូវក្រុមអាជីវករស្តីបន្ទោសថា មកពីគ្មានការយកចិត្តទុកដាក់របស់អ្នកទទួលខុសត្រូវ ដែលដឹងតែពីដើរប្រមូលយកភាស៊ីមិនដែលភ្លេចម្តងណាទេ តែបែរជាមិនទទួលខុសត្រូវក្នុងការរក្សាការពារទំនិញ និងសម្ភារតាមតូបបណ្តោយឱ្យចោរចូលលួចគាស់នៅពេលយប់។ ក្រុមអាជីវករបានបង្ហាញពីការព្រួយបារម្ភ និងខឹងយ៉ាងខ្លាំង ខណៈដែលអាជ្ញាធរមូលដ្ឋាន និងសមត្ថកិច្ចគ្មានចំណាត់ការចំពោះអ្នកម៉ៅការផ្សារដែលគ្មានការទទួលខុសត្រូវចំបោះសន្តិសុខក្នុងផ្សារ។
ពាក់ព័ន្ធបញ្ហានេះ អាជីវករក្នុងផ្សារកំពង់ធំដែលសូមមិនឱ្យបញ្ចេញឈ្មោះឱ្យអ្នកយកព័ត៌មានដឹងថា កាលពីយប់ថ្ងៃទី២ ឈានចូលថ្ងៃទី៣ ខែឧសភា មានចោរលួចគាស់តូបក្នុងផ្សារយកអីវ៉ាន់អស់ជាច្រើន។ ហេតុការណ៍នេះត្រូវម្ចាស់តូបដឹងនៅពេលដែលគាត់ទៅរៀបចំអីវ៉ាន់លក់នៅពេលព្រឹក ។ អាជីវកររូបនោះបន្តថា ឃើញដូច្នេះគាត់បានរាយការណ៍ទៅនគរបាលប៉ុស្តិ៍កំពង់ធំ ហើយភ្លាមៗនោះសមត្ថកិច្ចបានទៅធ្វើកំណត់ហេតុ ប៉ុន្តែពុំឃើញមានចំណាត់ការ ឬចេញជាលទ្ធផលអ្វីឡើយ។
ក្រុមអាជីវករនិយាយទៀតថា នេះមិនមែនជាលើកទី១ទេ ដែលមានចោរលួចគាស់តូបក្នុងផ្សារយកអីវ៉ាន់។ អាជីវករបានរអ៊ូដោយការក្តៅក្រហាយថា បើភាស៊ីយកមួយថ្ងៃពីរដងមិនដែលភ្លេចម្តងណាឡើយ ហើយជារៀងរាល់ខែអ្នកម៉ៅការផ្សារតំរូវឱ្យអាជីវករបង់ប្រាក់ពី ៥ពាន់ទៅ១ម៉ឺនរៀលដោយនិយាយថា ជាថ្លៃយាមកាមពេលយប់ ហើយនៅក្នុងលក្ខន្តិកៈម៉ៅការគឺជាអ្នកធានាខុសត្រូវចំពោះសន្តិសុខផ្សេងៗដែលកើតមានក្នុងផ្សារ។ ផ្ទុយទៅវិញច្រើនដងហើយដែលមានអំពើរចោរកម្មកើតឡើងតាមតូបក្នុងផ្សារពេលយប់ ប៉ុន្តែគ្មានការទទួលខុសត្រូវទេ។
ប្រជាពលរដ្ឋបានឱ្យដឹងដែរថា ជារៀងរាល់ថ្ងៃអ្នកម៉ៅការខាងលើនេះបណ្តោយឱ្យសន្តិសុខតាមទារលុយពីអ្នកជិះម៉ូតូទៅផ្សាររញ៉េរញ៉ៃគួរឱ្យទើសភ្នែកណាស់រហូតដល់អ្នកខ្លះស្ទើរតែមិនហ៊ានចូលផ្សារទេ ព្រោះខ្លាចគេចាប់កង់ម៉ូតូយកទៅលាក់ទុក។ ជាក់ស្តែងម៉ូតូ១គ្រឿងដែលម្ចាស់គេអង្គុយពីលើកំពុងទិញបន្លែគេហ៊ានយកច្រវាក់ចាក់សោ និងបញ្ជាឱ្យបង់លុយពិន័យ៥.០០០រៀលឥតខ្មាសអៀនទៀតផង។
បើទោះជាអាជីវករក្តៅក្រហាយ ប្រជាពលរដ្ឋខឹងយ៉ាងណាក្តីក៏គេមិនដែលឃើញអាជ្ញាធរក្រុង ឬសមត្ថកិច្ចចាត់វិធានការអ្វីចំពោះសកម្មភាពនោះឡើយ។ ជាថ្មីម្តងទៀតអាជីវករសំណូមពរដល់អាជ្ញាធរខេត្តធ្វើយ៉ាងណាសូមឱ្យអ្នកម៉ៅការផ្សារអនុវត្តតាមលក្ខន្តិកៈកិច្ចសន្យាជាមួយអាជីវករផង។ ទាក់ទិនបញ្ហានេះនគរបាលក្រុងស្ទឹងសែននិយាយថា សមត្ថកិច្ច គឺគ្រាន់តែរួមសហការរៀបចំសណ្តាប់ធ្នាប់ក្នុងផ្សារប៉ុណ្ណោះ សម្រាប់រឿងសន្តិសុខផ្សារអ្នកម៉ៅការមិនឱ្យនគរបាលលូកដៃទេ។ ចំពោះអំពើចោរកម្មសមត្ថកិច្ចបានត្រឹមតែធ្វើកំណត់ហេតុស្រាវជ្រាវ ហើយកន្លងមកសមត្ថកិច្ចបានត្រឹមតែទទួលព័ត៌មានមិនគប្បីរបស់ក្រុមក្មេងៗដើរចាប់កង់ម៉ូតូប៉ុណ្ណោះ។ ទន្ទឹមនឹងបញ្ហាដែលកើតមាននេះអ្នកយកព័ត៌មានមិនអាចសុំការបំភ្លឺពីលោកកូយ គឹមសាយ អ្នកម៉ៅការផ្សារកំពង់ធំបានទេ នៅថ្ងៃទី៣ ឧសភា ៕
ចែករំលែកព័តមាននេះ