ក្រុមប្រជែងប៉ាឡេស្ទីនបានទៅកាន់ទីក្រុងគែរ ប្រទេសអេហ្ស៊ីប កាលពីថ្ងៃទី៣ ឧសភា កន្លងមក ហើយបានចុះហត្ថលេខាលើកិច្ចព្រមព្រៀងបង្រួបបង្រួមមួយ ដែលនឹងត្រួសត្រាយផ្លូវសម្រាប់ការបោះឆ្នោតក្នុងរយៈពេលមួយឆ្នាំ ។ អ្នកតំណាងចំនួន១៣រូប នៃក្រុមប្រជែងនោះមកពីគណបក្សហ្វាតាហ៍របស់លោកប្រធានាធិបតីម៉ាមូដ អាប់បាស់ និងក្រុមប្រជែងហាម៉ាស់ រួមទាំងឥស្សរជននយោបាយឯករាជ្យជាច្រើនរូបទៀត បានចុះហត្ថលេខាលើកិច្ចព្រមព្រៀងនោះក្រោយពីជួបពិភាក្សាជាមួយមន្ត្រីអេហ្ស៊ីប ។
លោក Walid al-Awad សមាជិកនៃគណបក្សឆ្វេងនិយមប៉ាឡេស្ទីននិយាយថា ៖«យើងបានចុះហត្ថលេខាលើកិច្ចព្រមព្រៀងនេះ បើទោះបីជាមានបញ្ហាបម្រុងជាច្រើនទៀតក៏ដោយ ។ យើងបានពិភាក្សាគ្នាអំពីបញ្ហាបម្រុងទាំងនេះហើយគេគ្រប់គ្នាបានឯកភាពទទួលយកបញ្ហានេះមកពិចារណា» ។ លោកបានបន្តទៀតថា ៖ «ពលរដ្ឋប៉ាឡេស្ទីននៅជ្រោយហ្គាហ្សា និងវេសបេស នឹងសម្តែងការអបអរសាទរចំពោះកិច្ចព្រមព្រៀងនេះ» ។
នៅដែនកោះប៉ាឡេស្ទីននាពេលនេះ បញ្ហាដែលត្រូវដោះស្រាយមុនគេគឺ ការបង្កើតរដ្ឋាភិបាល និងការបង្កើតក្រុមប្រឹក្សាសន្តិសុខជាន់ខ្ពស់ ដែលមានកាតព្វកិច្ចពិនិត្យមធ្យោបាយនានា ដើម្បីបញ្ចូលគ្នារវាងកងកម្លាំងសន្តិសុខរបស់ក្រុមប្រជែងហាម៉ាស់ និងហ្វាតាហ៍ ។
ក្នុងកិច្ចព្រមព្រៀងនោះក៏បានអំពាវនាវឱ្យបង្កើតតុលាការសម្រាប់ការបោះឆ្នោត និងដោះលែងអ្នកទោសមួយចំនួនដែលត្រូវឃុំខ្លួនដោយក្រុមប្រជែង ទាំងនៅជ្រោយហ្គាហ្សា និងវេសបេង៕
ចែករំលែកព័តមាននេះ