ខេត្តបន្ទាយមានជ័យ ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានប្រកាសឱ្យសមត្ថកិច្ចត្រូវស្រាវជ្រាវតាមចាប់ខ្លួនជនល្មើសនេសាទខុសច្បាប់ដែលបានបង្ករបួសស្នាមលើមន្ត្រីឧទ្យានុរក្សម្នាក់ ដែលការលើកឡើងរបស់ឯកឧត្តមធ្វើឡើងនៅក្នុងកិច្ចប្រជុំមួយ កាលពីថ្ងៃទី២៣ ខែឧសភា ឆ្នាំ២០២៣…
ខេត្តបន្ទាយមានជ័យ ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានប្រកាសឱ្យសមត្ថកិច្ចត្រូវស្រាវជ្រាវតាមចាប់ខ្លួនជនល្មើសនេសាទខុសច្បាប់ដែលបានបង្ករបួសស្នាមលើមន្ត្រីឧទ្យានុរក្សម្នាក់ ដែលការលើកឡើងរបស់ឯកឧត្តមធ្វើឡើងនៅក្នុងកិច្ចប្រជុំមួយ កាលពីថ្ងៃទី២៣ ខែឧសភា ឆ្នាំ២០២៣ នៅស្រុកភ្នំស្រុក ។
លោក ឡុញ វុទ្ធី នាយខណ្ឌរដ្ឋបាលជលផលខេត្តបន្ទាយមានជ័យបានមានប្រសាសន៍ថា នៅរដូវខែប្រាំងទឹកសម្រកនៅអាងត្រពាំងថ្មស្រុកភ្នំ ស្រុកភ្នំស្រុក បទល្មើសជលផលបានកើតមានដោយបទល្មើសនេសាទខុសច្បាប់ទាំងយប់និងថ្ងៃដែលធ្វើឱ្យបាត់បង់មច្ឆជាតិដោយប្រើប្រាស់ឧបករណ៍ឆក់ត្រី ប្រើប្រាស់អួនក្រឡាញឹក ហើយទាំងបង្ករបួសស្នាមដល់មន្ត្រីឧទ្យាននុរក្ស និងជាសមាជិកសមាគមន៍នៃតំបន់ការពារធម្មជាតិអាងត្រពាំងថ្មស្រុកភ្នំស្រុកម្នាក់បណ្តាលរបួសទៀតផង ។
លោកបានបញ្ជាក់ទៀតថា មូលហេតុដែលមន្ត្រីឧទ្យាននុរក្សរងរបួស គឺខណៈគាត់ចុះធ្វើការល្បាតនិងបង្ក្រាបបទល្មើសនេសាទជាក់ស្តែងមួយ ហើយក៏ត្រូវបានជនល្មើសដែលនេសាទខុសច្បាប់បង្ករបួសស្នាមលើគាត់ ។ បច្ចុប្បន្ន ជនរងគ្រោះ (មន្ត្រីឧ្យានុរក្ស) បានដាក់ពាក្យបណ្តឹងទៅសមត្ថកិច្ចជំនាញ ដើម្បីស្រាវជ្រាវឃាត់ខ្លួនជនល្មើសដែលរបួសស្នាមចាត់ការតាមច្បាប់ហើយ ។
ទាក់ទិកករណីខាងលើ ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ដែរថា សុំសមត្ថកិច្ចជំនាញត្រូវស្រាវជ្រាវតាមឃាត់ខ្លួនជនបង្ករបួសស្នាមទៅលើមន្ត្រីឧទ្យានុរក្សឱ្យបានឆាប់ផង ដើម្បីចាត់ការតាមច្បាប់ ។
ឯកឧត្តមបានកោតសសើរចំពោះមន្ត្រីជំនាញដែលកំពុងការពារទប់ស្កាត់បទល្មើសជលផលនៅអាងត្រពាំងថ្ម ស្រុកភ្នំស្រុករយៈពេលកន្លងមកដែលបានបង្ក្រាបនិងទប់ស្កាត់ចាប់បានឧបករណ៍នេសាទប្រមូលយកមករក្សាទុក និងដុតកំទេចចោល ។
ចែករំលែកព័តមាននេះ