ខេត្តសៀមរាប ៖ ក្រុមមន្ដ្រីរដ្ឋបាលព្រៃឈើសៀមរាបបានថ្លែងថា ផ្ទៃដីព្រៃឈើរដ្ឋប្រមាណជាងមួយពាន់ហិកតានៅតំបន់ព្រៃជាំក្នុងភូមិខ្នាររង្វះ ឃុំឃុនរាម ស្រុកបន្ទាយស្រីនឹងត្រូវដាំកូនឈើប្រណីតនៅពាក់កណ្ដាលឆ្នាំ២០១១នេះ ដើម្បីស្ដារព្រៃឈើឡើងវិញ បន្ទាប់ពីតំបន់ព្រៃស្រោងនោះត្រូវបានទន្ទ្រានកាន់កាប់ដោយខុសច្បាប់ពីបក្សពួកឧត្ដមសេនីយ៍ផ្កាយបីសេះហោះប៉ើយ ប៉ែល ដែលត្រូវតុលាការយោធាចាប់ខ្លួនកាលពីអំឡុងដើមខែមករាឆ្នាំ២០១១ ព្រោះតែជាប់ពាក់ពន្ធ័នឹងក្រុមចលនា «ស៊ីអេហ្វអេហ្វ»ដែលមានគំរោងការផ្ដួលរំលំរដ្ឋាភិបាលនៅអំឡុងឆ្នាំ២០០០កន្លងទៅ ។
នាយខណ្ឌរដ្ឋបាលព្រៃឈើសៀមរាប លោកទា គឹមសុទ្ធ បានថ្លែងប្រាប់តាមទូរសព្ទ័កាលពីព្រឹកថ្ងៃទី១ ឧសភាថា រដ្ឋបាលព្រៃឈើកំពុងតែរៀបចំផែនការដាំកូនឈើប្រណីត «គ្រញូង» រាប់ម៉ឺនដើម នៅលើផ្ទៃដីប្រមាណជាង១០០០ហិកតា នៅក្នុងស្រុកបន្ទាយស្រីដែលត្រូវទន្ទ្រានកាន់កាប់ និងបែងចែកដោយរំលោភច្បាប់ពីសំណាក់បក្សពួកឧត្ដមសេនីយ៍ប៉ើយ ប៉ែល កាលពីអំឡុងឆ្នាំ ២០០៥រហូតមក ហើយត្រូវតុលាការចេញសាលក្រមដកហូតទុកជាសម្បត្ដិរដ្ឋតាមការប្ដឹងទាមទារដោយរដ្ឋបាលព្រៃឈើកាលពីអំឡុងឆ្នាំ២០០៦កន្លងទៅ។
លោកបញ្ជាក់ទៀតថា ផែនការស្ដារព្រៃឈើនៅតំបន់នោះឡើងវិញនឹងត្រូវធ្វើជាដំណាក់កាល គឺជំហានទី១ ត្រូវអនុវត្ដនៅពាក់កណ្ដាលឆ្នាំ២០១១ លើផ្ទៃដីប្រមាណ៣០០ហិកតា ដោយចាប់ផ្ដើមពីការដាំកូនឈើរយៈពេលខ្លី «អាកាស្យា» មុននឹងឈានទៅដាំឈើរយៈពេលវែង «គ្រញូង» ហើយឆ្នាំបន្ដបន្ទាប់នឹងដាំបំពេញឱ្យគ្រប់ផែនការនៅលើផ្ទៃដីដែលត្រូវបានបំផ្លិចបំផ្លាញទាំងនោះ។
តំបន់ព្រៃជាំជាប្រភេទព្រៃស្រោងមានដើមឈើតូចធំយ៉ាងក្រាស់ឃ្មឹកស្ថិតនៅក្នុងភូមិខ្នាររង្វះ ឃុំឃុនរាម ស្រុកបន្ទាយស្រីប៉ែកខាងជើង ឆៀងខាងលិចជួរភ្នំគូលែនត្រូវបានកាប់បំផ្លាញដើម្បីកាន់កាប់ និងបែងចែកលក់ទៅឱ្យអ្នកដទៃជាច្រើននាក់ពីឈ្មោះប៉ើយ ប៉ែល នៅអំឡុងឆ្នាំ ២០០៦ ដែលគ្រានោះគេជាទាហានពាក់ស័ក្ដិ២ខ្មែរក្រហមផ្ដាច់ខ្លួន ។ នេះបើតាមការអះអាងប្រាប់ដោយនាយរងសង្កាត់រដ្ឋបាលព្រៃឈើកន្ទួតខ្នារក្រៅ លោកម៉ុង ប៊ុនលីម ដែលគ្រប់គ្រងតំបន់ព្រៃជាំនោះ។
ដោយសារតែមើលឃើញការកាប់បំផ្លាញព្រៃឈើដែលជាសម្បត្ដិរដ្ឋពីបក្សពួកឈ្មោះប៉ើយ បែល នៅឆ្នាំ២០០៦ ជំនាញរដ្ឋបាលព្រៃឈើសៀមរាបបានប្ដឹងជននេះទៅតុលាការ ដើម្បីផ្ដន្ទាទោសទៅតាមច្បាប់ស្ដីពីព្រៃឈើ ប៉ុន្ដែនៅក្នុងអំឡុងពេលនោះឈ្មោះប៉ើយ ប៉ែល បានត្បុររកអ្នកធំ ដើម្បីធ្វើខ្នងបង្អែករហូតដល់ឡើងឋានៈពីស័ក្ដិ២ ទៅផ្កាយ២ និងផ្កាយ៣ ហើយបន្ដរិះរកគ្រប់មធ្យោបាយវាតទីកាន់កាប់ដីតំបន់ព្រៃជាំនោះបន្ដទៀត។
នាយសង្កាត់រដ្ឋបាលព្រៃឈើដដែលបញ្ជាក់ថា ការកាប់បំផ្លាញព្រៃឈើនៅតំបន់នោះមានសកម្មភាពពុះកញ្ជ្រោលនៅដំណាក់កាលយុទ្ធនាការបោះឆ្នោតឆ្នាំ២០០៨ ។ ពេលនោះ ហើយដើមឈើតូចធំរាប់លានដើមនៅលើផ្ទៃដី៤គីឡូម៉ែត្រការ៉េត្រូវបានកាប់រំលំ និងដុតកំទេចចោល ដើម្បីរំលោភកាន់កាប់ដីឱ្យខាងតែបាន។បន្ថែមពីលើនោះឈ្មោះប៉ើយ ប៉ែល បាន កៀងគរប្រជាពលរដ្ឋរាប់រយគ្រួសារមកពីតាមបណ្ដាខេត្ដផ្សេងៗឱ្យទៅរស់នៅលើតំបន់នោះតាមរយៈការផ្ដល់ដីឱ្យ និងបង្កើតវត្ដឥតច្បាប់មួយនៅក្នុងតំបន់នោះសម្រាប់ធ្វើជាខែលការពារមហិច្ឆតារបស់គេ ។
ឆ្លើយតបទៅនឹងបណ្ដឹងរដ្ឋបាលព្រៃឈើជុំវិញការកាប់បំផ្លាញធនធានធម្មជាតិដ៏ច្រើនសន្ធឹកសន្ធាប់នៅថ្ងៃទី២១ មិថុនា ឆ្នាំ២០១០ ឈ្មោះប៉ើយ ប៉ែល ដែលកាលនោះនៅតាំងខ្លួនជាឧត្ដមសេនីយ៍នៅឡើយ ត្រូវតុលាការខេត្ដសៀមរាបកោះហៅឱ្យចូលខ្លួនទៅបំភ្លឺ និងត្រូវបានតំណាងអយ្យការចោទប្រកាន់ពីបទកាប់ទន្ទ្រានដីព្រៃសម្បត្ដិរដ្ឋខុសច្បាប់ដោយយោងទៅតាមមាត្រា៣៣ និង៩៧ច្បាប់ស្ដីពីព្រៃឈើ ។ ជាបន្ដបន្ទាប់តុលាការបានបើកសវនាការជំរះក្ដី និងសម្រេចចេញសាលក្រមដកហូតដី តំបន់ព្រៃជាំទំហំ១៦០០ហិកតាដែលកាន់កាប់ដោយខុសច្បាប់នោះ ទៅឱ្យជំនាញរដ្ឋបាលព្រៃឈើគ្រប់គ្រងតាមផ្លូវច្បាប់ ។ នៅថ្ងៃទី១១ មករា ឧត្ដមសេនីយ៍ផ្កាយបីសេះហោះប៉ើយ ប៉ែល ត្រូវបានចាប់ខ្លួនតាមដីកាតុលាការយោធាក្រោមបទសង្ស័យជាប់ពាក់ពន្ធ័ជាខ្សែរយៈជាមួយលោកឧត្ដមសេនីយ៍ត្រីសាមិត្ដ វិរៈ ដែលបន្លំធ្វើជាឧត្ដមសេនីយ៍ឯក ហើយត្រូវបានចាប់ខ្លួនកាលពីថ្ងៃទី១០ មករា ឆ្នាំ២០១១ តាមអំណាចដីកាអយ្យការយោធាដូចគ្នាដោយចោទប្រកាន់ពីបទក្លែងបន្លំឯកសារ និងជាក្រុមចលនា «ស៊ីអេហ្វអេហ្វ»ដែលមានគម្រោងការផ្ដួលរំលំរដ្ឋាភិបាលនៅអំឡុងឆ្នាំ២០០០កន្លងទៅ ។
មន្ដ្រីរដ្ឋបាលព្រៃឈើសង្កាត់កន្ទួតខ្នារក្រៅបានថ្លែងថា ផែនការស្ដារព្រៃជាំនោះឡើងវិញបានចាប់ផ្ដើមពីការជីកស្រះទឹកដ៏ធំមួយសម្រាប់បម្រើការស្រោចស្រពក្នុងស្ថានីយបណ្ដុះកូនឈើដែលមានទំហំ៥ហិកតានៅក្នុងតំបន់ព្រៃជាំនោះ បន្ទាប់មកទៀតផែនការឈូសឆាយដីនឹងត្រូវបានចាប់ដំណើរការឱ្យគ្រប់តាមផែនការ៣០០ហិកតាក្នុងមួយឆ្នាំ ។ ស្របពេលដែលរដ្ឋបាលព្រៃឈើមានផែនការស្ដារព្រៃឈើនៅតំបន់ព្រៃជាំឡើងវិញនោះប្រភពព័ត៌មានរាយការណ៍ឱ្យដឹងថា បច្ចុប្បន្នមានប្រជាពលរដ្ឋចំនួនរាប់រយគ្រួសារមកពីបណ្ដាស្រុក-ខេត្ដផ្សេងៗតាមរយៈការឃោសនា ឬទិញដីពីបក្សពួកប៉ើយ ប៉ែល កំពុងក្រាញននៀលរស់នៅក្នុងតំបន់ព្រៃជាំនោះនៅឡើយ ហើយពួកអ្នកទាំងនោះកំពុងប្រឈមទៅនឹងការបណ្ដេញចេញដោយខានមិនបាន។
អភិបាលស្រុកបន្ទាយស្រី លោកម៉ឹង វិទ្ធី កាលពីព្រឹកថ្ងៃទី៣ ឧសភា ឆ្នាំ២០១១ បាន ថ្លែងប្រាប់តាមទូរសព្ទ័ថា ភូមិ និងវត្ដនៅក្នុងបរិវេណព្រៃជាំដែលរដ្ឋបាលព្រៃឈើគ្រោងនឹងដាំកូនឈើឡើងវិញនោះពុំមានច្បាប់ទម្លាប់ពីអាជ្ញាធរមូលដ្ឋានទេ គឺមករស់នៅដោយអនាធិបតេយ្យតាមរយៈការទិញលក់ និងបែងចែកពីឈ្មោះប៉ើយ ប៉ែល ដូច្នេះក្នុងករណីមានការតំរូវឱ្យពួកគាត់ចេញត្រូវតែចេញ ព្រោះដីនោះជាដីព្រៃសម្បត្ដិរដ្ឋ អាជា្ញធរស្រុកមិនមានអ្វី ដើម្បីដោះស្រាយគោលនយោបាយជូនឡើយ។
ស្រដៀងគ្នាដែរមន្ដ្រីស៊ើបអង្កេតសមាគមការពារសិទ្ធិមនុស្សអាដហុកប្រចាំខេត្ដសៀមរាប បានថ្លែងទាក់ទិនទៅនឹងការមកតាំងលំនៅរបស់ប្រជាពលរដ្ឋនៅតំបន់នោះថា វាជាការកាន់កាប់ដីដោយខុសច្បាប់ភូមិបាល ព្រោះដីព្រៃឈើទាំងអស់ត្រូវបានចាត់បញ្ចូលជាដីសម្បត្ដិរដ្ឋ បើប្រជាពលរដ្ឋយល់ថា គាត់ពុំមានដីគ្រប់គ្រាន់សម្រាប់សង់លំនៅឋាន ឬបង្កបង្កើនផល គាត់អាចស្នើសុំតាមរយៈសហគមន៍ទៅអាជា្ញធរដើម្បីសុំដីសម្បទានសង្គមកិច្ចពីរដ្ឋាភិបាលមិនអាចលើកគ្នាទៅកាប់បំផ្លាញព្រៃឈើបែបហ្នឹងបានទេ គឺបើនិយាយពីច្បាប់មានទោស ដូច្នេះក្នុងករណីមានការបណ្ដេញវាជារឿងត្រឹមត្រូវ ប៉ុន្ដែអាជា្ញធរ គួរចៀសវាងការប្រើហិង្សាក្នុងការបណ្ដេញ។
ទាក់ទិនទៅនឹងបញ្ហាដូចគ្នានេះនាយខណ្ឌរដ្ឋបាលព្រៃឈើសៀមរាប លោកទា គឹមសុទ្ធ បានថ្លែងថា ប្រជាពលរដ្ឋដែលមករស់នៅលើដីព្រៃជាំនោះត្រូវតែចេញតាមការតម្រូវឱ្យចេញ គាត់គា្មនសិទ្ធិមករស់នៅបែបហ្នឹងទេ ហើយផែនការស្ដារព្រៃឈើនៅតំបន់នោះត្រូវតែដំណើរការទៅមុខដោយខានមិនបាន ព្រោះផែនការបានកំណត់រួចរាល់ហើយ ៕
ចែករំលែកព័តមាននេះ