ក្រោយពីមានការចុះផ្សាយព័ត៌មានអំពីសកម្មភាពផ្ទុះការតវ៉ាប្រឆាំងដាច់ខាត និងសម្ដែងការមិនពេញចិត្តរបស់ក្រុមប្រជាពលរដ្ឋជិត១០០គ្រួសារនៃសហគមន៍ជនជាតិដើមភាគតិចព្នង ទៅលើអាជ្ញាធរ និងមន្ត្រីសុរិយោដីដែលត្រូវរ៉ូវគ្នាជាប្រព័ន្ធក្នុងការចុចម៉ាស៊ីន
ខេត្តមណ្ឌលគិរី ៖ ក្រោយពីមានការចុះផ្សាយព័ត៌មានអំពីសកម្មភាពផ្ទុះការតវ៉ាប្រឆាំងដាច់ខាត និងសម្ដែងការមិនពេញចិត្តរបស់ក្រុមប្រជាពលរដ្ឋជិត១០០គ្រួសារនៃសហគមន៍ជនជាតិដើមភាគតិចព្នង ទៅលើអាជ្ញាធរ និងមន្ត្រីសុរិយោដីដែលត្រូវរ៉ូវគ្នាជាប្រព័ន្ធក្នុងការចុចម៉ាស៊ីន GPS បាញ់ក្ដោបវាស់វែងយកធ្វើជាកម្មសិទ្ធិក្នុងទំហំដីព្រៃកប់ស.ពព្រៃអារក្ខអ្នកតា រួមនឹងដីព្រៃសហគមន៍របស់រដ្ឋប្រមាណជាង ១.០០០ ហិកតា។
ស្រាប់តែរដ្ឋបាលស្រុកកោះញែក បានចេញសេចក្តីបំភ្លឺព័ត៌មាននៅថ្ងៃទី១៩ ខែឧសភា ឆ្នាំ២០២៣ថា ប្រជាពលរដ្ឋជិត១០០គ្រួសារនៃសហគមន៍ជនជាតិដើមភាគតិចព្នង ចោទប្រកាន់ថា មានមន្ត្រីសុរិយោដីចុះវាស់វែង (GPS) ចំនួន១០០ក្បាលដី នៅលើដីសហគមន៍ និងដីកប់ខ្មោច ដីដំណមរបស់បងប្អូនជនជាតិដើមភាគតិច ដែលមានទីតាំងដីស្ថិតនៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគីរី នោះមិនពិត។
រដ្ឋបាលស្រុកនឹងធ្វើការបំភ្លឺចំពោះការលើកឡើងរបស់ប្រជាពលរដ្ឋដែលអះអាងថា ដីរបស់ពួកគាត់ជាដីសមូហភាព ឬជាដីសហគមន៍ គឺមិនពិតប្រាកដនោះទេ។ ហើយបញ្ជាក់ទៀតថា ចំពោះការអះអាងជាដីសមូហភាព ឬដីសហគមន៍នោះ ពុំមានឯកសារទទួលស្គាល់ពីស្ថាប័នជំនាញ និងអាជ្ញាធរពាក់ព័ន្ធជាផ្លូវការនៅឡើយទេ ។ ហេតុដូច្នេះហើយបានជាក្រុមការងារអន្តរក្រសួងមិនធ្វើការវាស់វែង ហើយទីតាំងដីដែលស្ថិតនៅចំណុចនោះ គឺជាដីដែលពួកគាត់បម្រុងស្នើសុំបង្កើតជាសហគមន៍ ប៉ុន្តែក្រោយពីក្រុមការងាររបស់រដ្ឋបាលស្រុក បានចុះស្រាវជ្រាវឃើញថា ប្រជាពលរដ្ឋដែលអះអាងនៅចំណុចដីដែលបម្រុងស្នើសុំបង្កើតជាសហគមន៍នោះ គឺពួកគាត់បានលក់ដូរយ៉ាងពិតប្រាកដ ដោយក្រុមការងាររកភស្តុតាងឯកសារកាន់កាប់ផ្ទេរលក់ទិញជាច្រើនពីសំណាក់ប្រជាពលរដ្ឋ។
ក្រោយឃើញរដ្ឋបាលស្រុកកោះញែក អះអាងបែបនេះ នៅថ្ងៃទី២៤ ខែឧសភា ឆ្នាំ២០២៣ ពលរដ្ឋបានបញ្ជាក់ថា ពួកគាត់ពុំបានលក់ដីព្រៃសហគមន៍នោះឡើយ ព្រោះជាដីព្រៃរបស់រដ្ឋ ដែលពួកខ្លួនអភិរក្សទុកជាប្រយោជន៍រួមសម្រាប់អាស្រ័យផល..!។ ក្នុងនោះពលរដ្ឋក៏បានទាមទារឱ្យរដ្ឋបាលស្រុកកោះញែក បង្ហាញរាល់លិខិតទិញលក់ដីព្រៃ ដើម្បីឱ្យពួកគាត់បានស្គាល់ឈ្មោះអ្នកលក់ និងអ្នកទិញផង។
ពលរដ្ឋទាំងនោះចាត់ទុកថា ជាការរៀបចំត្រូវរ៉ូវគ្នាជាប្រព័ន្ធ ដោយឱ្យមានអ្នកឈរឈ្មោះ អាស្រ័យផល ដើម្បីធ្វើជាលេសក្នុងការទិញលក់ដីព្រៃនោះ។ ហើយក៏រហូតឈានដល់មានការវាស់វែង អង្កន់កាត់ឆ្វៀល ពុះជាប្លង់ៗ សម្រាប់ចែកគ្នា និងលក់បន្ត។
បើតាមការលើកឡើងពីពលរដ្ឋនោះថា អ្នកដែលឈរឈ្មោះលក់ដីព្រៃទាំងនោះ អាចជាអ្នកនៅក្រៅស្រុក ហើយបើមានឈ្មោះអ្នកក្នុងភូមិ ក៏មិនមែនជាសមាជិកសហគមន៍របស់ពួកគាត់ដែរ។ ពលរដ្ឋសហគមន៍ជនជាតិដើមភាគតិច «ព្នង» បានប្រតិកម្មចោទជាសំណួរថា បើគេឈរឈ្មោះលក់ដីព្រៃ តើអាជ្ញាធរមានសិទ្ធិចុះហត្ថលេខាលក់ដីព្រៃដែរឬយ៉ាងណា..?!។
លោក ប៉ិល ឌិត មេឃុំរយ៉ អះអាងថា មិនមានការទិញលក់ដីព្រៃទាំងនោះឡើយ ហេតុអ្វីរដ្ឋបាលស្រុកកោះញែក បញ្ជាក់ថា មានការទិញលក់ដីព្រៃយ៉ាងច្រើនទៅវិញ..?។
ដីព្រៃ ដែលសហគមន៍ជនជាតិដើមភាគតិច «ព្នង» តវ៉ាចំពោះជំទាស់ការចេញប្លង់ និងស្នើសុំរក្សាទុកជាសម្បត្តិរដ្ឋដដែលនោះ ស្ថិតនៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី មានទំហំជាង១.០០០ហិកតា។ ការស្នើ សូមរក្សាទុកដីព្រៃពីសំណាក់ពលរដ្ឋនេះដែរ បន្ទាប់ពីមន្ត្រីសុរិយោដីខេត្តមណ្ឌលគិរី ចុចម៉ាស៊ីន GPS បាញ់ក្ដោបវាស់វែង កាត់ឆ្វៀលឱ្យទៅបុគ្គលឯកជន រហូតឈានដល់ដំណាក់ការបិទប្រកាស និងត្រៀមចេញ (ប្លង់រឹង) ទៅហើយ។ ប៉ុន្តែក៏ត្រូវសហគមន៍ជនជាតិដើមភាគតិច «ព្នង» ប្រតិកម្មជំទាស់ ដោយអះអាងថា ដីព្រៃទាំងនោះជាដីព្រៃកប់ខ្មោច, ព្រៃអ្នកតា និងព្រៃសហគមន៍។
គួរបញ្ជាក់ថា នៅថ្ងៃទី០៥ ខែឧសភា ឆ្នាំ២០២៣កន្លងទៅ ក្រុមពលរដ្ឋជិត១០០គ្រួសារ នៃសហគមន៍ជនជាតិដើមភាគតិ «ព្នង» នៅភូមិមេមុំ ឃុំរយ៉ ស្រុកកោះញែក បានផ្ទុះការតវ៉ាប្រឆាំងដាច់ខាត និងសម្ដែងការមិនពេញចិត្ត ចំពោះអាជ្ញាធរឃុំរយ៉ ស្រុកកោះញែក រួមនឹងមន្ត្រីសុរិយោដី ខេត្តមណ្ឌលគិរី ។ ដោយអះអាងថា មន្ត្រីទាំងនេះ ត្រូវគ្នាជាប្រព័ន្ធក្នុងការចុចម៉ាស៊ីន GPS បាញ់ក្ដោបវាស់វែង ដីព្រៃកប់ខ្មោច, ដីព្រៃអ្នកតា រួមនឹងដីព្រៃសហគមន៍របស់រដ្ឋ ប្រមាណជាង១.០០០ហិកតា ស្ថិតនៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី ដើម្បីកាត់ឆ្វៀលឱ្យ ទៅបុគ្គលមានអំណាច និងមានលុយចំនួន៣១ឈ្មោះ។
ក្នុងនោះរួមមាន ៖ លោកមេឃុំរយ៉ ក្រុមប្រឹក្សាឃុំ ស្មៀនឃុំ, លោក ផាន ប៊ុនធឿន មេបញ្ជាការសឹករង ស្រុកកោះញែក និងសាច់ញាតិ ព្រមទាំងបក្សពួកដទៃទៀតដែលពុំមែនជាអ្នកស្រុកនៅទីនោះទេ។
សហគមន៍ជនជាតិដើមភាគតិច «ព្នង» សូមស្នើយ៉ាងទទូចដល់លោក ថង សាវុន អភិបាលខេត្តមណ្ឌលគិរី ជាពិសេសសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា មេត្តាជួយអន្តរាគមន៍ទប់ស្កាត់រក្សាដីព្រៃខាងលើ ទុកជាសម្បត្តិរដ្ឋដដែល។ ខណៈពួកគាត់ខំធ្វើបណ្ដឹងទប់ស្កាត់រាប់សិបសន្លឹក បែរជាមន្ត្រីពាក់ព័ន្ធមិនទទួល និងមិនដោះស្រាយឱ្យឡើយ។ ខណៈពេលដែលមន្ត្រីជំនាញ ចុះវាស់វែងរួចហើយ ថែមទាំងបានបិទប្រកាសនៅតែថ្ងៃចេញប្លង់រឹងតែប៉ុណ្ណោះ។
ទាក់ទឹននឹងករណីខាងលើនេះ ក្រោយពីមានការចេញផ្សាយតាមសំណើរពលរដ្ឋ ស្រាប់តែរដ្ឋបាលស្រុកកោះញែក ចេញសេក្តីបំភ្លឺនោះតែម្តង។ ក្នុងលិខិតនោះ រដ្ឋបាលស្រុក អះអាងថា ការលើកឡើងរបស់ពលរដ្ឋ គឺមិនពិតឡើយ។ ហើយដីព្រៃសហគមន៍ ដែលពលរដ្ឋទាមទាររក្សាទុកនោះ គឺពួកគាត់បានលក់ដូរយ៉ាងពិតប្រាកដ។
ដោយឡែកពលរដ្ឋបានបដិសេធថា ពួកខ្លួនមិនបានលក់ដីព្រៃនោះទេ ហើយបុគ្គលដែលឈរឈ្មោះលក់អាចជាការរៀបចំពីសំណាក់មន្ត្រីជំនាញ និងអ្នកមានលុយតែប៉ុណ្ណោះ។ ក្រោមលេសហេតុផលថា ធ្លាប់អាស្រ័យផល ទាំងដែលដីនោះជាដីព្រៃសុទ្ធសាធ គ្មានការអាស្រ័យផលជាក់ស្ដែង និងគ្មានដំណាំសូម្បី១ដើមផង។ ឯផ្ទៃដីដែលប្រជាពលរដ្ឋកាន់កាប់អាស្រ័យផលពិតប្រាកដជាក់ស្តែងនោះ មន្ត្រីជំនាញខាងវាស់វែង មិនខ្ចីចុះធ្វើឲ្យនោះទេ។
គួររំលឹកថា ៖ ដីកប់ស.ពព្រៃអារក្ខត្រូវគេយកអស់ ធ្វើឱ្យជនជាតិដើមភាគតិចព្នងឈឺចាប់នាំគ្នាតវ៉ា (វីដេអូ) ។ ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ