ដីព្រៃកប់ស.ពព្រៃអារក្ខអ្នកតា រួមនឹងដីព្រៃសហគមន៍របស់រដ្ឋប្រមាណជាង១.០០០ហិកតា ត្រូវក្រុមពលរដ្ឋជិត១០០គ្រួសារ នៃសហគមន៍ជនជាតិដើមភាគតិច «ព្នង» បានផ្ទុះការតវ៉ាប្រឆាំងដាច់ខាត និងសម្ដែងការមិនពេញចិត្តចំពោះ
ខេត្តមណ្ឌលគិរី ៖ ដីព្រៃកប់ស.ពព្រៃអារក្ខអ្នកតា រួមនឹងដីព្រៃសហគមន៍របស់រដ្ឋប្រមាណជាង១.០០០ហិកតា ត្រូវក្រុមពលរដ្ឋជិត១០០គ្រួសារ នៃសហគមន៍ជនជាតិដើមភាគតិច «ព្នង» បានផ្ទុះការតវ៉ាប្រឆាំងដាច់ខាត និងសម្ដែងការមិនពេញចិត្តចំពោះអាជ្ញាធរ និងមន្ត្រីសុរិយោដីត្រូវគ្នាជាប្រព័ន្ធ ក្នុងការចុចម៉ាស៊ីន GPS បាញ់ក្ដោបវាស់វែងយកធ្វើជាកម្មសិទ្ធិ ។
ប្រជាពលរដ្ឋជិត១០០គ្រួសារ នៃសហគមន៍ជនជាតិដើមភាគតិច «ព្នង» ផ្ទុះការតវ៉ាប្រឆាំងដាច់ខាតទៅលើមន្ត្រីសុរិយោដី ត្រូវរ៉ូវគ្នាជាប្រព័ន្ធចុចម៉ាស៊ីន GPS បាញ់ក្ដោបដីព្រៃកប់ស.ពព្រៃអារក្ខអ្នកតា រួមនឹងដីព្រៃសហគមន៍របស់រដ្ឋប្រមាណជាង១.០០០ហិកតានោះ ស្ថិតនៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី ។ ហើយមានមន្ត្រីឃុំរយ៉ ស្រុកកោះញែក រួមនឹងមន្ត្រីសុរិយោដីស្រុក ខេត្តផងដែរ ដែលកាត់ឆ្វៀលឱ្យទៅបុគ្គលអ្នកមានអំណាច បុណ្យសក្តិ លុយកាក់ ដែលពួកគាត់បានឃើញឈ្មោះក្នុងបញ្ជីបិទប្រកាសចំនួន៣១ឈ្មោះ ។ ក្នុងចំណោមនោះ រួមមានឈ្មោះលោកមេឃុំរយ៉ ក្រុមប្រឹក្សាឃុំ ស្មៀនឃុំ លោក ផាន ប៊ុនធឿន មេបញ្ជាការសឹករងស្រុកកោះញែក និងសាច់ញាតិបក្ខពួកដទៃទៀត ដែលពុំមែនជាអ្នកភូមិនោះផង ។
នេះបើយោងតាមការបញ្ជាក់ពីសហគមន៍ជនជាតិដើមភាគតិចព្នង ដែលអះអាងប្រាប់ក្រុមអ្នកសារព័ត៌មាន នៅពេលផ្ទុះការតវ៉ានៅចំណុចដីព្រៃសហគមន៍ ស្ថិតនៅភូមិមេមុំ ឃុំរយ៉ ស្រុកកោះញែក នាថ្ងៃទី០៥ ខែឧសភា ឆ្នាំ២០២៣ ។
ពាក់ព័ន្ធក្នុងករណីខាងលើនេះ សហគមន៍ជនជាតិដើមភាគតិច «ព្នង» សូមស្នើយ៉ាងទទូចដល់ឯកឧត្តម ថង សាវុន អភិបាលខេត្តមណ្ឌលគិរី ជាពិសេសសម្ដេចតេជោ ហ៊ុន សែន នាយករដ្ឋមន្ត្រីកម្ពុជា មេត្តាជួយអន្តរាគមន៍ទប់ស្កាត់ រក្សាដីព្រៃខាងលើ ទុកជាសម្បត្តិរដ្ឋដដែល ។ ខណៈពួកគាត់ខំធ្វើបណ្ដឹងទប់ស្កាត់រាប់សិបសន្លឹក បែរជាមន្ត្រីពាក់ព័ន្ធមិនទទួល និងមិនដោះស្រាយឱ្យ ។ ទើបពួកគាត់ស្នើឱ្យអ្នកសារព័ត៌មានជួយផ្សព្វផ្សាយនូវរឿងរ៉ាវនេះ សម្រាប់ផ្ដល់ព័ត៌មានទៅកាន់ថ្នាក់ដឹកនាំ ។
បើតាមលោក ស្រើម ចូញ លោក ក្រេះ ក្លេត លោក ប្រង់ ណច តំណាងសហគមន៍ជនជាតិដើមភាគតិច «ព្នង» បានលើកឡើងដូចៗគ្នាថា ដីព្រៃសម្រាប់កប់ស.ពត្រង់ចំណុចភ្នំក្រុំ រួមនឹងដីព្រៃសហគមន៍ចំណុចភ្នំចុងក្រែង ដីព្រៃចំណុចច្រប់ សរុបជាង១.០០០ហិកតា ស្ថិតនៅភូមិមេមុំ ឃុំរយ៉ ស្រុកកោះញែក ត្រូវបានមន្ត្រីសុរិយោដីស្រុកកោះញែក និងខេត្ត ប្រើម៉ាស៊ីន GPS បាញ់ក្ដោបវាស់វែង កាត់ឆ្វៀលឱ្យទៅអ្នកមានលុយ និងអ្នកមានអំណាចយ៉ាងអនាធិបតេយ្យ ។ ហើយករណីនេះ ធ្វើឱ្យមានការភ្ញាក់ផ្អើលជាខ្លាំង ខណៈដីអាស្រ័យផលជាច្រើនឆ្នាំរបស់ជនជាតិដើមភាគតិច «ព្នង» ដែលនៅក្បែរផ្ទះ មានដំណាំស្រាប់ មន្ត្រីជំនាញមិនវាស់វែង ឬចេញប្លង់ឱ្យទេ ដោយប្រាប់ថា «ជាដីព្រៃរបស់រដ្ឋ» ពិតជាការឈឺចាប់ណាស់ ។
ទន្ទឹមនឹងនោះ ស្ងាត់ៗ ស្រាប់តែមន្ត្រីជំនាញសុរិយោដី បានចុចម៉ាស៊ីន GPS វាស់វែងដីព្រៃសហគមន៍របស់រដ្ឋត្រង់ចំណុចខាងលើ ដែលជាព្រៃស្រោង មកអង្កន់ពុះចែកឱ្យទៅបុគ្គលអ្នកមានលុយ និងអ្នកមានអំណាច យ៉ាងគឃ្លើនទៅវិញ..? ។
បើតាមតំណាងសហគមន៍ ពួកគាត់ទើបនឹងភ្ញាក់ផ្អើលនៅពេលឃើញការបិទប្រកាស ។ ហើយភ្លាមៗនោះដែរ ពួកគាត់បានតវ៉ា និងធ្វើបណ្ដឹងទប់ស្កាត់ជាច្រើនសន្លឹក តាមលេខរៀងក្បាលដីនីមួយៗ ។ ដែលបានវាស់គ្របលើដីអាស្រ័យផលរបស់ពួកគាត់ ជាពិសេស គឺដីព្រៃសហគមន៍តែម្ដង ។ ប៉ុន្តែរាល់បណ្ដឹងពួកគាត់ ត្រូវបានមន្ត្រីនៅកន្លែងបិទប្រកាសសាលាឃុំរយ៉ សុរិយោដីស្រុកកោះញែក រួមនឹងមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តមណ្ឌលគិរី ទាត់ចោល បដិសេធមិនទទួល ហើយក៏មិនដោះស្រាយឱ្យដែរ ។ ជាហេតុនាំឱ្យ សហគមន៍ជនជាតិដើមភាគតិច «ព្នង» សម្ដែងការឈឺចាប់ និងហួសចិត្តជាខ្លាំង ជុំវិញករណីនេះ ។
តំណាងសហគមន៍បន្តថា ដីព្រៃកប់សព ដីព្រៃអ្នកតា ត្រង់ចំណុចខាងលើ គឺជនជាតិដើមភាគតិច «ព្នង» មានជំនឿខ្លាំងណាស់ ដោយគោរពប្រតិបត្តិ ថែរក្សារហូតមក..។ ក្នុងនោះ បើគេយកធ្វើជាកម្មសិទ្ធិបានសម្រេចមែន ហើយឈូសឆាយព្រៃអ្នកតា វានឹងធ្វើឱ្យអ្នកភូមិកើតជំងឺដង្កាត់មើលមិនជា ឈឺស្លា.ប់ត.កូនតចៅមិនខានឡើយ ។ ហេតុនេះ ទើបពួកគាត់ប្រឆាំងដាច់ខាត ចំពោះការយកដីព្រៃសហគមន៍ទៅកាត់ឆ្វៀល ឱ្យក្លាយជាកម្មសិទ្ធិឯកជន ។
តំណាងសហគមន៍បញ្ជាក់ទៀតថា បុគ្គល៣១ឈ្មោះ ដែលត្រូវទទួលបានដីព្រៃសហគមន៍ ជាង១.០០០ហិកតានោះ សុទ្ធសឹងជាមន្ត្រីអ្នកមានអំណាច និងមានលុយ ដោយភាគច្រើន មិនមែនជាអ្នកភូមិនៅទីនេះទេ ។ ប៉ុន្តែក្នុងនោះ ក៏មានលោក ប៉ិល ឌិត មេឃុំរយ៉ ក្រុមប្រឹក្សាឃុំរយ៉ ស្មៀនឃុំរយ៉ លោក ផាន ប៊ុនធឿន មេបញ្ជាការសឹករងស្រុកកោះញែក រួមនឹងសាច់ញាតិ បក្ខពួក ដោយម្នាក់ៗទទួលបានដីព្រៃទំហំចន្លោះពី៥ហិកតាទៅ៥០ហិកតា ។
រាល់ការចោទប្រកាន់ទាំងនេះ នៅព្រឹកថ្ងៃទី០៩ ខែឧសភា ឆ្នាំ២០២៣ លោក លឹម ចាន់សូភី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តមណ្ឌលគិរី បានថ្លែងប្រាប់អ្នកសារព័ត៌មានថា ការប្ដឹងតវ៉ារបស់ពលរដ្ឋខាងលើ គឺមិនត្រូវតាមគោលការណ៍នោះឡើយ ព្រោះសហគមន៍របស់គាត់មិនទាន់ចុះបញ្ជី ។ លោកប្រធានមន្ទីរបានចោទជាសំណួរតបវិញថា តើពួកគាត់ប្ដឹងក្នុងនាមជាអ្វី និងមានអ្វីជាសំអាង? បើសហគមន៍ពុំទាន់មានជាផ្លូវការនៅឡើយនោះ ?
លោក លឹម ចាន់សូភី ក៏បានទទួលស្គាល់ដែរថា «ដីព្រៃខាងលើ គឺពិតជាដីរបស់រដ្ឋប្រាកដមែន»។ លោកថា រាល់ការចុះវាស់វែងដីព្រៃទាំងនោះ គឺមានការចូលរួមសហការពីក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ រួមនឹងក្រសួងរៀបចំដែនដីនគរូបនីយកម្ម និងសំណង់ផងដែរ ។ ដើម្បីពិនិត្យអង្កេតលទ្ធភាពជាក់ស្ដែង សម្រាប់កាត់ឆ្វៀលឱ្យទៅអ្នកអាស្រ័យផល ។
លោក ឌឹម នី អភិបាលស្រុកកោះញែក ក៏បានថ្លែងដែរថា ករណីខាងលើ លោកមិនច្បាស់ទេ ដោយកំពុងចាត់មន្ត្រីជំនាញចុះស្រាវជ្រាវ ។
ចំណែកលោក យឹម ហេង ប្រធានការិយាល័យរៀបចំដែនដីនគរូបនីយកម្ម សំណង់ និងភូមិបាលស្រុកកោះញែកថា លោកពុំដែលបានដើរវាស់ដីព្រៃនោះទេ ព្រោះការិយាល័យរបស់លោកមានតែរូបលោកម្នាក់គត់ ។ លោកបន្តថា ការវាស់វែងដីនោះ គឺក្រុមការងារមន្ត្រីរបស់អន្តរក្រសួង ដោយក្រសួងរៀបចំដែនដី សហការជាមួយមន្ទីររៀបចំដែនដីខេត្តមណ្ឌលគិរី រួមនឹងមន្ត្រីពាក់ព័ន្ធអាជ្ញាធរមូលដ្ឋាន ។
លោក ផាន ប៊ុនធឿន មេបញ្ជាការសឹករងស្រុកកោះញែក បានបដិសេធថា លោកមិនមានដីនៅទីនោះទេ ហើយក៏មិនមានឈ្មោះក្នុងបញ្ជីដែលត្រូវទទួលបានដីអ្វីនោះដែរ ។
ចំពោះលោក ប៉ិល ឌិត មេឃុំរយ៉វិញ ក៏បានឱ្យដឹងដែរថា លោកមិនដឹងទេ ហើយក៏មិនមានឈ្មោះក្នុងបញ្ជីទទួលដីដែរ ។
ទោះជាយ៉ាងណាក្ដី សហគមន៍ជនជាតិដើមភាគតិចព្នង សូមស្នើដល់អភិបាលខេត្តមណ្ឌលគិរី ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ជាពិសេសសម្ដេចតេជោ ហ៊ុន សែន នាយករដ្ឋមន្ត្រី មេត្តាជួយអន្តរាគមន៍ ចាត់មន្ត្រីអព្យាក្រឹត្យ ចុះមកស្រាវជ្រាវផង ដើម្បីចាត់វិធានការក្ដៅលើអ្នកពាក់ព័ន្ធ ទុកជាការព្រមានដល់បណ្ដាស្រុក ខេត្ត ផ្សេងៗទៀតផង និងដើម្បីរក្សាដីព្រៃសហគមន៍ខាងលើ ឱ្យនៅគង់វង្សជារៀងរហូត ព្រោះជាទីតាំងដែលពួកគាត់អាស្រ័យផលតកូនតចៅ ។
ក្នុងសហគមន៍ជនជាតិដើមភាគតិច(ព្នង)ខាងលើនោះ មានលោក លីន ម៉ៅ ជាប្រធាន និងមានសមាជិកជាង១០នាក់ ដោយមានស្នាក់ការនៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី ។ ក្នុងបណ្ដឹងនីមួយៗ មានលោក លីន ម៉ៅ ជាតំណាង អមដោយមេដៃពលរដ្ឋជាង១០០នាក់ ៕
ចែករំលែកព័តមាននេះ