(អាមេរិក)៖ ប្រភពស្និទ្ធនឹងគូស្នេហ៍មួយគូនេះបានប្រាប់ CNN ថា ស្ថាបនិក Amazon លោក Jeff Bezos និង អតីតពិធីការិនីទូរទស្សន៍ នាង Lauren Sánchez បានភ្ជាប់ពាក្យបន្ទាប់ពីទាក់ទងគ្នាជាងបួនឆ្នាំ។ នេះបើយោងតាមការចុះផ្សាយរបស់សារព័ត័មាន CNN នៅថ្ងៃទី២៣ ខែឧសភា ឆ្នាំ២០២៣។

CNN រាយការណ៍ថាគូស្នេហ៍ទើបតែភ្ជាប់ពាក្យថ្មីៗនេះ ទោះយ៉ាងណាគេក៏មិនទាន់ដឹងព័ត៌មានលម្អិតថាពួកគេគម្រោងរៀបការនៅពេលណានោះទេ។

កាសែត New York Post ក៏បានរាយការណ៍ពីការភ្ជាប់ពាក្យរបស់មហាសេដ្ឋី Jeff Bezos  និងគូស្នេហ៍ នេះផងដែរ។ បច្ចុប្បន្នអ្នកទាំងពីរកំពុងស្ថិតនៅភាគខាងត្បូងនៃប្រទេសបារាំង ដើម្បីចូលរួមមហោស្រពភាពយន្តទីក្រុង Cannes។

មហាសេដ្ឋី Jeff Bezos សព្វថ្ងៃមានអាយុ៥៩ឆ្នាំ និង Sánchez អាយុ៥៣ឆ្នាំ ដែលជាអតីតអ្នកកាសែត បានចេញមុខជាសាធារណៈជាមួយនឹងទំនាក់ទំនងរបស់ពួកគេនៅឆ្នាំ២០១៩។ ចាប់តាំងពីពួកគេចាប់ផ្តើមទាក់ទងគ្នាមក គូស្នេហ៍មួយគូនេះតែងតែបង្ហាញមុខជាមួយគ្នាក្នុងកម្មវិធីធំៗ។

សូមរំលឹកថា Bezos ធ្លាប់បានរៀបការ ជាមួយ MacKenzie Scott (អតីតភរិយា) អស់រយៈពេល ២៥ ឆ្នាំដោយអ្នក​ទាំង​ពីរ​មាន​កូន​៤​នាក់។ ទោះជាយ៉ាងណា នៅខែកក្កដា ឆ្នាំ ២០១៩ អ្នកទាំង២បានលែងលះ ដោយ អតីតភរិយា MacKenzie Scott ទទួលបាន ភាគហ៊ុន Amazon មានតម្លៃ ៣៨,៣ ពាន់លានដុល្លារ៕