កម្លាំងនគរបាលព្រហ្មទណ្ឌ ចាប់ជនសង្ស័យ០២នាក់ ករណីឆក់ទូរសព្ទដៃជនជាតិថៃ
រាជធានីភ្នំពេញ ៖ នៅវេលាម៉ោង២០និង៤០នាទីយប់ថ្ងៃទី២២ ខែឧសភា ឆ្នាំ២០២៣ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋាន បានដឹកនាំកម្លាំងជំនាញ…
រាជធានីភ្នំពេញ ៖ នៅវេលាម៉ោង២០និង៤០នាទីយប់ថ្ងៃទី២២ ខែឧសភា ឆ្នាំ២០២៣ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋាន បានដឹកនាំកម្លាំងជំនាញ ចុះល្បាតតាមផ្លូវ លេខ២៨៨ កែងផ្លូវព្រះមុនីវង្ស ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ក៏ប្រទះឃើញជនសង្ស័យជិះម៉ូតូចំនួន ២គ្រឿង មានគ្នាចំនួន២នាក់ បានធ្វើសកម្មភាពឆក់ទូរសព្ទដៃបានសម្រេច ពីបុរសរងគ្រោះចំនួន៤នាក់ (ជាជនជាតិថៃ) ដែលកំពុងដើរតាមផ្លូវ ។
ភ្លាមនោះ កម្លាំងជំនាញការិយាល័យ ធ្វើការប្រដេញ និងបានសហការជាមួយកម្លាំងជំនាញ នៃអធិការដ្ឋាននគរបាលខណ្ឌបឹងកេងកង ឃាត់ខ្លួនជនសង្ស័យបានទាំង ២នាក់ នៅចំណុចផ្លូវលំ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។
ជនសង្ស័យទាំង២នាក់ រួមមាន ៖
ទី១ ៖ ឈ្មោះ ប្រុស ឧត្តម អាយុ២៩ឆ្នាំ មុខរបរបើកឡាន ទីកន្លែងស្នាក់នៅផ្ទះមិនចាំលេខ ផ្លូវមិនចាំលេខ ក្នុងសង្កាត់ព្រែកលាភ ខណ្ឌជ្រោយចង្វារ រាជធានីភ្នំពេញ (អ្នកបិទគូទ) ។
ទី២ ៖ ឈ្មោះ ឡេង ដារ័ត្ន អាយុ២៩ឆ្នាំ មុខរបរធ្វើការរោងចក្រ ទីកន្លែងស្នាក់នៅផ្ទះជួល ផ្លូវលំ ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ (ដៃដល់) ។
កម្លាំងជំនាញ ដកហូតបាន ៖ ម៉ូតូហុងដាស្តុបពី ពណ៌ស (របស់ជនសង្ស័យ), ម៉ូតូម៉ាកហុងដាឃ្លីក ពណ៌ស (របស់ជនសង្ស័យ) និងទូរសព្ទដៃម៉ាក សាំស៊ុង Note20 ultra ពណ៌មាស (ជារបស់ជនរងគ្រោះ) ។ ទូរសព្ទខាងលើកម្លាំងជំនាញការិយាល័យបានប្រគល់អោយទៅបុរសរងគ្រោះជាជនជាតិថៃ វិញផងដែរ ។
ក្រោយឃាត់ខ្លួន កម្លាំងជំនាញបាននាំខ្លួនជនសង្ស័យទាំង២នាក់ មកនាយកដ្ឋាននគរបាលព្រហ្មទណ្ឌ ដើម្បីធ្វើការសាកសួរ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី ៕
ចែករំលែកព័តមាននេះ