ក្រុងព្រះសីហនុ ៖ មនុស្សចំនួន៨នាក់ ក្នុងនោះមានជនបរទេស៦នាក់ដែលជាប់ពាក់ព័ន្ធក្នុងការចែកចាយ និងផលិតគ្រឿងញៀនត្រូវកងរាជអាវុធហត្ថខេត្តដឹកនាំដោយលោករៀម ច័ន្ទមុន្នី ព្រះរាជអាជ្ញារងសាលាដំបូងខេត្ត និងលោកវរសេនីយ៍ឯក ហេង ប៊ុនទី មេបញ្ជាការរងកងរាជអាវុធហត្ថខេត្តឃាត់ខ្លួនជាបន្តបន្ទាប់កាលពីវេលាម៉ោង៨ និង៤៥នាទីយប់
ក្រុងព្រះសីហនុ ៖ មនុស្សចំនួន៨នាក់ ក្នុងនោះមានជនបរទេស៦នាក់ដែលជាប់ពាក់ព័ន្ធក្នុងការចែកចាយ និងផលិតគ្រឿងញៀនត្រូវកងរាជអាវុធហត្ថខេត្តដឹកនាំដោយលោករៀម ច័ន្ទមុន្នី ព្រះរាជអាជ្ញារងសាលាដំបូងខេត្ត និងលោកវរសេនីយ៍ឯក ហេង ប៊ុនទី មេបញ្ជាការរងកងរាជអាវុធហត្ថខេត្តឃាត់ខ្លួនជាបន្តបន្ទាប់កាលពីវេលាម៉ោង៨ និង៤៥នាទីយប់ ថ្ងៃទី២ ឧសភា នៅ The Happy Bar ស្ថិតក្នុងក្រុម២៤ ភូមិ៣ សង្កាត់៣ ក្រុងព្រះសីហនុដែលជាកន្លែងផឹកស៊ី និងស្នាក់នៅបែបបរទេស។
លោកវរសេនីយ៍ឯក ហេង ប៊ុនទី ឱ្យដឹងថា ទីតាំងដែលសមត្ថកិច្ចបង្ក្រាបនេះមានការស្មុគស្មាញ ព្រោះផ្លូវចូលតូចចង្អៀត ហើយជាទីតាំងរបស់ជនបរទេសទៀត ប៉ុន្តែដោយមានការអនុញ្ញាតពីលោកមេបញ្ជាការយើងបានស៊ើបអង្កេតជាយូរទើបនៅថ្ងៃទី២ ឧសភា ឆែកឆេរដោយមានលោករៀម ចន្ទមុន្នី ព្រះរាជអាជ្ញារងអមសាលាដំបូងជាអ្នកបញ្ជា។ ក្នុងយុទ្ធនាការនោះយើងឃាត់ខ្លួនមនុស្សចំនួន៨នាក់ ក្នុងនោះជនបរទេសចំនួន៦នាក់ និងស្ត្រីវៀតណាមម្នាក់ និងខ្មែរម្នាក់ រួមទាំងវត្ថុតាងមួយចំនួនរួមមាន ថ្នាំញៀនប្រភេទមេតំហ្វេតាមីន ម៉ាទឹកកក ថ្នាំញៀនប្រភេទហេរ៉ូអ៊ីន កញ្ឆាក្រៀម ទឹកកញ្ឆាសារធាតុផ្សំថ្នាំញៀន ម៉ាស៊ីនកិនកញ្ឆា ម៉ាស៊ីនសម្ងួត៣គ្រឿង ជញ្ជីងថ្លឹង៦គ្រឿង និងសម្ភារមួយចំនួនទៀត។
ជនសង្ស័យទាំង៨នាក់រួមមាន ១-ឈ្មោះ ERIC JAY WEISMAN ភេទប្រុស អាយុ៥០ឆ្នាំ ជនជាតិអាមេរិក, ២-ឈ្មោះ ALEX SAIBNYI ភេទប្រុស អាយុ៤៤ឆ្នាំ ជនជាតិកាណាដា, ៣-ឈ្មោះ NURIAHMETOV RASIL ភេទប្រុស អាយុ៤១ឆ្នាំ ជនជាតិរុស្ស៊ី, ៤-ឈ្មោះ PAVEL PELOGOTIN ភេទប្រុស អាយុ៣៣ឆ្នាំ ជនជាតិរុស្ស៊ី, ៥-ឈ្មោះ ANDEAS BERGSTEDI ភេទប្រុស អាយុ៥៤ឆ្នាំ ជនជាតិស៊ុយអែត, ៦-ឈ្មោះ JOE LUDEMANN ភេទប្រុស អាយុ៤៥ឆ្នាំ ជនជាតិអូស្ត្រាលី (ជាម្ចាស់អាហារដ្ឋាន និងរង្គសាល The Happy), ៧-ឈ្មោះឃួន ស្រីមុំ ភេទស្រី អាយុ២៧ឆ្នាំ ជនជាតិខ្មែរ និង៨-ឈ្មោះគឹម ចិន្តា ភេទស្រី អាយុ៤០ឆ្នាំ ជនជាតិវៀតណាម។
នេះជាលើកទី១ហើយដែលសមត្ថកិច្ចបង្ក្រាបបានទីតាំងចែកចាយ និងផលិតគ្រឿងញៀនដ៏ធំ ដែលជនល្មើសជាជនបរទេសដូចនេះ។ ក្នុងនាមជាមេបញ្ជាការរងកងរាជអាវុធហត្ថខេត្ត លោកអំពាវនាវដល់ប្រជាពលរដ្ឋទាំងអស់ដែលបានដឹងពីប្រភពចែកចាយគ្រឿងញៀន សូមសហការជាមួយសមត្ថកិច្ច ដើម្បីលុបបំបាត់ឱ្យអស់នូវពាក្យគ្រឿងញៀនពីស្រទាប់អ្នកញៀនគ្រឿងញៀន។ រហូតមកដល់ម៉ោង១២ ថ្ងៃត្រង់ ថ្ងៃទី៣ ឧសភា សមត្ថកិច្ចបាននាំខ្លួនជនសង្ស័យទៅឆែកឆេរបន្ថែមទៀត។ ជនសង្ស័យទាំង៨នាក់ត្រូវបានសមត្ថកិច្ចកងរាជអាវុធហត្ថខេត្តកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ