ខេត្តកំពង់ចាម ៖ រថយន្តម៉ាក FUSO ទ្រុងពណ៌ខៀវ គ្មានស្លាកលេខ ចំណុះ៥តោន ដឹកដំឡូងមីបង្កប់ឈើគ្រញូងជាច្រើនម៉ែត្រគូប បានមកឈប់នៅលើដីឡូត៍មួយកន្លែងស្ថិតនៅត្រង់ភូមិខែលជ័យ ឃុំអូរស្វាយ ស្រុកកំពង់សៀម កាលពីវេលាម៉ោង៤និង៣០នាទីរសៀល ថ្ងៃទី២ ឧសភា ឆ្នាំ២០១១ ដោយបិទទ្វារ និងចាក់សោ មិនឃើញមានម្ចាស់នោះទេ
ខេត្តកំពង់ចាម ៖ រថយន្តម៉ាក FUSO ទ្រុងពណ៌ខៀវ គ្មានស្លាកលេខ ចំណុះ៥តោន ដឹកដំឡូងមីបង្កប់ឈើគ្រញូងជាច្រើនម៉ែត្រគូប បានមកឈប់នៅលើដីឡូត៍មួយកន្លែងស្ថិតនៅត្រង់ភូមិខែលជ័យ ឃុំអូរស្វាយ ស្រុកកំពង់សៀម កាលពីវេលាម៉ោង៤និង៣០នាទីរសៀល ថ្ងៃទី២ ឧសភា ឆ្នាំ២០១១ ដោយបិទទ្វារ និងចាក់សោ មិនឃើញមានម្ចាស់នោះទេ ត្រូវកម្លាំងរដ្ឋបាលព្រៃឈើសង្កាត់ចំការលើ និងខណ្ឌ សហការជាមួយនគរបាលសេដ្ឋកិច្ចខេត្តរឹបអូសយកទៅរក្សាទុកនៅឃ្លាំងទន្លេបិទ។
លោកហេង ចន្ត្រា នាយរងផ្នែករដ្ឋបាលព្រៃឈើត្រើយស្តាំ ឱ្យដឹងថា កម្លាំងរដ្ឋបាលព្រៃឈើក្រោមឱវាទបានរាយការណ៍មករូបលោកថា បានប្រទះឃើញរថយន្ត១គ្រឿងនាវេលាម៉ោងខាងលើ គួរឱ្យសង្ស័យដែលដឹកដំឡូងមីមើលទៅឡើងដាប ហើយក៏មិនឃើញអ្នកបើកបរសោះ ដែលទំនងជាខូចទៅមុខមិនរួច។ លុះពេលត្រួតពិនិត្យឃើញសុទ្ធតែឈើគ្រញូងបង្កប់ខាងក្រោម ដោយដាក់ដំឡូងមីខាងលើតែបន្តិចប៉ុណ្ណោះ។
លោកនាយរងផ្នែករដ្ឋបាលព្រៃឈើត្រើយស្តាំបានបន្តថា លោកបានរាយការណ៍ទៅលោកប្រាក់ ណូម៉ា នាយខណ្ឌរដ្ឋបាលព្រៃឈើស្តីទីកំពង់ចាម ទើបចាត់ឱ្យមន្ត្រីក្រោមឱវាទចុះមកត្រួតពិនិត្យឃើញមានបង្កប់ឃើញគ្រញូងមែន ក៏បញ្ជាឱ្យនាំរថយន្តនេះមកកាន់ទីស្នាក់ការ។ ប៉ុន្តែពុំអាចបើកយករថយន្តមកបានទេ ព្រោះរថយន្តជាប់សោ។ ឃើញបែបនេះ ទើបមានការហៅជាងមកធ្វើទម្រាំតែរួចរាល់រហូតដល់ម៉ោង៨យប់ ដោយសារតែដាច់ខ្សែភ្លើង។ ទោះបីជាបែបណា រថយន្តត្រូវបានបើកយកមករក្សាទុកនៅខណ្ឌរដ្ឋបាលព្រៃឈើដូចបំណង។ លុះដល់ថ្ងៃទី៣ ឧសភា ទើបបានបើកយកទៅរក្សាទុកនៅឃ្លាំងទន្លេបិទ ដើម្បីធ្វើការវាស់វែងដោយមានលោកព្រះរាជអាជ្ញារងអមសាលាដំបូងខេត្តចូលរួមផងដែរ។ បើតាមការម៉ាន់ស្មានឈើគ្រញូទាំងនោះមិនតិចជាង១៥ម៉ែត្រគូបទេ មានតម្លៃរាប់សែនដុល្លារ។ គេមិនដឹងថា រថយន្តដឹកដំឡូងមីដែលមានបង្កប់ឈើគ្រញូងខាងលើនេះជារបស់អ្នកណានោះទេ ព្រោះមិនទាន់មាននរណាម្នាក់ចេញមុខមកអះអាងថាជារបស់ខ្លួននៅឡើយ។
តាមប្រភពពីសមត្ថកិច្ចមួយរូបបានប្រាប់ឱ្យដឹងថា រថយន្តដឹកឈើគ្រញូងខាងលើនេះបានបើកចេញមកពីខេត្តកំពង់ធំ ក្នុងគោលបំណងយកទៅលក់នៅព្រំដែនវៀតណាម។ ក្នុងខណៈពេលដែលបើកមកជិតដល់ត្រង់រង្វង់មូល បានឈប់ចតនៅក្នុងដីឡូត៍របស់អ្នកភូមិមួយកន្លែង ហើយឮថា ដាច់ខ្សែភ្លើងទើបត្រូវបានអ្នកបើករថយន្តចាក់សោទ្វារទុកចោលនាថ្ងៃទី២ ឧសភា ឆ្នាំ២០១១។ បន្ទាប់មកត្រូវកម្លាំងរដ្ឋបាលព្រៃឈើ និងនគរបាលសេដ្ឋកិច្ចខេត្តសង្ស័យទៅពិនិត្យ និងរឹបអូសយកមករក្សាទុកនៅឃ្លាំងទន្លេបិទ៕
ចែករំលែកព័តមាននេះ