ភ្នំពេញ៖ រដ្ឋបាលរាជធានីភ្នំពេញ បានធ្វើការអភិវឌ្ឍតំបន់មិនរៀបរយ នៅតាមប្រឡាយទឹកស្អុយ​ស្ទឹងមានជ័យ អោយក្លាយទៅជាតំបន់រៀបរយ ដោយផ្ទះសំបែងប្រជាពលរដ្ឋមានប្លង់កម្មសិទ្ធិ​ស្របច្បាប់ ជាមួយនឹងការរស់នៅ ប្រកបដោយអនាម័យ និងបរិស្ថានល្អ។ នៅក្រោមស្ពាន​ស្ទឹងមានជ័យ ក៏មានការអភិវឌ្ឍ ដោយមានទាំងសួនកុមារ និងសួនច្បារសាធារណៈ ព្រមទាំង​កន្លែងបាត់ប្រាណសាធារណៈ​ថែមទៀតផង។

ខាងលើនេះ ជាការលើកឡើងរបស់លោក នួន ផារ័ត្ន ​អភិបាល​រង​​រាជ​ធានី​​ភ្នំពេញ ខណៈដែល​លោក អញ្ជើញជាតំណាងលោក ឃួង ស្រេង អភិបាលនៃគណៈអភិបាលរាជធានីភ្នំពេញ ក្នុងពិធីសម្ពោធដាក់ឱ្យប្រើប្រាស់ជាផ្លូវការហេដ្ឋារចនាសម្ព័ន្ធនានា ក្នុងក្របខណ្ឌនៃគម្រោង​ហិរញ្ញប្បទាន​រួម រវាងសមាគម AIMF សហភាពអឺរ៉ុប រដ្ឋបាលរដ្ឋធានីប៉ារីស និងរដ្ឋបាល​រាជធានីភ្នំពេញ នារសៀលថ្ងៃទី១៦ ខែឧសភា ឆ្នាំ២០២៣នេះ នៅតាមប្រឡាយស្ទឹងមានជ័យ និងនៅសួនច្បារក្រោមស្ពានអាកាសស្ទឹងមានជ័យ ក្នុងសង្កាត់ស្ទឹងមានជ័យទី១ ខណ្ឌមានជ័យ។

ពិធីនេះ ក៏មានការចូលរួមពីលោកស្រី អារីយ៉ាណា អាដេហ្ស៊ី (Arianna ARDESI) ទីប្រឹក្សា និងជា​លេខាធិការរងអចិន្ត្រៃយ៍ ទទួលបន្ទុក​កម្មវិធីសហប្រតិបត្តិការ និងលោកប៉ូ ដេវីដ រ៉េញនីញ៉េ ប្រធាននាយកដ្ឋានទំនាក់ទំនងអន្តរជាតិនៃរដ្ឋធានីប៉ារីសផងដែរ។

លោក នួន ផារ័ត្ន បាន​ឲ្យដឹងថា ស្ទឹងមានជ័យ ពីដើមឡើយ ជាតំបន់មិនរៀបរយ តែក្រោយ​ពីរដ្ឋបាល​រាជធានីភ្នំពេញ សូមគោលការណ៍ទៅរាជរដ្ឋាភិបាល យើងបានអភិវឌ្ឍប្រឡាយ​ស្ទឹងមានជ័យនេះ ពីតំបន់មិនរៀប​រយ មកជាតំបន់រៀបរយ ដោយរដ្ឋបាលរាជធានីភ្នំពេញ ក្រោមការចង្អុលណែនាំពីសម្ដេចតេជោ ហ៊ុន សែន បានប្រគល់កម្មសិទ្ធិដីធ្លីស្របច្បាប់ជូនបងប្អូន​ប្រជាពលរដ្ឋរាប់រយគ្រួសារ នៅតាមដងប្រឡាយនេះ ដែលធ្វើឲ្យតំបន់នេះ ក្លាយជាតំបន់ ដែលមានផាសុខភាព មានអនាម័យ បរិស្ថានល្អ មានផ្លូវធ្វើដំណើរងាយស្រួលផងដែរ។

ប៉ុន្តែទោះបីជាយ៉ាងណាក្តី លោក នួន ផារ័ត្ន បានអំពាវអោយ​ប្អូនប្រជាពលរដ្ឋ ធ្វើយ៉ាងណា​ កុំរំលោភចំណីផ្លូវថ្មើរជើង តាមដងប្រឡាយ និងកុំលក់ដូរនៅក្រោមស្ពានអាកាសស្ទឹងមានជ័យ ដែលធ្វើឲ្យប៉ះពាល់សណ្តាប់ធ្នាប់សាធារណៈ និងប៉ះពាល់ដល់សោភណ្ឌភាព រាជធានីភ្នំពេញ។

លោក ប៉ូ ដេវីដ រ៉េញនីញ៉េ បាន​លើកឡើងដែរថា​ លោកពិតជារីករាយជាមួយនឹងគម្រោង ដែលបានធ្វើឡើងនៅក្នុងរាជធានីភ្នំពេញ​។ គម្រោង​នេះ ទោះបីតូចក៏ពិតមែន ប៉ុន្តែវាមាន​អត្ថន័យធំធេង និងជាគម្រោងគំរូ សម្រាប់យកទៅអនុវត្តទៅតាមបណ្ដា​ប្រទេសផ្សេងទៀត។

គួរបញ្ជាក់ថា ហេដ្ឋារចនាសម្ព័ន្ធនានា ក្នុងក្របខណ្ឌនៃគម្រោងហិរញ្ញប្បទានរួម រវាងសមាគម AIMF សហភាពអឺរ៉ុប រដ្ឋបាលរដ្ឋធានីប៉ារីស និងរដ្ឋបាលរាជធានីភ្នំពេញ ដែលសម្ពោធដាក់ឱ្យ​ប្រើប្រាស់ជាផ្លូវការ នារសៀលថ្ងៃទី១៦ ខែឧសភា ឆ្នាំ២០២៣ នេះ រួមមាន៖ មណ្ឌលសហគមន៍ ដែលមាន​ជាន់ផ្ទាល់ដី និងជាន់ទី១ មានបន្ទប់សិក្សារបស់កុមារ ផ្ទះបាយ ការិយាល័យ បន្ទប់ទឹក បុរស នារី និង​ទីធ្លា សម្រាប់ប្រជុំ រួមទាំង​បន្ទប់ពិនិត្យសុខភាព​។ ក្នុងនោះ ក៏មានពិធីសម្ពោធដាក់​អោយប្រើប្រាស់សួនកុមារ និងសួនច្បារសាធារណៈ សម្រាប់ឲ្យបងប្អូនប្រជាពលរដ្ឋ បានហាត់​ប្រាណ នៅក្រោមស្ពានអាកាស​ស្ទឹងមានជ័យផង​ដែរ៕