ទីក្រុងវៀងចន្ទន៍ ៖ អាជ្ញាធរទីក្រុងវៀងចន្ទន៍របស់ប្រទេសឡាវ បានណែនាំដល់អាជីវកម្ម ទីផ្សារ អ្នកលក់ក្នុងស្រុក និងហាងលក់រាយធំៗទាំងអស់រក្សាតម្លៃទំនិញឱ្យនៅថេរ មុនពេលពិធីបុណ្យចូលឆ្នាំប្រពៃណីឡាវ ឬ ភីម៉ៃឡាវ…
ទីក្រុងវៀងចន្ទន៍ ៖ អាជ្ញាធរទីក្រុងវៀងចន្ទន៍របស់ប្រទេសឡាវ បានណែនាំដល់អាជីវកម្ម ទីផ្សារ អ្នកលក់ក្នុងស្រុក និងហាងលក់រាយធំៗទាំងអស់រក្សាតម្លៃទំនិញឱ្យនៅថេរ មុនពេលពិធីបុណ្យចូលឆ្នាំប្រពៃណីឡាវ ឬ ភីម៉ៃឡាវ (Pi Mai Lao) ដែលជាផ្នែកមួយនៃកិច្ចខិតខំប្រឹងប្រែង ដើម្បីគ្រប់គ្រងតម្រូវការថ្ងៃឈប់សម្រាកដែលកំពុងកើនឡើង។
បើតាមប្រភពពីសារព័ត៌មាន Laotian Times កាលពីថ្ងៃទី៨ ខែមេសា ឆ្នាំ២០២៦ បានរាយការណ៍ថា ក្រសួងឧស្សាហកម្ម និងពាណិជ្ជកម្មឡាវ បានអះអាងថា ខ្លួនកំពុងធ្វើការដោយផ្ទាល់ជាមួយផ្សារទំនើបធំៗ មជ្ឈមណ្ឌលទំនិញ និងហាងលក់រាយ ដើម្បីទប់ស្កាត់ការឡើងថ្លៃទំនិញ ការស្តុកទុក និងការលក់ដូរមិនត្រឹមត្រូវ អំឡុងពេលពិធីបុណ្យចូលឆ្នាំប្រពៃណីឡាវ។
អាជ្ញាធរក៏បានណែនាំដល់បណ្តាអាជីវកម្មនៅក្នុងស្រុកឱ្យរក្សាតម្លៃទំនិញឱ្យនៅថេរ និងធានាថាមានស្តុកគ្រប់គ្រាន់ ពិសេសសម្រាប់ទំនិញដែលមានតម្រូវការខ្ពស់ អំឡុងពេលប្រារព្ធពិធីបុណ្យប្រពៃណីជាតិ ដែលនឹងចូលមកដល់នាពេលដ៏ខ្លីខាងមុខនេះ រួមមានទាំងប្រេងឥន្ធនៈ ហ្គាស អង្ករដំណើប សាច់ជ្រូក ត្រី ស៊ុត និងទំនិញនាំចូលដែលប្រើប្រាស់ជាទូទៅ។
មន្ត្រីបានសង្កត់ធ្ងន់ថា ផលិតផលទាំងអស់ត្រូវតែបំពេញតាមស្តង់ដាគុណភាព។ ទំនិញផុតកំណត់ ឬទំនិញមិនបំពេញតាមស្តង់ដាត្រូវបានហាមឃាត់ ហើយទំនិញទាំងអស់ត្រូវតែដាក់ស្លាកសញ្ញាយ៉ាងច្បាស់ជាភាសាឡាវ ជាមួយនឹងតម្លៃបង្ហាញជាលុយគីបឡាវ។ លើសពីនេះ ក្រុមត្រួតពិនិត្យនឹងត្រូវបានដាក់ពង្រាយទូទាំងស្រុកទាំង ៩ នៃទីក្រុងវៀងចន្ទន៍ ដើម្បីតាមដានការអនុវត្តតាម ដោយផ្តោតលើទីតាំងទិញទំនិញពេញនិយម ដែលតម្រូវការត្រូវបានគេរំពឹងថានឹងកើនឡើង។
គួរបញ្ជាក់ថា កិច្ចខិតខំប្រឹងប្រែងនេះកើតឡើង ខណៈថ្លៃប្រេងឥន្ធនៈកើនឡើងខ្ពស់ នៅតែបន្តប៉ះពាល់ដល់ការដឹកជញ្ជូន និងទំនិញនាំចូល ដែលបង្កើនសម្ពាធលើតម្លៃ។ យោងតាមការជូនដំណឹងខាងលើនេះ ការសម្របសម្រួលជាមួយអាជ្ញាធរព្រំដែន នឹងត្រូវបានពង្រឹងបន្ថែមទៀត ដើម្បីគ្រប់គ្រងការនាំចូលខុសច្បាប់ និងធានាបាននូវការផ្គត់ផ្គង់ទំនិញ អំឡុងពេលថ្ងៃឈប់សម្រាកបុណ្យចូលឆ្នាំប្រពៃណីឡាវ៕
ចែករំលែកព័តមាននេះ