រាជធានីភ្នំពេញ ៖ ជនជាតិយួន៣នាក់ គឺប្តីប្រពន្ធ និងប្អូន នៅថ្ងៃទី៣ ឧសភានេះត្រូវសមត្ថកិច្ចនាំខ្លួនទៅកាន់សាលាដំបូងរាជធានីដើម្បីសាកសួរ និងចោទប្រកាន់ជាផ្លូវការចំពោះពួកគេពាក់ព័ន្ធនឹងការផលិតគ្រឿងញៀនយ៉ាងធំមួយនៅក្នុងរាជធានី។ ជាមួយនឹងការនាំខ្លួននេះសមត្ថកិច្ចក៏បានប្រមូលវត្ថុតាង រួមមានឧបករណ៍សម្រាប់ផលិត
រាជធានីភ្នំពេញ ៖ ជនជាតិយួន៣នាក់ គឺប្តីប្រពន្ធ និងប្អូន នៅថ្ងៃទី៣ ឧសភានេះត្រូវសមត្ថកិច្ចនាំខ្លួនទៅកាន់សាលាដំបូងរាជធានីដើម្បីសាកសួរ និងចោទប្រកាន់ជាផ្លូវការចំពោះពួកគេពាក់ព័ន្ធនឹងការផលិតគ្រឿងញៀនយ៉ាងធំមួយនៅក្នុងរាជធានី។ ជាមួយនឹងការនាំខ្លួននេះសមត្ថកិច្ចក៏បានប្រមូលវត្ថុតាង រួមមានឧបករណ៍សម្រាប់ផលិត និងសារធាតុផ្សំជាច្រើនមុខដើម្បីដាក់ជូនតុលាការជាបន្ទុកធ្វើការចោទប្រកាន់។
ជនជាតិយួនទាំង៣នាក់នោះមាន ១-ឈ្មោះយូ សៀងហ៊ុំ ភេទប្រុស អាយុ៣៦ឆ្នាំ, ២-ឈ្មោះហ្វៀង ធីង៉ុក ភេទស្រី អាយុ២៩ឆ្នាំ(២នាក់នេះជាប្តីប្រពន្ធ) និងជាម្ចាស់ទីតាំងផលិតគ្រឿងញៀន, ៣-ឈ្មោះយូ តៃ ភេទប្រុស អាយុ២១ឆ្នាំត្រូវជាប្អូន និងជាកម្មករជួយផលិតគ្រឿងញៀនពួកគេស្នាក់នៅផ្ទះជួលលេខ១៥០E2 វិថីព្រះមុនីរ៉េតកែងនឹងផ្លូវលេខ៣៨៨ សង្កាត់ទួលស្វាយព្រៃទី២ ខណ្ឌចំការមន។ គួរបញ្ជាក់ថា កាលពីព្រលប់ថ្ងៃទី២៩ មេសា លោកឧត្តមសេនីយ៍បែន រ័ត្ន ស្នងការរង និងជាប្រធានការិយាល័យកណ្តាលនគរបាលប្រឆាំងបទល្មើសនៃស្នងការដ្ឋាននគរបាលរាជធានីភ្នំពេញ និងលោកវរសេនីយ៍ទៀង ច័ន្ទសារ ប្រធានការិយាល័យប្រឆាំងគ្រឿងញៀនបានបើកប្រតិបត្តិការបង្ក្រាបទីតាំងលួចផលិតគ្រឿងញៀនមួយកន្លែងនៅផ្ទះលេខ១៥០E2 ដោយឃាត់ខ្លួនជនជាតិវៀតណាមបីនាក់ប្តីប្រពន្ធ និងប្អូន ព្រមទាំងដកហូតបានឧបករណ៍ផលិត សារធាតុផ្សំ ទូរស័ព្ទ ប្រាក់ដុល្លារ និងសំភារជាច្រើនទៀតពាក់ព័ន្ធនឹងការផលិត។
ការបង្ក្រាបទីតាំងលួចលាក់ផលិតគ្រឿងញៀនមួយកន្លែងនេះ ត្រូវបានលោកឧត្តមសេនីយ៍ស្នងការរងអះអាងថា លោកបានប្រើប្រាស់កម្លាំងជំនាញស៊ើបអង្កេត និងតាមដានសកម្មភាពក្រុមផលិតមួយក្រុមនេះយូរហើយ ប៉ុន្តែការស៊ើបអង្កេតកន្លងមកយើងរកមិនទាន់ឃើញទីតាំងផលិតឱ្យបានច្បាស់លាស់ ហើយយើងបានប្រឹងប្រែងអស់ពីសមត្ថភាព ព្រមទាំងបានចំណាយលុយអស់ជាច្រើនទើបបង្ក្រាបទីតាំងនោះបាន។ លោកបែន រ័ត្ន បានប្រាប់កោះសន្តិភាពនៅក្នុងកិច្ចប្រតិបត្តិការនោះទៀតថា ការបង្ក្រាបគ្រឿងញៀនមិនមែនជាការងាយស្រួលទេ ហើយបើយើងមានការធ្វេសប្រហែសយើងមិនអាចធ្វើទៅបានជោគជ័យឡើយ បើយើងខ្វះការប្រុងប្រយ័ត្នអាចនឹងមានគ្រោះថ្នាក់ទៀតផង។ ការបង្ក្រាបករណីគ្រឿងញៀននីមួយៗ យើងមានការសិក្សា និងស្រាវជ្រាវសើុបអង្កេតច្បាស់លាស់ណាស់ទើបអាចធ្វើទៅបាន បូករួមទាំងចំណាយថវិកាផងដែរ។
លោកស្នងការរងចាត់ទុកថា ករណីជនជាតិវៀតណាម៣នាក់នេះក៏ជារូបភាពផលិតទ្រង់ទ្រាយធំមួយដែរ ព្រោះវាមានឧបករណ៍គ្រប់គ្រាន់សម្រាប់ផលិត មិនតែប៉ុណ្ណោះគេផលិតគ្រឿងញៀនប្លែកៗដែលមិនធ្លាប់ឃើញដូចជាបំពង់ប្រើប្រាស់មានថ្នាំញៀននៅក្នុងនោះស្រាប់ មិនចាំបាច់ប្រើដបទឹកបរិសុទ្ធទេ ហើយឧបករណ៍ផលិតក៏ប្លែកដែរមានដូចជាម៉ាស៊ីនទឹកក្រឡុក គេយកមកប្រើសម្រាប់ក្រឡុកសារធាតុផ្សំ គេបានកែច្នៃឧបករណ៍ចំហុយថ្នាំឱ្យឆាប់ស្ងួត។ល។ ក្រោយពីឃាត់ខ្លួនជនសង្ស័យលួចផលិតគ្រឿងញៀនទាំង៣នាក់នោះហើយ សមត្ថកិច្ចបានបន្តធ្វើការស្រាវជ្រាវ និងឈានទៅឆែកឆេរទីតាំង៥កន្លែងទៀតរកឃើញសារធាតុផ្សំគ្រឿងញៀនប្រមាណជិត៤០គីឡូក្រាម។
លោកវរសេនីយ៍ ទៀង ច័ន្ទសារ ប្រធានការិយាល័យប្រឆាំងគ្រឿងឱ្យដឹងថា ថ្ងៃនេះ(៣ ឧសភា) យើងបញ្ជូនជនសង្ស័យ រួមទាំងវត្ថុតាងដែលរឹបអូសបានជាក់ស្តែងនៅកន្លែងកើតហេតុទៅកាន់សាលាដំបូងរាជធានីភ្នំពេញដើម្បីចោទប្រកាន់តាមផ្លូវច្បាប់ ៕
ចែករំលែកព័តមាននេះ